ನಾನ್ ವೆಜ್ ಪ್ರಿಯರ ಸಂಡೇ ಮೆನುವಿನಲ್ಲಿ ಕಬಾಬ್ ಪ್ರಮುಖ ಸ್ಥಾನ ಪಡೆದಿರುತ್ತದೆ. ಅದರಲ್ಲೂ ಮಟನ್ ಕಬಾಬ್ ಎಂದರೆ ಯಾರಿಗಾದರೂ ಬಾಯಲ್ಲಿ ನೀರೂರದೆ ಇರದು. ಹೋಟೆಲ್ಗಳಲ್ಲಿ ಸಿಗುವಂತಹ ಗರಿಗರಿಯಾದ ಮತ್ತು ಒಳಗಡೆ ಸಾಫ್ಟ್ ಆಗಿರುವ ಮಟನ್ ಕಬಾಬ್ ಅನ್ನು ಮನೆಯಲ್ಲೇ ಅತ್ಯಂತ ಸುಲಭವಾಗಿ ಹಾಗೂ ಅತ್ಯಂತ ರುಚಿಕರವಾಗಿ ತಯಾರಿಸಬಹುದು. ವಾರಾಂತ್ಯದ ದಿನಗಳಲ್ಲಿ ಅಥವಾ ವಿಶೇಷ ಸಂದರ್ಭಗಳಲ್ಲಿ ಕುಟುಂಬದವರೊಂದಿಗೆ ಸವಿಯಲು ಬೇಕಾಗುವ ಮಟನ್ ಕಬಾಬ್ ರೆಸಿಪಿ ಮತ್ತು ಅದನ್ನು ಮಾಡುವ ಸಂಪೂರ್ಣ ವಿಧಾನ ಇಲ್ಲಿದೆ.
ಮಟನ್ ಕಬಾಬ್ ಮಾಡಲು ಬೇಕಾಗುವ ಪದಾರ್ಥಗಳು
- ಮಟನ್ ತುಂಡುಗಳು – ಅರ್ಧ ಕೆಜಿ
- ಶುಂಠಿ-ಬೆಳ್ಳುಳ್ಳಿ ಪೇಸ್ಟ್ – ೨ ಚಮಚ
- ಗಟ್ಟಿ ಮೊಸರು – ೩ ಚಮಚ
- ಕಾನ್ ಫ್ಲೋರ್ – ೨ ಚಮಚ
- ಅಕ್ಕಿ ಹಿಟ್ಟು – ೧ ಚಮಚ
- ಲಿಂಬೆ ರಸ – ೧ ಚಮಚ
- ಅಚ್ಚಖಾರದ ಪುಡಿ – ೨ ಚಮಚ
- ಧನಿಯಾ ಪುಡಿ – ೧ ಚಮಚ
- ಗರಂ ಮಸಾಲಾ ಪುಡಿ – ೧ ಚಮಚ
- ಕಬಾಬ್ ಮಸಾಲಾ ಪುಡಿ – ೨ ಚಮಚ
- ಕೊತ್ತಂಬರಿ ಮತ್ತು ಪುದೀನಾ ಪೇಸ್ಟ್ – ೧ ಚಮಚ
- ರುಚಿಗೆ ತಕ್ಕಷ್ಟು ಉಪ್ಪು
- ಕರಿಯಲು ಅಗತ್ಯವಿರುವಷ್ಟು ಎಣ್ಣೆ
ಮಾಡುವ ವಿಧಾನ
ಮೊದಲಿಗೆ ಮಟನ್ ತುಂಡುಗಳನ್ನು ಚೆನ್ನಾಗಿ ತೊಳೆದು ನೀರಿಲ್ಲದಂತೆ ಸಂಪೂರ್ಣವಾಗಿ ಒಣಗಿಸಿಟ್ಟುಕೊಳ್ಳಿ. ಮಟನ್ ಬೇಗನೆ ಸಾಫ್ಟ್ ಆಗಲು ಮತ್ತು ಮಸಾಲೆ ಚೆನ್ನಾಗಿ ಹೀರಿಕೊಳ್ಳಲು ಅದನ್ನು ಸಣ್ಣ ಸಣ್ಣ ತುಂಡುಗಳಾಗಿ ಕತ್ತರಿಸಿಕೊಳ್ಳುವುದು ಉತ್ತಮ.
ಒಂದು ದೊಡ್ಡ ಪಾತ್ರೆಯಲ್ಲಿ ತೊಳೆದ ಮಟನ್ ತುಂಡುಗಳನ್ನು ಹಾಕಿಕೊಳ್ಳಿ. ಅದಕ್ಕೆ ಮೊಸರು, ಶುಂಠಿ-ಬೆಳ್ಳುಳ್ಳಿ ಪೇಸ್ಟ್, ಕೊತ್ತಂಬರಿ-ಪುದೀನಾ ಪೇಸ್ಟ್, ಖಾರದ ಪುಡಿ, ಧನಿಯಾ ಪುಡಿ, ಗರಂ ಮಸಾಲಾ, ಕಬಾಬ್ ಮಸಾಲಾ, ಲಿಂಬೆ ರಸ ಮತ್ತು ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿ. ಮಸಾಲೆ ಎಲ್ಲಾ ತುಂಡುಗಳಿಗೂ ಸಮನಾಗಿ ತಗುಲಬೇಕು.
ನಂತರ ಈ ಮಿಶ್ರಣಕ್ಕೆ ಕಾನ್ ಫ್ಲೋರ್ ಮತ್ತು ಅಕ್ಕಿ ಹಿಟ್ಟನ್ನು ಸೇರಿಸಿ ಮಟನ್ ಜೊತೆ ಲಘುವಾಗಿ ಕಲಸಿ. ಅಕ್ಕಿ ಹಿಟ್ಟು ಬಳಸುವುದರಿಂದ ಕಬಾಬ್ ಹೊರಗಡೆ ಗರಿಗರಿಯಾಗಿ ಬರುತ್ತದೆ. ಈ ಮ್ಯಾರಿನೇಟ್ ಮಾಡಿದ ಮಿಶ್ರಣವನ್ನು ಕನಿಷ್ಠ ಒಂದರಿಂದ ಎರಡು ಗಂಟೆಗಳ ಕಾಲ ಫ್ರಿಡ್ಜ್ನಲ್ಲಿ ಇಡಬೇಕು. ಎಷ್ಟು ಹೆಚ್ಚು ಸಮಯ ನೆನೆಯುತ್ತದೆಯೋ, ಕಬಾಬ್ ಅಷ್ಟು ಮೃದುವಾಗಿ ಮತ್ತು ರುಚಿಯಾಗಿ ಮೂಡಿಬರುತ್ತದೆ.
ಬಾಣಲೆಯಲ್ಲಿ ಕಬಾಬ್ ಕರಿಯಲು ಅಗತ್ಯವಿರುವಷ್ಟು ಎಣ್ಣೆಯನ್ನು ಹಾಕಿ ಚೆನ್ನಾಗಿ ಕಾಯಿಸಿ. ಎಣ್ಣೆ ಸರಿಯಾಗಿ ಕಾದ ನಂತರ, ಉರಿಯನ್ನು ಮಧ್ಯಮ ಹಂತಕ್ಕೆ ತಂದು ಮ್ಯಾರಿನೇಟ್ ಮಾಡಿದ ಮಟನ್ ತುಂಡುಗಳನ್ನು ಒಂದೊಂದಾಗಿ ಎಣ್ಣೆಗೆ ಬಿಡಿ.
ಮಟನ್ ತುಂಡುಗಳು ಒಳಗಿನಿಂದ ಸಂಪೂರ್ಣವಾಗಿ ಬೇಯಬೇಕಿರುವುದರಿಂದ ಕಡಿಮೆ ಅಥವಾ ಮಧ್ಯಮ ಉರಿಯಲ್ಲಿ ನಿಧಾನವಾಗಿ ಕರಿಯಿರಿ. ಕಬಾಬ್ ಎರಡು ಕಡೆ ಚೆನ್ನಾಗಿ ಬೆಂದು, ಕಂದು ಬಣ್ಣಕ್ಕೆ ತಿರುಗಿದ ನಂತರ ಎಣ್ಣೆಯಿಂದ ಹೊರಗೆ ತೆಗೆಯಿರಿ.
ಈಗ ಬಿಸಿಬಿಸಿಯಾದ ಹಾಗೂ ಸಖತ್ ಟೇಸ್ಟಿಯಾದ ಮಟನ್ ಕಬಾಬ್ ಸವಿಯಲು ಸಿದ್ಧವಾಗಿದೆ. ಇದರ ಮೇಲೆ ಸ್ವಲ್ಪ ಚಾಟ್ ಮಸಾಲಾ ಉದುರಿಸಿ, ಹಸಿರು ಚಟ್ನಿ ಮತ್ತು ಈರುಳ್ಳಿ ಸ್ಲೈಸ್ ಜೊತೆಗೆ ಸರ್ವ್ ಮಾಡಿದರೆ ಹೋಟೆಲ್ ಶೈಲಿಯ ರುಚಿ ನಿಮ್ಮದಾಗುತ್ತದೆ.
