ಮೇಜರ್ ಪುತ್ರಿಯನ್ನು ತಮ್ಮೊಂದಿಗೇ ಇರುವಂತೆ ಪೋಷಕರು ಬಲವಂತಪಡಿಸುವಂತಿಲ್ಲ..! ಹೈಕೋರ್ಟ್ ಮಹತ್ವದ ತೀರ್ಪು

ಪ್ರಯಾಗರಾಜ್: ವೈಯಕ್ತಿಕ ಸ್ವಾತಂತ್ರ್ಯ ಮತ್ತು ಹಕ್ಕುಗಳ ರಕ್ಷಣೆಗೆ ಸಂಬಂಧಿಸಿದಂತೆ ಅಲಹಾಬಾದ್ ಹೈಕೋರ್ಟ್ ಮಹತ್ವದ ತೀರ್ಪು ನೀಡಿದೆ. ವಯಸ್ಕಳಾದ (ಮೇಜರ್) ಪುತ್ರಿಯನ್ನು ಆಕೆಯ ಇಚ್ಛೆಗೆ ವಿರುದ್ಧವಾಗಿ ತಮ್ಮೊಂದಿಗೆ ವಾಸಿಸುವಂತೆ ಪೋಷಕರು ಬಲವಂತಪಡಿಸಲು ಹೆಬಿಯಸ್ ಕಾರ್ಪಸ್ ಅರ್ಜಿಯನ್ನು ಬಳಸುವಂತಿಲ್ಲ ಎಂದು ನ್ಯಾಯಾಲಯ ಸ್ಪಷ್ಟಪಡಿಸಿದೆ.

ಜಸ್ಟಿಸ್ ಸಂದೀಪ್ ಜೈನ್ ಅವರ ಏಕಸದಸ್ಯ ಪೀಠ ಸೆಪ್ಟೆಂಬರ್ 28ರಂದು ಈ ಕುರಿತು ಆದೇಶ ನೀಡಿದೆ. ವಯಸ್ಕ ವ್ಯಕ್ತಿಯು ತನ್ನ ವಾಸಸ್ಥಳ ಮತ್ತು ಯಾರೊಂದಿಗೆ ವಾಸಿಸಬೇಕು ಎಂಬುದನ್ನು ಸ್ವತಂತ್ರವಾಗಿ ಆಯ್ಕೆ ಮಾಡುವ ಹಕ್ಕು ಹೊಂದಿದ್ದು, ಕೇವಲ ಅವರು ಪೋಷಕರು ಎಂಬ ಕಾರಣಕ್ಕೆ ಆಕೆಯನ್ನು ನಿರ್ದಿಷ್ಟ ವ್ಯಕ್ತಿಯೊಂದಿಗೆ ವಾಸಿಸುವಂತೆ ಬಲವಂತಪಡಿಸಲು ಸಾಧ್ಯವಿಲ್ಲ ಎಂದು ನ್ಯಾಯಾಲಯ ಹೇಳಿದೆ.

ಅಸಲಿಗೆ ನಡೆದಿದ್ದೇನು?

ಮೌ ಜಿಲ್ಲೆಯ ನಿವಾಸಿ ಕಲಾವತಿ ದೇವಿ ಅವರು ತಮ್ಮ 25 ವರ್ಷದ ಪುತ್ರಿ ಪೂಜಾ ಅವರನ್ನು ನ್ಯಾಯಾಲಯದ ಮುಂದೆ ಹಾಜರುಪಡಿಸುವಂತೆ ಕೋರಿ ಅಲಹಾಬಾದ್ ಹೈಕೋರ್ಟ್‌ನಲ್ಲಿ ಹೆಬಿಯಸ್ ಕಾರ್ಪಸ್ ಅರ್ಜಿ ಸಲ್ಲಿಸಿದ್ದರು.

ಈ ಅರ್ಜಿಯ ವಿಚಾರಣೆ ನಡೆಸಿದ ನ್ಯಾಯಾಲಯ, 2026ರ ಆಗಸ್ಟ್ 17ರಂದು ಯುವತಿಯನ್ನು ನ್ಯಾಯಾಲಯದ ಮುಂದೆ ಹಾಜರುಪಡಿಸುವಂತೆ ರಾಜ್ಯ ಸರ್ಕಾರಕ್ಕೆ ಸೂಚಿಸಿತ್ತು. ಅದರಂತೆ ಪೊಲೀಸರು ಪೂಜಾಳನ್ನು ನ್ಯಾಯಾಲಯದ ಮುಂದೆ ಹಾಜರುಪಡಿಸಿದರು.

ವಿಚಾರಣೆ ವೇಳೆ ನ್ಯಾಯಮೂರ್ತಿಗಳು ಪೂಜಾಳೊಂದಿಗೆ ನೇರವಾಗಿ ಮಾತನಾಡಿ ಆಕೆಯ ಅಭಿಪ್ರಾಯವನ್ನು ತಿಳಿದುಕೊಂಡರು. ತಾನು ದೆಹಲಿಯಲ್ಲಿ ಸ್ವತಂತ್ರವಾಗಿ ವಾಸಿಸುತ್ತಿದ್ದು, ಯಾರ ಅಕ್ರಮ ಬಂಧನದಲ್ಲೂ ಇಲ್ಲ ಎಂದು ಪೂಜಾ ನ್ಯಾಯಾಲಯಕ್ಕೆ ತಿಳಿಸಿದರು.

ಅಲ್ಲದೆ, ತಾಯಿಯೊಂದಿಗೆ ವಾಸಿಸಲು ತಮಗೆ ಯಾವುದೇ ಆಸಕ್ತಿ ಇಲ್ಲ ಎಂದು ಅವರು ಸ್ಪಷ್ಟಪಡಿಸಿದರು. ತಾಯಿಯ ಮನೆಯಲ್ಲಿ ಇದ್ದಾಗ ತಮ್ಮ ಮೇಲೆ ಹಲ್ಲೆ ಮತ್ತು ನಿಂದನೆ ನಡೆದಿವೆ ಎಂದು ಪೂಜಾ ಆರೋಪಿಸಿದರು. ಆದರೆ ಈ ಆರೋಪಗಳನ್ನು ತಾಯಿ ಕಲಾವತಿ ದೇವಿ ನಿರಾಕರಿಸಿ, ಪುತ್ರಿ ತಮ್ಮೊಂದಿಗೆ ವಾಸಿಸಬೇಕು ಎಂದು ನ್ಯಾಯಾಲಯದಲ್ಲಿ ಮನವಿ ಮಾಡಿದರು.

ಪುತ್ರಿಯ ನಿರ್ಧಾರಕ್ಕೆ ಮಾನ್ಯತೆ

ಪೂಜಾಳೊಂದಿಗೆ ಮಾತನಾಡಿ ಆಕೆಯ ಹೇಳಿಕೆಯನ್ನು ಪರಿಶೀಲಿಸಿದ ನ್ಯಾಯಾಲಯ, ಆಕೆ 25 ವರ್ಷದ ಮೇಜರ್ ಹಾಗೂ ತನ್ನ ನಿರ್ಧಾರಗಳನ್ನು ತೆಗೆದುಕೊಳ್ಳುವ ಸಾಮರ್ಥ್ಯ ಹೊಂದಿರುವ ವ್ಯಕ್ತಿ ಎಂದು ಹೇಳಿತು.

ಆಕೆ ತನ್ನ ಇಚ್ಛೆಯಿಂದಲೇ ಪ್ರತ್ಯೇಕವಾಗಿ ವಾಸಿಸಲು ನಿರ್ಧರಿಸಿದ್ದು, ಯಾವುದೇ ಅಕ್ರಮ ಬಂಧನದಲ್ಲಿಲ್ಲ ಎಂಬುದು ಸ್ಪಷ್ಟವಾಗಿದೆ ಎಂದು ನ್ಯಾಯಾಲಯ ಅಭಿಪ್ರಾಯಪಟ್ಟಿತು.

ವಯಸ್ಕ ವ್ಯಕ್ತಿಯು ತನ್ನ ವಾಸಸ್ಥಳದ ಬಗ್ಗೆ ಸ್ಪಷ್ಟ, ಸ್ವಯಂಪ್ರೇರಿತ ನಿರ್ಧಾರ ಕೈಗೊಂಡಿದ್ದರೆ, ಆಕೆಯ ಸ್ವಾತಂತ್ರ್ಯ ಮತ್ತು ನಿರ್ಧಾರ ತೆಗೆದುಕೊಳ್ಳುವ ಹಕ್ಕನ್ನು ಗೌರವಿಸಬೇಕು ಎಂದು ಹೈಕೋರ್ಟ್ ಹೇಳಿದೆ.

ಹೆಬಿಯಸ್ ಕಾರ್ಪಸ್ ಅರ್ಜಿ ವಜಾ

ಅಕ್ರಮ ಬಂಧನದಲ್ಲಿರುವ ವ್ಯಕ್ತಿಯನ್ನು ಬಿಡುಗಡೆ ಮಾಡುವ ಉದ್ದೇಶವೇ ಹೆಬಿಯಸ್ ಕಾರ್ಪಸ್ ಅರ್ಜಿಯಾಗಿದೆ. ಆದರೆ ಯಾವುದೇ ಅಕ್ರಮ ಬಂಧನ ಇಲ್ಲದ ಸಂದರ್ಭದಲ್ಲಿ, ವಯಸ್ಕ ವ್ಯಕ್ತಿಯನ್ನು ಆಕೆಯ ಇಚ್ಛೆಗೆ ವಿರುದ್ಧವಾಗಿ ನಿರ್ದಿಷ್ಟ ವ್ಯಕ್ತಿಯೊಂದಿಗೆ ವಾಸಿಸುವಂತೆ ಮಾಡಲು ಈ ಕಾನೂನು ಕ್ರಮವನ್ನು ಬಳಸಲು ಸಾಧ್ಯವಿಲ್ಲ ಎಂದು ನ್ಯಾಯಾಲಯ ಸ್ಪಷ್ಟಪಡಿಸಿದೆ.

ಹೀಗಾಗಿ ಕಲಾವತಿ ದೇವಿ ಸಲ್ಲಿಸಿದ್ದ ಹೆಬಿಯಸ್ ಕಾರ್ಪಸ್ ಅರ್ಜಿಯನ್ನು ಹೈಕೋರ್ಟ್ ವಜಾಗೊಳಿಸಿತು. ಜೊತೆಗೆ, ಪೂಜಾ ಮೇಜರ್ ಹಾಗೂ ಸಮರ್ಥ ವ್ಯಕ್ತಿಯಾಗಿರುವುದರಿಂದ ತಾನು ಬಯಸುವ ಸ್ಥಳದಲ್ಲಿ ಮತ್ತು ತಾನು ಬಯಸುವ ವ್ಯಕ್ತಿಯೊಂದಿಗೆ ವಾಸಿಸುವ ಸ್ವಾತಂತ್ರ್ಯ ಹೊಂದಿದ್ದಾಳೆ ಎಂದು ನ್ಯಾಯಾಲಯ ತಿಳಿಸಿದೆ.