ಕರ್ನಾಟಕ ಆರೋಗ್ಯ ಸಂಜೀವಿನಿ ಯೋಜನೆ (KASS) ಯಿಂದ ಒಳಗುಳಿದ ಅಥವಾ ಹೊರಗುಳಿಯಲು ಇಚ್ಛಿಸುವ ಸರ್ಕಾರಿ ನೌಕರರಿಗೆ ಮತ್ತು ಡಿಡಿಒಗಳಿಗೆ ಮಾನವ ಸಂಪನ್ಮೂಲ ನಿರ್ವಹಣಾ ವ್ಯವಸ್ಥೆ (HRMS) ತಂತ್ರಾಂಶದಲ್ಲಿ ಅನುಸರಿಸಬೇಕಾದ ಮಾರ್ಗಸೂಚಿಗಳನ್ನು ಸರ್ಕಾರ ಬಿಡುಗಡೆ ಮಾಡಿದೆ.
ರಾಜ್ಯ ಸರ್ಕಾರಿ ನೌಕರರಿಗಾಗಿ ಜಾರಿಗೆ ತರಲಾಗಿರುವ ‘ಕರ್ನಾಟಕ ಆರೋಗ್ಯ ಸಂಜೀವಿನಿ’ (KASS) ಯೋಜನೆಯಡಿ ದಾಖಲಾತಿ ಪಡೆಯಲು ಅಥವಾ ಅನಿವಾರ್ಯ ಕಾರಣಗಳಿಂದ ಯೋಜನೆಯಿಂದ ಹೊರಗುಳಿಯಲು (Opt-Out) ಬಯಸುವ ನೌಕರರಿಗಾಗಿ ಆರ್ಥಿಕ ಇಲಾಖೆಯು ಅಧಿಕೃತ ಮಾರ್ಗಸೂಚಿಯನ್ನು ಬಿಡುಗಡೆ ಮಾಡಿದೆ.
ಫೆಬ್ರವರಿ 2, 2026 ರಂದು ಹೊರಡಿಸಲಾದ ಈ ಹೊಸ ಸುತ್ತೋಲೆಯು HRMS 2.0 ತಂತ್ರಾಂಶದ ಮೂಲಕ ಪ್ರಕ್ರಿಯೆಯನ್ನು ಪೂರ್ಣಗೊಳಿಸಲು ನೌಕರರಿಗೆ ಮತ್ತು ಡಿಡಿಒ (DDO) ಗಳಿಗೆ ಸ್ಪಷ್ಟ ನಿರ್ದೇಶನ ನೀಡಿದೆ.
ಯೋಜನೆಯಿಂದ ಹೊರಗುಳಿಯಲು (Opt-Out) ಇರಬೇಕಾದ ಅರ್ಹತೆಗಳು:
ಕೆಳಗಿನ ಸಂದರ್ಭಗಳಲ್ಲಿ ಮಾತ್ರ ನೌಕರರು ಯೋಜನೆಯಿಂದ ಹೊರಗುಳಿಯಲು ಅವಕಾಶವಿದೆ:
- ಈಗಾಗಲೇ ರಾಜ್ಯ ಸರ್ಕಾರದ ಇತರೆ ಯಾವುದೇ ಆರೋಗ್ಯ ಯೋಜನೆಯ ಫಲಾನುಭವಿಯಾಗಿದ್ದರೆ.
- ಕೇಂದ್ರ ಸರ್ಕಾರದ ಆರೋಗ್ಯ ಯೋಜನೆ (CGHS) ವ್ಯಾಪ್ತಿಗೆ ಒಳಪಟ್ಟಿದ್ದರೆ.
- ನೌಕರರ ಸಂಗಾತಿಯು (Spouse) ಈಗಾಗಲೇ ರಾಜ್ಯ ಅಥವಾ ಕೇಂದ್ರ ಸರ್ಕಾರದ ಆರೋಗ್ಯ ಯೋಜನೆಯ ಸೌಲಭ್ಯ ಪಡೆಯುತ್ತಿದ್ದರೆ.
- ಇತರೆ ಯಾವುದೇ ಬಲವಾದ ಕಾರಣಗಳಿದ್ದರೆ ಅದನ್ನು ರಿಮಾರ್ಕ್ಸ್ (Remarks) ಕಾಲಂನಲ್ಲಿ ನಮೂದಿಸಬೇಕು.
ನೋಂದಣಿ ಮತ್ತು ಅನುಮೋದನೆ ಪ್ರಕ್ರಿಯೆ:
- ಲಾಗಿನ್: ನೌಕರರು ಅಥವಾ ಡಿಡಿಒಗಳು HRMS ಪೋರ್ಟಲ್ (https://hrms.karnataka.gov.in) ಮೂಲಕ ಲಾಗಿನ್ ಆಗಬೇಕು.
- ಮಾಹಿತಿ ಸಲ್ಲಿಕೆ: ಸರ್ವಿಸ್ ರಿಜಿಸ್ಟರ್ ಅಡಿಯಲ್ಲಿ ‘Family Dependent Entry Form’ ಆಯ್ಕೆ ಮಾಡಿ, ಕೆಜಿಐಡಿ (KGID) ಸಂಖ್ಯೆ ನಮೂದಿಸಿ ಅವಲಂಬಿತರ ವಿವರಗಳನ್ನು ಅಪ್ಲೋಡ್ ಮಾಡಬೇಕು.
- ಆಧಾರ್ ದೃಢೀಕರಣ: UIDAI ಮೂಲಕ ಆಧಾರ್ ಸಂಖ್ಯೆಯನ್ನು ಕಡ್ಡಾಯವಾಗಿ ದೃಢೀಕರಿಸಬೇಕು.
- ದಾಖಲೆಗಳ ಅಪ್ಲೋಡ್: ನೌಕರರ ಮತ್ತು ಡಿಡಿಒಗಳ ಸಹಿ ಇರುವ ಘೋಷಣಾ ಪತ್ರವನ್ನು (Declaration Document) ಪಿಡಿಎಫ್ ರೂಪದಲ್ಲಿ ಅಪ್ಲೋಡ್ ಮಾಡುವುದು ಕಡ್ಡಾಯ.
- ಡಿಜಿಟಲ್ ಸಹಿ ಅಥವಾ ಒಟಿಪಿ: ಡಿಡಿಒಗಳು ಈ ಅರ್ಜಿಗಳನ್ನು ಡಿಜಿಟಲ್ ಸಹಿ (DSC) ಅಥವಾ ಮೊಬೈಲ್ಗೆ ಬರುವ ಒಟಿಪಿ (OTP) ಮೂಲಕ ಅನುಮೋದಿಸಬಹುದು.
ಪ್ರಮುಖ ಸೂಚನೆ:
ಯೋಜನೆಯಿಂದ ಹೊರಗುಳಿಯಲು ಬಯಸುವ ನೌಕರರು ದೃಢೀಕರಣ ಪ್ರಮಾಣ ಪತ್ರವನ್ನು ಅಪ್ಲೋಡ್ ಮಾಡುವುದು ಅವಶ್ಯಕ. ಯಶಸ್ವಿಯಾಗಿ ಪ್ರಕ್ರಿಯೆ ಮುಗಿಸಿದ ನಂತರ ನೌಕರರು ತಮ್ಮ ಸ್ಥಿತಿಯನ್ನು ‘Opted-Out’ ಎಂದು ವರದಿಯಲ್ಲಿ ವೀಕ್ಷಿಸಬಹುದು.
