ವಿಶ್ವದ ಅತಿದೊಡ್ಡ ಟೆಕ್ ದೈತ್ಯ ಗೂಗಲ್ನ ಮಾತೃಸಂಸ್ಥೆ ಆಲ್ಫಾಬೆಟ್ ತನ್ನ ಸಿಇಒ ಸುಂದರ್ ಪಿಚೈ ಅವರಿಗೆ ಮುಂದಿನ ಮೂರು ವರ್ಷಗಳ ಅವಧಿಗೆ ಬರೋಬ್ಬರಿ 692 ಮಿಲಿಯನ್ ಡಾಲರ್ (ಸುಮಾರು ₹5,750 ಕೋಟಿ) ವರೆಗಿನ ಬೃಹತ್ ಸಂಭಾವನೆ ಪ್ಯಾಕೇಜ್ ಘೋಷಿಸಿದೆ. ಆದರೆ ಈ ಪೂರ್ತಿ ಹಣ ಅವರ ಕೈ ಸೇರಬೇಕಾದರೆ ಅವರು ಕೆಲವು ಕಠಿಣ ಗುರಿಗಳನ್ನು ತಲುಪಬೇಕಿದೆ.ಈ ಮೂಲಕ ಅವರು ಜಾಗತಿಕವಾಗಿ ಅತಿ ಹೆಚ್ಚು ಸಂಭಾವನೆ ಪಡೆಯುವ ಅಧಿಕಾರಿಗಳಲ್ಲಿ ಒಬ್ಬರಾಗಿದ್ದಾರೆ.
ಪಿಚೈ ಅವರ ವಾರ್ಷಿಕ ವೇತನ $2 ಮಿಲಿಯನ್ (ಸುಮಾರು ₹16.6 ಕೋಟಿ) ಆಗಿರಲಿದೆ.ಪರ್ಫಾರ್ಮೆನ್ಸ್ ಸ್ಟಾಕ್ ಯೂನಿಟ್ಸ್ ಇವುಗಳ ಒಟ್ಟು ಮೌಲ್ಯ $126 ಮಿಲಿಯನ್ ಆಗಿದ್ದು, ಇವುಗಳನ್ನು ಎರಡು ಕಂತುಗಳಲ್ಲಿ ನೀಡಲಾಗುತ್ತದೆ. ಆಲ್ಫಾಬೆಟ್ನ ಷೇರು ಮಾರುಕಟ್ಟೆ ಪ್ರದರ್ಶನವು ಎಸ್ ಅಂಡ್ ಪಿ 100 (S&P 100) ಸೂಚ್ಯಂಕಕ್ಕಿಂತ ಉತ್ತಮವಾಗಿದ್ದರೆ, ಈ ಮೊತ್ತವು $252 ಮಿಲಿಯನ್ ವರೆಗೆ ದುಪ್ಪಟ್ಟಾಗಬಹುದು. ಒಂದು ವೇಳೆ ಗುರಿ ತಲುಪದಿದ್ದರೆ ಇದು ಶೂನ್ಯವಾಗುವ ಸಾಧ್ಯತೆಯೂ ಇದೆ.
ಸುಮಾರು $84 ಮಿಲಿಯನ್ ಮೌಲ್ಯದ ಷೇರುಗಳು ಮುಂದಿನ ಮೂರು ವರ್ಷಗಳಲ್ಲಿ ಮಾಸಿಕ ಆಧಾರದ ಮೇಲೆ ಅವರಿಗೆ ಹಸ್ತಾಂತರವಾಗಲಿವೆ.ಈ ಪ್ಯಾಕೇಜ್ನ ಹೈಲೈಟ್ ಎಂದರೆ ಆಲ್ಫಾಬೆಟ್ನ ಸ್ವಯಂಚಾಲಿತ ಕಾರು ಸಂಸ್ಥೆ ವೇಯ್ಮೋ ಮತ್ತು ಡ್ರೋನ್ ಸಂಸ್ಥೆ ವಿಂಗ್. ಈ ಸಂಸ್ಥೆಗಳು ನಿಗದಿತ ಗುರಿ ತಲುಪಿದರೆ ಮಾತ್ರ ಅವರಿಗೆ 175 ಮಿಲಿಯನ್ ಡಾಲರ್ ಹೆಚ್ಚುವರಿ ಮೊತ್ತ ಸಿಗಲಿದೆ. ಒಂದು ವೇಳೆ ಈ ಸಂಸ್ಥೆಗಳು ಸೋತರೆ, ಪಿಚೈ ಅವರಿಗೆ ಈ ವಿಭಾಗದಲ್ಲಿ ಶೂನ್ಯ ಸಂಭಾವನೆ ಸಿಗಲಿದೆ.
ತಮಿಳುನಾಡಿನ ಮಧುರೈನ ಮಧ್ಯಮ ವರ್ಗದ ಕುಟುಂಬದಲ್ಲಿ ಜನಿಸಿದ ಪಿಚೈ ಅವರ ಸಾಧನೆ ಅದ್ಭುತ. ಅವರ ತಂದೆಯ ಇಡೀ ವರ್ಷದ ಸಂಬಳ ಪಿಚೈ ಅವರ ವಿಮಾನದ ಟಿಕೆಟ್ ದರಕ್ಕಿಂತಲೂ ಕಡಿಮೆಯಿತ್ತು. ಆದರೆ ಇಂದು ಅವರು $1.6 ಬಿಲಿಯನ್ (₹13,300 ಕೋಟಿ) ಒಟ್ಟು ಆಸ್ತಿ ಹೊಂದಿದ್ದಾರೆ.ಕಂಪನಿಯ ಸ್ಥಾಪಕರಲ್ಲದಿದ್ದರೂ ಕೇವಲ ವೃತ್ತಿಪರ ಸಿಇಒ ಆಗಿ ಕಾರ್ಯನಿರ್ವಹಿಸಿ ಬಿಲಿಯನೇರ್ ಆದ ವಿಶ್ವದ ಕೆಲವೇ ವ್ಯಕ್ತಿಗಳಲ್ಲಿ ಸುಂದರ್ ಪಿಚೈ ಒಬ್ಬರು.
ಪಿಚೈ ಶ್ರೀಮಂತರಾಗಿದ್ದರೂ, ಕಂಪನಿಗಳ ಸ್ಥಾಪಕರಾದ ಇತರ ಸಿಇಒಗಳಿಗೆ ಹೋಲಿಸಿದರೆ ಅವರ ಆಸ್ತಿ ಕಡಿಮೆ ಇದೆ:
ಎಲಾನ್ ಮಸ್ಕ್: $300 ಬಿಲಿಯನ್+
ಮಾರ್ಕ್ ಜುಕರ್ಬರ್ಗ್: $200 ಬಿಲಿಯನ್+
ಸುಂದರ್ ಪಿಚೈ: $1.6 ಬಿಲಿಯನ್
