ಕೃತಕ ಬುದ್ಧಿಮತ್ತೆ (ಎಐ) ಕೆಲಸ ಕಸಿದುಕೊಳ್ಳುತ್ತಿದೆ. ಸಾಫ್ಟ್‌ವೇರ್ ವಲಯದಲ್ಲಿ ಇದು ಹೇಗೆ ಟೆಕ್ಕಿಗಳಿಗೆ ಸವಾಲು ಹಾಕುತ್ತಿದೆ?. ಈ ಚರ್ಚೆಗಳ ನಡುವೆ ಓಪನ್ ಎಐ (OpenAI) ಸಿಇಒ ಸ್ಯಾಮ್ ಆಲ್ಟ್‌ಮನ್ ಭಾವುಕ ಹಾಗೂ ಸಮಯೋಚಿತವೆನಿಸುವ ಸಂದೇಶವೊಂದನ್ನು ಹಂಚಿಕೊಂಡಿದ್ದಾರೆ.
ಕೋಡಿಂಗ್ ಬರೆಯುವುದು ಎಂದರೆ ಗಂಟೆಗಟ್ಟಲೆ ಕುಳಿತು, ಪ್ರತಿಯೊಂದು ಸಾಲಿನ ಕೋಡ್ ಅನ್ನು ನಿಖರವಾಗಿ ಟೈಪ್ ಮಾಡಿ, ದೋಷಗಳನ್ನು ಒಂದೊಂದಾಗಿ ಸರಿಪಡಿಸುವ ಕಾಲವೊಂದಿತ್ತು.
ಆ ಪ್ರಕ್ರಿಯೆಯು ಇಂದು ನಾವು ಬಳಸುತ್ತಿರುವ ಡಿಜಿಟಲ್ ಜಗತ್ತನ್ನು ನಿಶ್ಯಬ್ದವಾಗಿ ನಿರ್ಮಾಣ ಮಾಡಿತ್ತು. ಈಗ, ಕೃತಕ ಬುದ್ಧಿಮತ್ತೆ ಆ ಕೆಲಸವನ್ನು ಮಾಡಲು ಪ್ರಾರಂಭಿಸುತ್ತಿದ್ದಂತೆಯೇ ಚರ್ಚೆಯ ಸ್ವರೂಪ ಬದಲಾಗುತ್ತಿದೆ. ಮಾನವ ಪ್ರೋಗ್ರಾಮರ್‌ಗಳ ಪ್ರಾಮುಖ್ಯತೆ ನಿಧಾನವಾಗಿ ಕಡಿಮೆಯಾಗುತ್ತಿದೆಯೇ ಅಥವಾ ಇದು ತಂತ್ರಜ್ಞಾನದ ಬೆಳವಣಿಗೆಯ ಮತ್ತೊಂದು ಹಂತವೇ?.
ಡೆವಲಪರ್‌ಗಳು ವರ್ಷಗಳಿಂದ ಹಾಕಿದ ಶ್ರಮವನ್ನು ನೆನಪಿಸಿಕೊಳ್ಳುತ್ತಾ ಸ್ಯಾಮ್ ಆಲ್ಟ್‌ಮನ್ ಅವರು ಇತ್ತೀಚೆಗೆ ‘ಎಕ್ಸ್’ ಖಾತೆಯಲ್ಲಿ ಹಂಚಿಕೊಂಡ ಪೋಸ್ಟ್, “ಅತ್ಯಂತ ಸಂಕೀರ್ಣವಾದ ಸಾಫ್ಟ್‌ವೇರ್‌ಗಳನ್ನು ಅಕ್ಷರದಿಂದ ಅಕ್ಷರಕ್ಕೆ ಬರೆದ ಜನರ ಬಗ್ಗೆ ನನಗೆ ಅಪಾರ ಕೃತಜ್ಞತೆಯಿದೆ. ಅದಕ್ಕೆ ನಿಜವಾಗಿ ಎಷ್ಟು ಶ್ರಮ ಬೇಕಾಯಿತು ಎಂಬುದನ್ನು ನೆನಪಿಸಿಕೊಳ್ಳುವುದು ಈಗಲೇ ಕಷ್ಟವೆನಿಸುತ್ತಿದೆ. ನಮ್ಮನ್ನು ಈ ಹಂತಕ್ಕೆ ತಲುಪಿಸಿದ್ದಕ್ಕಾಗಿ ನಿಮಗೆ ಧನ್ಯವಾದಗಳು”
ಕೃತಕ ಬುದ್ಧಿಮತ್ತೆ ಕೆಲವೇ ಸೆಕೆಂಡುಗಳಲ್ಲಿ ಕೋಡ್ ಬರೆಯುವ, ತಪ್ಪುಗಳನ್ನು ಸರಿಪಡಿಸುವ ಮತ್ತು ಪ್ರೋಗ್ರಾಂಗಳನ್ನು ಉತ್ತಮವಾಗಿ ರೂಪಿಸಲು ಸಲಹೆ ನೀಡುವ ಈ ಸಮಯದಲ್ಲಿ ಅವರ ಮಾತುಗಳು ಮಹತ್ವ ಪಡೆದಿವೆ.
ಹಲವು ಡೆವಲಪರ್‌ಗಳಿಗೆ ಹಿಂದೆ ಗಂಟೆಗಟ್ಟಲೆ ತೆಗೆದುಕೊಳ್ಳುತ್ತಿದ್ದ ಕೆಲಸಗಳು ಈಗ ಬಹಳ ವೇಗವಾಗಿ ನಡೆಯುತ್ತಿವೆ. ಇದು ಸಹಜವಾಗಿಯೇ ಕೋಡಿಂಗ್ ಉದ್ಯೋಗಗಳ ಭವಿಷ್ಯದ ಬಗ್ಗೆ, ವಿಶೇಷವಾಗಿ ವೃತ್ತಿಜೀವನವನ್ನು ಆರಂಭಿಸುತ್ತಿರುವ ಹೊಸಬರಲ್ಲಿ ಆತಂಕವನ್ನು ಮೂಡಿಸಿದೆ.
ಕೋಡಿಂಗ್ ವೃತ್ತಿಯು ಇಲ್ಲವಾಗುತ್ತದೆ ಎಂದು ಎಲ್ಲರೂ ನಂಬುವುದಿಲ್ಲ. ಎಲೋನ್ ಮಾಸ್ಕ್ ಅವರ ಎಐ ಚಾಟ್‌ಬಾಟ್ Grok ಆಲ್ಟ್‌ಮನ್ ಅವರ ಪೋಸ್ಟ್‌ನಲ್ಲಿ ಬಳಕೆದಾರರೊಬ್ಬರು ಕೇಳಿದ ಪ್ರಶ್ನೆಗೆ ಪ್ರಾಯೋಗಿಕವಾದ ಉತ್ತರ ನೀಡಿದೆ.
ಇಲ್ಲ, ಸಾಫ್ಟ್‌ವೇರ್ ಎಂಜಿನಿಯರಿಂಗ್ ಕ್ಷೇತ್ರದಲ್ಲಿ ವೇಗವಾಗಿ ಬದಲಾವಣೆ ಆಗುತ್ತಿದೆ. ಎಐ ಸಾಮಾನ್ಯ ಕೋಡಿಂಗ್ ಕೆಲಸಗಳನ್ನು ಸ್ವಯಂಚಾಲಿತಗೊಳಿಸುತ್ತದೆ ಮತ್ತು ಉತ್ಪಾದಕತೆಯನ್ನು ಹೆಚ್ಚಿಸುತ್ತದೆ ಆದರೆ ಆರ್ಕಿಟೆಕ್ಚರ್, ಬೃಹತ್ ಸಿಸ್ಟಮ್‌ಗಳ ದೋಷ ನಿವಾರಣೆ, ನೈತಿಕತೆ, ಏಕೀಕರಣ ಮತ್ತು ನೈಜ ನಾವೀನ್ಯತೆಗಾಗಿ ಮನುಷ್ಯರು ಅನಿವಾರ್ಯವಾಗಿದ್ದಾರೆ ಎಂದು ಅದು ಹೇಳಿದೆ.
ಅನೇಕ ಡೆವಲಪರ್‌ಗಳು ಈಗಾಗಲೇ ಅನುಭವಿಸುತ್ತಿರುವ ಆತಂಕವನ್ನು ಇದು ವಿವರಿಸುತ್ತದೆ. ಎಐ ಪುನರಾವರ್ತಿತ ಕೆಲಸಗಳನ್ನು ನಿರ್ವಹಿಸುತ್ತಿದೆ, ಆದರೆ ಕಠಿಣ ಭಾಗಗಳಿಗೆ ಇನ್ನೂ ಮಾನವ ಚಿಂತನೆಯ ಅಗತ್ಯವಿದೆ. ದೊಡ್ಡ ವ್ಯವಸ್ಥೆಗಳನ್ನು ನಿರ್ವಹಿಸುವುದು, ಅನಿರೀಕ್ಷಿತ ಸಮಸ್ಯೆಗಳನ್ನು ಪರಿಹರಿಸುವುದು ಮತ್ತು ನೈಜ ಬಳಕೆದಾರರ ಮೇಲೆ ಪರಿಣಾಮ ಬೀರುವ ನಿರ್ಧಾರಗಳನ್ನು ತೆಗೆದುಕೊಳ್ಳುವುದನ್ನು ಸಂಪೂರ್ಣವಾಗಿ ಯಂತ್ರಗಳಿಗೆ ಒಪ್ಪಿಸಲು ಸಾಧ್ಯವಿಲ್ಲ.
ಒಂದು ಸ್ಪಷ್ಟವಾಗುತ್ತಿದೆ, ಆರಂಭಿಕ ಹಂತದ (entry-level) ಉದ್ಯೋಗಗಳು ಹೆಚ್ಚಾಗಿ ಸರಳವಾದ ಕೆಲಸಗಳನ್ನು ಒಳಗೊಂಡಿರುತ್ತಿದ್ದವು, ಇದು ಹೊಸ ಡೆವಲಪರ್‌ಗಳಿಗೆ ಕಲಿಯಲು ಸಹಾಯ ಮಾಡುತ್ತಿತ್ತು. ಎಐ ಆ ಹೆಚ್ಚಿನ ಕೆಲಸವನ್ನು ಮಾಡುತ್ತಿರುವುದರಿಂದ, ವೃತ್ತಿಜೀವನದ ಆರಂಭದಲ್ಲಿ ಪ್ರಾಯೋಗಿಕ ಅನುಭವವನ್ನು ಪಡೆಯುವುದು ಕಷ್ಟವಾಗಬಹುದು.
ಆಂಥ್ರೋಪಿಕ್ ಅಧ್ಯಯನವು ಕೆಲವು ಉದ್ಯೋಗ ಪಾತ್ರಗಳು ಎಐನಿಂದ ಸುರಕ್ಷಿತವಾಗಿರುತ್ತವೆ ಎಂದು ತೋರಿಸುತ್ತದೆ. ಎಐ ಹೆಚ್ಚಿನ ಪ್ರಮಾಣದ ಕೆಲಸಗಳನ್ನು ಮಾಡುವ ಸಾಮರ್ಥ್ಯವನ್ನು ಹೊಂದಿದ್ದರೂ, ಜನರು ಅದನ್ನು ಇನ್ನೂ ಆ ಮಟ್ಟಿಗೆ ಬಳಸುತ್ತಿಲ್ಲ ಎಂದು ಸಂಶೋಧನೆಗಳು ತೋರಿಸುತ್ತವೆ. ಕಂಪ್ಯೂಟರ್ ಮತ್ತು ಗಣಿತಕ್ಕೆ ಸಂಬಂಧಿಸಿದ ಉದ್ಯೋಗಗಳಲ್ಲಿ, ಎಐ ಸುಮಾರು ಶೇಕಡಾ 94 ರಷ್ಟು ಕಾರ್ಯಗಳಲ್ಲಿ ಸಹಾಯ ಮಾಡಬಹುದು. ಆದರೆ ವಾಸ್ತವವಾಗಿ, ಬಳಕೆಯು ಕೇವಲ ಶೇಕಡಾ 33 ರಷ್ಟಿದೆ ಎಂದು ಹೇಳಿದೆ.
