ಭಾರತದ ಅತಿದೊಡ್ಡ ಇ-ಕಾಮರ್ಸ್ ಸಂಸ್ಥೆಯಾದ ಫ್ಲಿಪ್ಕಾರ್ಟ್ (Flipkart), ತನ್ನ ವಾರ್ಷಿಕ ಕಾರ್ಯಕ್ಷಮತೆಯ ಮೌಲ್ಯಮಾಪನ ಪ್ರಕ್ರಿಯೆಯ ಭಾಗವಾಗಿ ಸುಮಾರು 300 ಉದ್ಯೋಗಿಗಳನ್ನು ಕೆಲಸದಿಂದ ವಜಾಗೊಳಿಸಿದೆ. ಇದು ಕಂಪನಿಯ ಒಟ್ಟು ಕಾರ್ಯಪಡೆಯ ಸುಮಾರು ಶೇ. 1.5 ರಷ್ಟು ಭಾಗವಾಗಿದೆ.
ವಜಾಕ್ಕೆ ಕಾರಣವೇನು?
ವರದಿಗಳ ಪ್ರಕಾರ ಇದು ಕಂಪನಿಯ ಹಠಾತ್ ನಿರ್ಧಾರವಲ್ಲ. ಪ್ರತಿ ವರ್ಷ ನಡೆಯುವ ಪರ್ಫಾರ್ಮೆನ್ಸ್ ರಿವ್ಯೂ (Performance Review) ನಲ್ಲಿ ಕಡಿಮೆ ಅಂಕ ಅಥವಾ ಕಡಿಮೆ ಪ್ರದರ್ಶನ (Lower performance bands) ನೀಡಿದ ಉದ್ಯೋಗಿಗಳನ್ನು ಈ ಬಾರಿ ಕೈಬಿಡಲಾಗಿದೆ. ಕಳೆದ ವರ್ಷವೂ (2024) ಫ್ಲಿಪ್ಕಾರ್ಟ್ ಇದೇ ರೀತಿ ಸುಮಾರು 1,000 ಜನರನ್ನು (5%) ವಜಾಗೊಳಿಸಿತ್ತು ಎಂಬುದು ಗಮನಾರ್ಹ.
ಸ್ಪಷ್ಟ ನಿರೀಕ್ಷೆಗಳಿಗೆ ಅನುಗುಣವಾಗಿ ನಾವು ನಿಯಮಿತವಾಗಿ ಕಾರ್ಯಕ್ಷಮತೆಯನ್ನು ಪರಿಶೀಲಿಸುತ್ತೇವೆ. ಇದರ ಭಾಗವಾಗಿ ಸಣ್ಣ ಶೇಕಡಾವಾರು ಉದ್ಯೋಗಿಗಳು ಸಂಸ್ಥೆಯಿಂದ ಹೊರಹೋಗಬಹುದು. ಅವರಿಗೆ ಅಗತ್ಯ ಬೆಂಬಲವನ್ನು ನಾವು ನೀಡುತ್ತಿದ್ದೇವೆ ಎಂದು ಫ್ಲಿಪ್ಕಾರ್ಟ್ ವಕ್ತಾರರು ತಿಳಿಸಿದ್ದಾರೆ.ಕಳೆದ ವರ್ಷ (2024ರ ಆರಂಭದಲ್ಲಿ) ಕಂಪನಿಯು ಇದೇ ರೀತಿ ಸುಮಾರು 1,000 ಉದ್ಯೋಗಿಗಳನ್ನು (ಶೇ. 5 ರಷ್ಟು) ವಜಾಗೊಳಿಸಿತ್ತು.
ಐಪಿಒ (IPO) ಕಡೆಗೆ ಫ್ಲಿಪ್ಕಾರ್ಟ್ ಚಿತ್ತ
ಉದ್ಯೋಗಿಗಳ ವಜಾ ಒಂದು ಕಡೆಯಾದರೆ, ಕಂಪನಿಯು ದೊಡ್ಡ ಮಟ್ಟದ ಸಾರ್ವಜನಿಕ ಷೇರು ಬಿಡುಗಡೆಗೆ (IPO) ತಯಾರಿ ನಡೆಸುತ್ತಿದೆ.ಅಂದಾಜಿನ ಪ್ರಕಾರ 2027 ರ ಆರಂಭದ ವೇಳೆಗೆ ಕಂಪನಿಯು ಪಟ್ಟಿಯಾಗುವ ಗುರಿ ಹೊಂದಿದೆ.ರಿವರ್ಸ್ ಫ್ಲಿಪ್ (Reverse Flip): ತೆರಿಗೆ ಮತ್ತು ನಿಯಮಗಳ ಸುಲಭೀಕರಣಕ್ಕಾಗಿ ತನ್ನ ಕೇಂದ್ರ ಕಚೇರಿಯನ್ನು ಸಿಂಗಾಪುರದಿಂದ ಮರಳಿ ಭಾರತಕ್ಕೆ ತರಲು NCLT ಯಿಂದ ಅನುಮೋದನೆ ಪಡೆದಿದೆ.
ಫ್ಲಿಪ್ಕಾರ್ಟ್ ಭಾರತದಲ್ಲಿ ಸಾರ್ವಜನಿಕವಾಗಿ ಪಟ್ಟಿಯಾಗಲು (Listing) ಸಿದ್ಧತೆ ನಡೆಸುತ್ತಿದೆ. ಇದಕ್ಕಾಗಿ ಗೋಲ್ಡ್ಮನ್ ಸ್ಯಾಚ್ಸ್, ಮೋರ್ಗನ್ ಸ್ಟಾನ್ಲಿ ಮತ್ತು ಜೆಪಿ ಮೋರ್ಗನ್ನಂತಹ ಪ್ರಮುಖ ಹೂಡಿಕೆ ಬ್ಯಾಂಕುಗಳೊಂದಿಗೆ ಮಾತುಕತೆ ನಡೆಸುತ್ತಿದೆ.
ವಾಲ್ಮಾರ್ಟ್ ಒಡೆತನದ ಫ್ಲಿಪ್ಕಾರ್ಟ್ ಭಾರತದಲ್ಲಿ ಅಮೆಜಾನ್ಗೆ ಪ್ರಬಲ ಪೈಪೋಟಿ ನೀಡುತ್ತಿದೆ. ವ್ಯವಹಾರ ವಿಸ್ತರಣೆಯೇ ಸದ್ಯದ ಆದ್ಯತೆ ಎಂದು ಸಿಇಒ ಕಲ್ಯಾಣ್ ಕೃಷ್ಣಮೂರ್ತಿ ಹೇಳಿದ್ದಾರಾದರೂ ಲಾಭದತ್ತ ಮುಖ ಮಾಡಲು ಇಂತಹ ಕಠಿಣ ನಿರ್ಧಾರಗಳನ್ನು ಕಂಪನಿ ತೆಗೆದುಕೊಳ್ಳುತ್ತಿದೆ ಎಂದು ವಿಶ್ಲೇಷಿಸಲಾಗುತ್ತಿದೆ.
2018 ರಲ್ಲಿ ಅಮೆರಿಕದ ರಿಟೇಲ್ ದೈತ್ಯ ವಾಲ್ಮಾರ್ಟ್ (Walmart) ಫ್ಲಿಪ್ಕಾರ್ಟ್ ಅನ್ನು ತನ್ನ ತೆಕ್ಕೆಗೆ ತೆಗೆದುಕೊಂಡಿತ್ತು. ಪ್ರಸ್ತುತ ಕಂಪನಿಯು 20,000 ಕ್ಕೂ ಹೆಚ್ಚು ಉದ್ಯೋಗಿಗಳನ್ನು ಹೊಂದಿದ್ದು 2026 ರ ಅಂತ್ಯ ಅಥವಾ 2027 ರ ಆರಂಭದ ವೇಳೆಗೆ ಐಪಿಒ ಹೊರತರುವ ಗುರಿಯನ್ನು ಹೊಂದಿದೆ.
