ಕಂಗನಾ ರಣಾವತ್​ ಟ್ವಿಟರ್​ ಅಮಾನತಿಗೆ ಕೋರಿ ಹೈಕೋರ್ಟ್​ಗೆ ಅರ್ಜಿ

ಬಾಲಿವುಡ್​ ನಟಿ ಕಂಗನಾ ರಣಾವತ್​ರ ಟ್ವಿಟರ್​ ಖಾತೆಯನ್ನ ಶಾಶ್ವತವಾಗಿ ಅಮಾನತು ಮಾಡಬೇಕೆಂದು ಕೋರಿ ದೆಹಲಿ ಹೈಕೋರ್ಟ್ ಗೆ ಹೊಸ ಅರ್ಜಿಯೊಂದು ಸಲ್ಲಿಕೆಯಾಗಿದೆ.

ಕಂಗನಾ ಸಹೋದರಿ ರಂಗೋಲಿ ಟ್ವಿಟರ್​ ಖಾತೆಯನ್ನ ಈ ವರ್ಷ ಅಮಾನತುಗೊಳಿಸಿದಂತೆಯೇ ಕಂಗಾನರ ಟ್ವಿಟರ್​ ಖಾತೆಯನ್ನೂ ಅಮಾನತು ಮಾಡಿ ಎಂದು ಅರ್ಜಿಯಲ್ಲಿ ಮನವಿ ಮಾಡಲಾಗಿದೆ.

ಕಂಗನಾ ರಣಾವತ್​ ಪೋಸ್ಟ್​​ಗಳು ದೇಶದ ಜನರಲ್ಲಿ ನಿರಂತರ ದ್ವೇಷ, ಅಸಮಾನತೆಯನ್ನ ಹುಟ್ಟು ಹಾಕುತ್ತಿವೆ. ಆಕೆ ತನ್ನ ಉಗ್ರಗಾಮಿ ಟ್ವೀಟ್​ ಮೂಲಕ ದೇಶವನ್ನ ವಿಭಜಿಸಲು ಹೊರಟಿದ್ದಾಳೆ. ಇದು ಮಾತ್ರವಲ್ಲದೇ ದೇಶದ ನ್ಯಾಯಾಂಗವನ್ನ ಪಪ್ಪುಸೇನೆ ಎಂದು ಅವಮಾನಿಸಿದ್ದಾಳೆ ಎಂದು ಅರ್ಜಿಯಲ್ಲಿ ನಮೂದಿಸಲಾಗಿದೆ.

ಅರ್ಜಿದಾರ ಈ ಎಲ್ಲಾ ವಿಚಾರದ ಬಗ್ಗೆ ಮುಂಬೈನ ಅಂಧೇರಿ ಪೊಲೀಸ್​ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ಅಕ್ಟೋಬರ್​ನಲ್ಲಿ ಮುಂಬೈ ಮೂಲದ ವಕೀಲ ಅಲಿ ಕಾಶಿಫ್​ ಖಾನ್​ ಇದೇ ವಿಚಾರವಾಗಿ ಕಂಗನಾ ವಿರುದ್ಧ ದೂರು ದಾಖಲಿಸಿದ್ದರು. ಇದೀಗ ಮತ್ತೊಮ್ಮೆ ಕಂಗನಾ ವಿರುದ್ಧ ಅಲಿ ಕಾಶಿಫ್​ ಸಮರ ಸಾರಿದ್ದಾರೆ.