ನೊಯ್ದಾದ ಸೆಕ್ಟರ್ 49ರ ಬ್ಯಾಂಕ್ವೆಟ್ ಹಾಲ್ನಲ್ಲಿ ನಡೆದ ನಿಶ್ಚಿತಾರ್ಥ ಸಮಾರಂಭವೊಂದು ಕಳ್ಳತನದ ಘಟನೆಯಿಂದಾಗಿ ಆತಂಕಕ್ಕೆ ಸಾಕ್ಷಿಯಾಗಿದೆ. ಅತಿಥಿಯ ಸೋಗಿನಲ್ಲಿ ಬಂದ ಕಳ್ಳನೊಬ್ಬ ಅತ್ಯಂತ ಚಾಣಾಕ್ಷತನದಿಂದ ಬರೋಬ್ಬರಿ 5 ಲಕ್ಷ ರೂಪಾಯಿ ನಗದು ಮತ್ತು ಬೆಲೆಬಾಳುವ ಆಭರಣಗಳಿದ್ದ ಬ್ಯಾಗ್ ಹೊತ್ತು ಪರಾರಿಯಾಗಿದ್ದಾನೆ. ಕಳ್ಳನ ಈ ಕೈಚಳಕ ಸಿಸಿಟಿವಿ ಕ್ಯಾಮೆರಾದಲ್ಲಿ ಸೆರೆಯಾಗಿದ್ದು, ನೋಡುಗರನ್ನು ಬೆಚ್ಚಿಬೀಳಿಸಿದೆ.
ಅತಿಥಿಯಂತೆ ಬಂದು ಊಟ ಮಾಡಿದ ಕಳ್ಳ! ಮಧ್ಯಾಹ್ನ ಸುಮಾರು 1 ಗಂಟೆಗೆ ಸಮಾರಂಭ ಜೋರಾಗಿ ನಡೆಯುತ್ತಿದ್ದಾಗ, ಸುಂದರವಾಗಿ ಸೂಟು ಧರಿಸಿ ಬಂದ ಯುವಕನೊಬ್ಬ ಅತಿಥಿಗಳ ನಡುವೆ ಸುಲಭವಾಗಿ ಬೆರೆತುಹೋಗಿದ್ದಾನೆ. ಯಾರೂ ಅನುಮಾನ ಪಡದ ರೀತಿಯಲ್ಲಿ ಸಂಚರಿಸಿದ ಈತ, ಮೈಮರೆತು ಊಟವನ್ನೂ ಸವಿದಿದ್ದಾನೆ. ಕುಟುಂಬದವರು ಸಂಭ್ರಮದಲ್ಲಿ ಮುಳುಗಿದ್ದಾಗ, ಹಣ ಮತ್ತು ಒಡವೆ ಇದ್ದ ಬ್ಯಾಗ್ ಮೇಲೆ ಕಣ್ಣಿಟ್ಟ ಈತ, ಸಮಯ ಸಾಧಿಸಿ ಕ್ಷಣಾರ್ಧದಲ್ಲಿ ಬ್ಯಾಗ್ ಎತ್ತಿಕೊಂಡು ಅಲ್ಲಿಂದ ಕಾಲ್ಕಿತ್ತಿದ್ದಾನೆ.
ಸಿಸಿಟಿವಿಯಲ್ಲಿ ಸೆರೆಯಾಯ್ತು ಕಳ್ಳಾಟ ಬ್ಯಾಗ್ ನಾಪತ್ತೆಯಾದ ವಿಷಯ ತಿಳಿದ ಕುಟುಂಬದವರು ತಕ್ಷಣವೇ ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲಿಸಿದ್ದಾರೆ. ಆಗ ಸೂಟು ಧರಿಸಿದ ವ್ಯಕ್ತಿಯೊಬ್ಬ ಆರಾಮಾಗಿ ಬಂದು ಬ್ಯಾಗ್ ಕದಿಯುವ ದೃಶ್ಯ ಕಂಡುಬಂದಿದೆ. ಈತ ಮುಂಚಿತವಾಗಿಯೇ ಯೋಜಿತವಾಗಿ ಈ ಕಳ್ಳತನ ಮಾಡಿದ್ದಾನೆ ಎಂಬುದು ದೃಶ್ಯಗಳಿಂದ ಸ್ಪಷ್ಟವಾಗುತ್ತಿದೆ. ದೆಹಲಿ ಮೂಲದ ವರನ ಕಡೆಯವರು ಮತ್ತು ನೊಯ್ದಾದ ವಧುವಿನ ಕುಟುಂಬದವರು ಈ ಘಟನೆಯಿಂದ ಕಂಗಾಲಾಗಿದ್ದಾರೆ.
ಪೊಲೀಸ್ ತನಿಖೆ ಚುರುಕು ಸಂತ್ರಸ್ತ ಕುಟುಂಬವು ಸೆಕ್ಟರ್ 49ರ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದೆ. ಸಿಸಿಟಿವಿ ದೃಶ್ಯಾವಳಿಗಳ ಆಧಾರದ ಮೇಲೆ ಪೊಲೀಸರು ಆರೋಪಿಯ ಪತ್ತೆಗೆ ಜಾಲ ಬೀಸಿದ್ದಾರೆ. ಸಮಾರಂಭಗಳಲ್ಲಿ ಇಷ್ಟು ದೊಡ್ಡ ಪ್ರಮಾಣದ ಹಣ ಮತ್ತು ಒಡವೆಗಳನ್ನು ಸುರಕ್ಷತೆಯಿಲ್ಲದೆ ಇಡುವುದು ಅಪಾಯಕಾರಿ ಎಂದು ಪೊಲೀಸರು ಎಚ್ಚರಿಸಿದ್ದಾರೆ.
