ಬುನಿಯಾ: ಪೂರ್ವ ಕಾಂಗೋದಲ್ಲಿ ಎಬೋಲಾ ವೈರಸ್‌ ಸೋಂಕು ತೀವ್ರ ಸ್ವರೂಪ ಪಡೆದುಕೊಳ್ಳುತ್ತಿದೆ. ಕಳೆದ ಒಂದು ವಾರದಲ್ಲೇ 300ಕ್ಕೂ ಹೆಚ್ಚು ಮಂದಿ ಮೃತಪಟ್ಟಿದ್ದು, ಇದುವರೆಗೆ ದಾಖಲಾದ ವಾರದ ಸಾವಿನ ಸಂಖ್ಯೆಯಲ್ಲಿ ಇದು ಅತ್ಯಧಿಕ ಪ್ರಮಾಣಗಳಲ್ಲಿ ಒಂದಾಗಿದೆ.
ವೇಗವಾಗಿ ಹರಡುತ್ತಿರುವ ಈ ಸೋಂಕನ್ನು ನಿಯಂತ್ರಿಸಲು ಆರೋಗ್ಯ ಸಿಬ್ಬಂದಿ ತೀವ್ರವಾಗಿ ಶ್ರಮಿಸುತ್ತಿದ್ದಾರೆ. ಪೂರ್ವ ಕಾಂಗೋದಲ್ಲಿ ವೈರಸ್‌ ಹರಡುವಿಕೆ ನಿಯಂತ್ರಣ ಮೀರುತ್ತಿರುವ ಹಿನ್ನೆಲೆಯಲ್ಲಿ, ಮುಂಚೂಣಿಯಲ್ಲಿ ಕಾರ್ಯನಿರ್ವಹಿಸುತ್ತಿರುವ ಆರೋಗ್ಯ ಸಿಬ್ಬಂದಿಗೆ ಲಸಿಕೆ ನೀಡಲು ಸರ್ಕಾರ ಸಿದ್ಧವಾಗಿದೆ.
ಇದುವರೆಗೆ 2,642 ಮಂದಿ ಸಾವು
ಕಾಂಗೋ ಆರೋಗ್ಯ ಇಲಾಖೆಯ ಅಂಕಿಅಂಶಗಳ ಪ್ರಕಾರ, ಶನಿವಾರದ ವೇಳೆಗೆ 5,514 ಎಬೋಲಾ ಪ್ರಕರಣಗಳು ದಾಖಲಾಗಿದ್ದು, 2,642 ಮಂದಿ ಮೃತಪಟ್ಟಿದ್ದಾರೆ. ಇವರಲ್ಲಿ ಕಳೆದ ಏಳು ದಿನಗಳಲ್ಲೇ 317 ಮಂದಿ ಪ್ರಾಣ ಕಳೆದುಕೊಂಡಿದ್ದಾರೆ.
ಆದರೆ, ಸೋಂಕಿನ ಹರಡುವಿಕೆಯನ್ನು ಅಧಿಕೃತವಾಗಿ ದೃಢಪಡಿಸುವುದಕ್ಕೂ ಹಲವು ವಾರಗಳ ಮುನ್ನವೇ ಈ ರೋಗ ಕಾಣಿಸಿಕೊಂಡಿತ್ತು ಎಂದು ಕಾಂಗೋ ತಜ್ಞರು ತಿಳಿಸಿದ್ದಾರೆ. ವಾಸ್ತವಿಕ ಪ್ರಕರಣಗಳ ಸಂಖ್ಯೆ ಅಧಿಕೃತ ಅಂಕಿಅಂಶಗಳಿಗಿಂತ ಮೂರು ಪಟ್ಟು ಹೆಚ್ಚಿರಬಹುದು ಎಂದು ಅವರು ಅಂದಾಜಿಸಿದ್ದಾರೆ.
ಇದನ್ನು ಇತಿಹಾಸದಲ್ಲೇ ಅತ್ಯಂತ ವೇಗವಾಗಿ ಹರಡುತ್ತಿರುವ ಎಬೋಲಾ ಸೋಂಕು ಎಂದು ಪರಿಗಣಿಸಲಾಗುತ್ತಿದೆ. ಚಿಕಿತ್ಸೆ ಕೇಂದ್ರಗಳಿಗೆ ತಲುಪುವ ಮೊದಲೇ ಹಲವರು ಮೃತಪಟ್ಟಿದ್ದಾರೆ.
ಈ ಹಂತದಲ್ಲಿ ದಾಖಲಾಗಿರುವ ಸಾವಿನ ಪ್ರಮಾಣವು ಇತಿಹಾಸದಲ್ಲೇ ಅತಿ ಹೆಚ್ಚು ಪ್ರಾಣಹಾನಿಗೆ ಕಾರಣವಾದ 2014-16ರ ಪಶ್ಚಿಮ ಆಫ್ರಿಕಾ ಎಬೋಲಾ ಸೋಂಕಿನ ಸಾವಿನ ಪ್ರಮಾಣಕ್ಕಿಂತ ಏಳು ಪಟ್ಟು ಹೆಚ್ಚಾಗಿದೆ ಎಂದು ವರದಿ ಹೇಳಿದೆ. ಆ ಸೋಂಕಿನಲ್ಲಿ ಒಟ್ಟು 11 ಸಾವಿರಕ್ಕೂ ಹೆಚ್ಚು ಮಂದಿ ಮೃತಪಟ್ಟಿದ್ದರು.
ಪ್ರಸ್ತುತ ಸೋಂಕಿನ ಕೇಂದ್ರವಾಗಿರುವ ಇಟುರಿ ಪ್ರಾಂತ್ಯದಲ್ಲಿ ಪತ್ತೆಯಾಗುತ್ತಿರುವ ಹೊಸ ಪ್ರಕರಣಗಳ ಪೈಕಿ ಹೆಚ್ಚಿನವರು ಅಧಿಕಾರಿಗಳು ನಿಗಾದಲ್ಲಿಟ್ಟಿರುವ ಸೋಂಕಿತರ ನಿಕಟ ಸಂಪರ್ಕಿತರ ಪಟ್ಟಿಯಲ್ಲಿ ಇಲ್ಲದಿರುವುದು ಆತಂಕಕ್ಕೆ ಕಾರಣವಾಗಿದೆ.
ಎಬೋಲಾ ಸೋಂಕಿಗೆ ಒಳಗಾದವರಲ್ಲಿ ಸುಮಾರು ಅರ್ಧದಷ್ಟು, ಅಂದರೆ 47.9 ಪ್ರತಿಶತ ಮಂದಿ ಮೃತಪಟ್ಟಿದ್ದಾರೆ. ಆದರೆ ತಲುಪಲು ಕಷ್ಟವಾಗಿರುವ ಪ್ರದೇಶಗಳಲ್ಲಿ ಸಾವಿನ ಪ್ರಮಾಣ ಇನ್ನಷ್ಟು ಹೆಚ್ಚಾಗಿದೆ. ನಾರ್ತ್ ಕಿವು ಪ್ರಾಂತ್ಯದಲ್ಲಿ ಸಾವಿನ ಪ್ರಮಾಣ 68.6 ಪ್ರತಿಶತದಷ್ಟಿದೆ.
ಮೊದಲು ಆರೋಗ್ಯ ಸಿಬ್ಬಂದಿಗೆ ಲಸಿಕೆ
ಈ ಬಾರಿ ಸೋಂಕಿಗೆ ಕಾರಣವಾಗಿರುವ ಅಪರೂಪದ ಬುಂಡಿಬುಗ್ಯೋ ವೈರಸ್‌ ವಿರುದ್ಧ ಅನುಮೋದಿತ ಲಸಿಕೆ ಮತ್ತು ನಿರ್ದಿಷ್ಟ ಚಿಕಿತ್ಸೆ ಲಭ್ಯವಿಲ್ಲದಿರುವುದು ಪ್ರಮುಖ ಸವಾಲಾಗಿದೆ.
ಕಳೆದ ಶುಕ್ರವಾರ ಕಾಂಗೋಗೆ 16 ಸಾವಿರಕ್ಕೂ ಹೆಚ್ಚು ಎರ್ವೆಬೋ ಲಸಿಕೆ ಡೋಸ್‌ಗಳು ತಲುಪಿವೆ. ಈ ಲಸಿಕೆಯನ್ನು ಈ ಹಿಂದೆ ಹೆಚ್ಚು ಸಾಮಾನ್ಯವಾಗಿರುವ ಮತ್ತೊಂದು ಎಬೋಲಾ ವೈರಸ್‌ ಪ್ರಭೇದದಿಂದ ಉಂಟಾದ ಸೋಂಕುಗಳನ್ನು ನಿಯಂತ್ರಿಸಲು ಬಳಸಲಾಗಿತ್ತು.
ಬುಂಡಿಬುಗ್ಯೋ ವೈರಸ್‌ಗಾಗಿ ಅಭಿವೃದ್ಧಿಪಡಿಸಲಾಗುತ್ತಿರುವ ನಿರ್ದಿಷ್ಟ ಲಸಿಕೆಯ ಕ್ಲಿನಿಕಲ್‌ ಪರೀಕ್ಷೆಗಳಲ್ಲಿಯೂ ಎರ್ವೆಬೋ ಲಸಿಕೆಯನ್ನು ಬಳಸಲಾಗುವುದು ಎಂದು ವಿಶ್ವ ಆರೋಗ್ಯ ಸಂಸ್ಥೆ (WHO) ತಿಳಿಸಿದೆ.
ಬುಂಡಿಬುಗ್ಯೋ ವೈರಸ್‌ನಿಂದ ಎರ್ವೆಬೋ ಲಸಿಕೆ ಎಷ್ಟರ ಮಟ್ಟಿಗೆ ರಕ್ಷಣೆ ನೀಡುತ್ತದೆ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ ಎಂದು WHO ಹೇಳಿದೆ. ಆದರೆ ಪ್ರಯೋಗಾಲಯ ಹಾಗೂ ಪ್ರಾಣಿಗಳ ಮೇಲಿನ ಆರಂಭಿಕ ಪರೀಕ್ಷೆಗಳಲ್ಲಿ ಸ್ವಲ್ಪ ಮಟ್ಟಿನ ರಕ್ಷಣೆ ದೊರೆಯುವ ಸಾಧ್ಯತೆಯ ಸೂಚನೆಗಳು ಕಂಡುಬಂದಿವೆ.
ಈ ಲಸಿಕೆಯನ್ನು ಮುಂಚೂಣಿಯಲ್ಲಿ ಕಾರ್ಯನಿರ್ವಹಿಸುವ ಆರೋಗ್ಯ ಸಿಬ್ಬಂದಿಗೆ ಯಾವಾಗಿನಿಂದ ನೀಡಲಾಗುತ್ತದೆ ಎಂಬುದನ್ನು ಅಧಿಕಾರಿಗಳು ಇನ್ನೂ ಪ್ರಕಟಿಸಿಲ್ಲ. ಆದರೆ ಇಟುರಿ ಪ್ರದೇಶದ ಜನರು ಲಸಿಕೆಯಿಂದ ಸೋಂಕಿನ ಹರಡುವಿಕೆ ಕಡಿಮೆಯಾಗಬಹುದು ಎಂಬ ಆಶಾಭಾವನೆ ಹೊಂದಿದ್ದಾರೆ.
ಸ್ಥಳೀಯ ನಿವಾಸಿ ಹೆರಿಟಿಯರ್‌ ರಮಜಾನಿ ಮಾತನಾಡಿ, “ಕೊನೆಗೂ ಈ ಲಸಿಕೆಗಳು ಬಂದಿರುವುದಕ್ಕೆ ನನಗೆ ತುಂಬಾ ಸಂತೋಷವಾಗಿದೆ. ಪ್ರತಿದಿನ ಹೊಸ ಎಬೋಲಾ ಪ್ರಕರಣಗಳು ವರದಿಯಾಗುತ್ತಿರುವುದರಿಂದ ನಾವು ಬೇಸತ್ತಿದ್ದೇವೆ” ಎಂದು ಹೇಳಿದ್ದಾರೆ.
ವೇಗವಾಗಿ ಹರಡುತ್ತಿರುವ ವೈರಸ್‌
ಅತ್ಯಂತ ಕಠಿಣ ಪರಿಸ್ಥಿತಿಯಲ್ಲೂ ಸೋಂಕಿನ ಹರಡುವಿಕೆ ಮುಂದುವರಿದಿದೆ. ಬಂಡುಕೋರರ ಬೆದರಿಕೆ ಹಾಗೂ ದೊಡ್ಡ ಪ್ರಮಾಣದಲ್ಲಿ ಜನರ ಸಂಚಾರವು ಆರೋಗ್ಯ ಸಿಬ್ಬಂದಿಗೆ ಸವಾಲಾಗಿ ಪರಿಣಮಿಸಿದೆ. ಇಟುರಿ ಸೇರಿದಂತೆ ಸೋಂಕು ಪೀಡಿತ ಇತರ ಪ್ರಾಂತ್ಯಗಳಲ್ಲಿ ವೇತನ ಸಿಗದ ಕಾರಣ ಕೆಲವು ಪರಿಹಾರ ಕಾರ್ಯಕರ್ತರು ಕೆಲಸ ಸ್ಥಗಿತಗೊಳಿಸಿದ್ದಾರೆ.
