ಬೆಂಗಳೂರು: ರಾಜಧಾನಿ ಬೆಂಗಳೂರಿನ ಸಾರ್ವಜನಿಕರಿಗೆ ಇ-ಖಾತಾ (E-Khata) ವಿತರಣೆ ಮತ್ತು ತಿದ್ದುಪಡಿ ಪ್ರಕ್ರಿಯೆಯನ್ನು ಇನ್ನಷ್ಟು ತ್ವರಿತಗೊಳಿಸಲು ಕಂದಾಯ ಇಲಾಖೆ ಭರ್ಜರಿ ಮಹತ್ವದ ನಿರ್ಧಾರವೊಂದನ್ನು ಕೈಗೊಂಡಿದೆ. ಇ-ಖಾತಾದಲ್ಲಿನ ತಪ್ಪುಗಳನ್ನು ಸರಿಪಡಿಸಲು ನಾಗರಿಕರು ಇನ್ಮುಂದೆ ಅಲೆಯುವುದನ್ನು ತಪ್ಪಿಸಲು ಮತ್ತು ದೂರುಗಳನ್ನು ಶೀಘ್ರ ವಿಲೇವಾರಿ ಮಾಡಲು ಆಯಾ ವಲಯದ ಉಪ ಆಯುಕ್ತರಿಗೆ ನೇರ ಜವಾಬ್ದಾರಿ ವಹಿಸಲಾಗಿದೆ
ಗ್ರೇಟರ್ ಬೆಂಗಳೂರು ಪ್ರಾಧಿಕಾರದ (GBA) ವ್ಯಾಪ್ತಿಯ ಐದು ನಗರ ಪಾಲಿಕೆಗಳ ಕಂದಾಯ ವಿಭಾಗಕ್ಕೆ ಸಂಬಂಧಿಸಿದಂತೆ ಸೋಮವಾರ ನಡೆದ ಪ್ರಮುಖ ಪ್ರಗತಿ ಪರಿಶೀಲನಾ ಸಭೆಯ ಬಳಿಕ ಮುಖ್ಯ ಆಯುಕ್ತರಾದ ಮಹೇಶ್ವರ ರಾವ್ ಅವರು ಈ ಮಹತ್ವದ ಆದೇಶ ನೀಡಿದ್ದಾರೆ.
ಜಂಟಿ ಆಯುಕ್ತರಿಂದ ಉಪ ಆಯುಕ್ತರಿಗೆ ಬದಲಾದ ಪವರ್
ಈ ಮೊದಲು ಬೆಂಗಳೂರಿನಲ್ಲಿ ಇ-ಖಾತಾದಲ್ಲಿ ತಿದ್ದುಪಡಿ ಮಾಡುವ ಅಧಿಕಾರವನ್ನು ವಲಯ ಜಂಟಿ ಆಯುಕ್ತರಿಗೆ (Joint Commissioners) ನೀಡಲಾಗಿತ್ತು. ಆದರೆ, ಅವರ ಕಾರ್ಯವ್ಯಾಪ್ತಿ ಹಾಗೂ ಕೆಲಸದ ಒತ್ತಡ ಹೆಚ್ಚಾಗಿದ್ದರಿಂದ ಸಾರ್ವಜನಿಕರ ಅರ್ಜಿಗಳು ದೀರ್ಘಕಾಲ ಬಾಕಿ ಉಳಿಯುತ್ತಿದ್ದವು.
ತ್ವರಿತ ವಿಲೇವಾರಿ: ಇನ್ಮುಂದೆ ಸಾರ್ವಜನಿಕರ ದೂರುಗಳನ್ನು ತಕ್ಷಣವೇ ಇತ್ಯರ್ಥಪಡಿಸಲು ಆಯಾ ವಲಯದ ಕಂದಾಯ ವಿಭಾಗದ ಉಪ ಆಯುಕ್ತರಿಗೆ ಈ ಜವಾಬ್ದಾರಿ ವಹಿಸಲಾಗಿದ್ದು, ಸಾಫ್ಟ್ವೇರ್ನಲ್ಲೂ ಅಗತ್ಯ ಬದಲಾವಣೆ ತರಲು ಸೂಚಿಸಲಾಗಿದೆ.
ನನ್ನ ಇ-ಖಾತಾ, ನನ್ನ ಹಕ್ಕು: ಈ ವಿಶೇಷ ಅಭಿಯಾನದ ಅಡಿಯಲ್ಲಿ ಬಾಕಿ ಇರುವ ಎಲ್ಲಾ ತಿದ್ದುಪಡಿ ಹಾಗೂ ಅರ್ಜಿಗಳನ್ನು ಉಪ ಆಯುಕ್ತರು ಶೀಘ್ರದಲ್ಲೇ ಪರಿಶೀಲಿಸಿ ವಿಲೇವಾರಿ ಮಾಡಲಿದ್ದಾರೆ. ಇದರಿಂದ ನಾಗರಿಕರಿಗೆ ಇ-ಖಾತಾ ಸೇವೆಗಳು ಇನ್ನಷ್ಟು ಪರಿಣಾಮಕಾರಿಯಾಗಿ ಸಿಗಲಿವೆ.
ಆಸ್ತಿ ತೆರಿಗೆಯಲ್ಲಿ ದಾಖಲೆ ಬರೆದ ಬೆಂಗಳೂರು: ಬರೋಬ್ಬರಿ ₹3,000 ಕೋಟಿ ಸಂಗ್ರಹ
ಬೆಂಗಳೂರು ನಗರದಲ್ಲಿ ಇ-ಖಾತಾ ಕಡ್ಡಾಯ ಮತ್ತು ಆಸ್ತಿ ತೆರಿಗೆಗೆ (Property Tax) ಸಂಬಂಧಿಸಿದಂತೆ ತರಲಾದ ಕಟ್ಟುನಿಟ್ಟಿನ ಸುಧಾರಣೆಗಳಿಂದಾಗಿ ಪಾಲಿಕೆಯ ಬೊಕ್ಕಸಕ್ಕೆ ಭರ್ಜರಿ ಆದಾಯ ಹರಿದುಬಂದಿದೆ.
ರೆಕಾರ್ಡ್ ಕಲೆಕ್ಷನ್: ಪ್ರಸಕ್ತ ಸಾಲಿನಲ್ಲಿ ಈವರೆಗೆ ಬರೋಬ್ಬರಿ ₹3,000 ಕೋಟಿ ರೂಪಾಯಿ ಆಸ್ತಿ ತೆರಿಗೆ ಸಂಗ್ರಹವಾಗಿದೆ
ಕಳೆದ ವರ್ಷ ಇದೇ ಅವಧಿಯಲ್ಲಿ ₹2,800 ಕೋಟಿ ವಸೂಲಾಗಿತ್ತು. ಕಳೆದ ವರ್ಷಕ್ಕೆ ಹೋಲಿಸಿದರೆ ಈ ಬಾರಿ ₹200 ಕೋಟಿಗೂ ಅಧಿಕ ತೆರಿಗೆ ಪಾಲಿಕೆ ಖಾತೆಗೆ ಜಮೆಯಾಗಿದೆ.
ಇದೇ ಸಭೆಯಲ್ಲಿ ಮಾತನಾಡಿದ ಕಂದಾಯ ವಿಭಾಗದ ವಿಶೇಷ ಆಯುಕ್ತ ಮುನೀಶ್ ಮೌದ್ಗಿಲ್ ಅವರು, “ಇನ್ನೂ ತೆರಿಗೆ ಪಾವತಿಸದ ಸುಸ್ತಿದಾರರು ಹಾಗೂ ಪರಿಷ್ಕರಣೆ ಬಾಕಿ ಇರುವ ಪ್ರಕರಣಗಳಲ್ಲಿ ಪಾಲಿಕೆಗೆ ಬರಬೇಕಿರುವ ತೆರಿಗೆಯನ್ನು ಯಾವುದೇ ಮುಲಾಜಿಲ್ಲದೆ ಕಟ್ಟುನಿಟ್ಟಾಗಿ ವಸೂಲಿ ಮಾಡಲು ಕಂದಾಯ ಅಧಿಕಾರಿಗಳು ಫೀಲ್ಡ್ಗೆ ಇಳಿಯಬೇಕು” ಎಂದು ಖಡಕ್ ಸೂಚನೆ ನೀಡಿದ್ದಾರೆ.
ಈ ಹೈಪ್ರೊಫೈಲ್ ಸಭೆಯಲ್ಲಿ ವಿಶೇಷ ಆಯುಕ್ತ ಡಾ. ಕೆ.ಹರೀಶ್ ಕುಮಾರ್, ಆಯುಕ್ತರಾದ ಡಿ.ಎಸ್.ರಮೇಶ್, ಜಿ.ಜಗದೀಶ್, ಡಾ. ಕೆ.ವಿ.ರಾಜೇಂದ್ರ ಸೇರಿದಂತೆ ಹಲವು ಹಿರಿಯ ಅಧಿಕಾರಿಗಳು ಉಪಸ್ಥಿತರಿದ್ದರು.
