ಡಬ್ಲಿನ್, ಐರ್ಲೆಂಡ್: ಡಬ್ಲಿನ್‌ನಲ್ಲಿ ಭಾರತೀಯ ವ್ಯಕ್ತಿಯೊಬ್ಬರ ಮೇಲೆ ನಡೆದ ಆಘಾತಕಾರಿ ಹಲ್ಲೆಯ ಕುರಿತು ಹೊಸ ವಿವರಗಳು ಹೊರಬಿದ್ದಿವೆ. ಭಾರತೀಯ ವ್ಯಕ್ತಿಯನ್ನು ರಕ್ಷಿಸಿದ ಸ್ಥಳೀಯ ಮಹಿಳೆ ಜೆನ್ನಿಫರ್ ಮರ್ರೆ (Jennifer Murray) ಪ್ರಕಾರ, ಆತನಿಗೆ ಯುವಕರ ಗುಂಪೊಂದು ಹಲ್ಲೆ ನಡೆಸಿ, ಬಟ್ಟೆಗಳನ್ನು ಕಿತ್ತುಕೊಂಡು ಬೆತ್ತಲಾಗಿಸಿ, ಬಿಟ್ಟು ಹೋಗಿದೆ. ಈ ಘಟನೆ ಐರ್ಲೆಂಡ್‌ನ ಡಬ್ಲಿನ್ ಉಪನಗರವಾದ ಟಾಲ್ಲಾಘಟ್‌ನಲ್ಲಿ ನಡೆದಿದೆ.
ಹಲ್ಲೆಗೊಳಗಾದ ಭಾರತೀಯ ಉದ್ಯೋಗಿ
ಫೇಸ್‌ಬುಕ್‌ನಲ್ಲಿ ಹಂಚಿಕೊಂಡಿರುವ ಭಾವನಾತ್ಮಕ ವಿಡಿಯೋದಲ್ಲಿ ಮರ್ರೆ, ಇದು ಪ್ರತ್ಯೇಕ ಘಟನೆಯಲ್ಲ ಎಂದು ಹೇಳಿದ್ದಾರೆ. ಈ ಗ್ಯಾಂಗ್ ಇತ್ತೀಚೆಗೆ ಕನಿಷ್ಠ ನಾಲ್ಕು ಇತರ ಭಾರತೀಯರನ್ನು ಗುರಿಯಾಗಿಸಿಕೊಂಡಿದೆ. “ನಿಮ್ಮ ಹದಿಹರೆಯದವರು ಅಮಾಯಕರಿಗೆ ಚಾಕುವಿನಿಂದ ಇರಿಯುತ್ತಾ ಸುತ್ತಾಡುತ್ತಿದ್ದಾರೆ” ಎಂದು ಅವರು ಹೇಳಿದ್ದಾರೆ.
ಶನಿವಾರ ಸಂಜೆ 6 ಗಂಟೆ ಸುಮಾರಿಗೆ ತಾನು ಕಾರು ಚಲಾಯಿಸುತ್ತಿದ್ದಾಗ, ಆ ವ್ಯಕ್ತಿ “ಸಂಪೂರ್ಣವಾಗಿ ರಕ್ತಸಿಕ್ತನಾಗಿ” ಇರುವುದನ್ನು ನೋಡಿದೆ ಎಂದು ಮರ್ರೆ ಹೇಳಿದ್ದಾರೆ. “ದಯವಿಟ್ಟು ನನಗೆ ಸಹಾಯ ಮಾಡಿ” ಎಂದು ಆ ವ್ಯಕ್ತಿ ಮರ್ರೆಗೆ ಕೇಳಿಕೊಂಡಿದ್ದಾನೆ. ಮರ್ರೆ ಆತನನ್ನು ತಮ್ಮ ಕಾರು ನಿಲ್ಲಿಸಿದ್ದ ಸ್ಥಳಕ್ಕೆ ಕರೆತಂದು ಆಂಬುಲೆನ್ಸ್ ಮತ್ತು ಪೊಲೀಸರಿಗೆ ಕರೆ ಮಾಡಿದ್ದಾರೆ.
ಭಾರತೀಯ ವ್ಯಕ್ತಿಗೆ ಹಲ್ಲೆ ನಡೆಸಿದ ಹದಿಹರೆಯದವರು, ತಮ್ಮ ದಾಳಿಯನ್ನು ಸಮರ್ಥಿಸಿಕೊಳ್ಳಲು ಆತ ಅಸಭ್ಯವಾಗಿ ವರ್ತಿಸಿದ್ದಾನೆಂದು ಸುಳ್ಳು ಕಥೆ ಕಟ್ಟಿದ್ದಾರೆ ಎಂದು ಮರ್ರೆ ಹೇಳಿದ್ದಾರೆ.
ಈ ಘಟನೆಯ ಆವೃತ್ತಿಯನ್ನು ಐರಿಶ್ ಮಹಿಳೆ ಖಂಡಿಸಿದ್ದಾರೆ. ಭಾರತೀಯ ವ್ಯಕ್ತಿ “ತುಂಬಾ ಒಳ್ಳೆಯವರು”, ಸಭ್ಯರು ಮತ್ತು ಸೌಮ್ಯ ಸ್ವಭಾವದವರು ಎಂದು ಅವರು ಪದೇ ಪದೇ ಒತ್ತಿ ಹೇಳಿದ್ದಾರೆ. ಐರಿಶ್ ಹದಿಹರೆಯದವರು ಆತನ ಮೇಲೆ ಜನಾಂಗೀಯ ಪ್ರೇರಿತ ದಾಳಿ ನಡೆಸಲು, ಸಮಾಜವು ಇದನ್ನು ನಿರ್ಲಕ್ಷಿಸುವಂತೆ ಮಾಡಲು, ಸುಳ್ಳು ಕಥೆಯನ್ನು ಕಟ್ಟಿದ್ದಾರೆ ಎಂದು ಮರ್ರೆ ಆರೋಪಿಸಿದ್ದಾರೆ.
ಆ ವ್ಯಕ್ತಿ ತನಗೆ ಅಮೆಜಾನ್‌ನಿಂದ ಕೆಲಸ ಸಿಕ್ಕಿದ್ದು, ಒಂದು ವಾರದ ಹಿಂದೆ ಮಾತ್ರ ಐರ್ಲೆಂಡ್‌ಗೆ ಬಂದಿದ್ದೇನೆ ಎಂದು ಮರ್ರೆಗೆ ತಿಳಿಸಿದ್ದಾನೆ. ಆತ ಭಾರತದ ಉನ್ನತ ಕಾಲೇಜುಗಳಲ್ಲಿ ಒಂದರಿಂದ ಪದವಿ ಪಡೆದಿದ್ದು, ಭಾರತದಲ್ಲಿ ಆತನಿಗೆ ಪತ್ನಿ ಮತ್ತು 11 ತಿಂಗಳ ಮಗುವಿದೆ. ಹೆಸರಿಸದ ಭಾರತೀಯ ವ್ಯಕ್ತಿಯ ಮೇಲಿನ ಆಘಾತಕಾರಿ ದಾಳಿಯ ಬಗ್ಗೆ ಮಾತನಾಡುತ್ತಾ ಮರ್ರೆ ಕಣ್ಣೀರಿಟ್ಟಿದ್ದಾರೆ. ದೇವಸ್ಥಾನದಲ್ಲಿ ಪ್ರಾರ್ಥಿಸಲು ಹೋಗುತ್ತಿದ್ದಾಗ, “ಈ ಗುಂಪು” ಹಿಂದಿನಿಂದ ಆತನ ಮೇಲೆ ದಾಳಿ ಮಾಡಿದೆ ಎಂದು ಅವರು ಹೇಳಿದ್ದಾರೆ.
