ಕೆಲವೊಮ್ಮೆ ಕನಸು ನನಸಾಗಲು ಸಮಯ ಹಿಡಿಯಬಹುದು, ಆದರೆ ಅದು ನಿಜವಾದಾಗ ಆ ಕ್ಷಣ ಅತ್ಯಂತ ವಿಶೇಷವಾಗಿರುತ್ತದೆ. ವುಮೆನ್ಸ್ ಪ್ರೀಮಿಯರ್ ಲೀಗ್ (WPL) ಆಟಗಾರರ ಹರಾಜಿನಲ್ಲಿ ದೆಹಲಿ ಮೂಲದ ಆಟಗಾರ್ತಿ ನಜ್ಮಾ ಖಾನ್ ಅವರನ್ನು ಡೆಲ್ಲಿ ಕ್ಯಾಪಿಟಲ್ಸ್ ಫ್ರಾಂಚೈಸಿ 10 ಲಕ್ಷ ರೂಪಾಯಿಗೆ ಖರೀದಿ ಮಾಡಿದ ಬೆನ್ನಲ್ಲೇ, ತಂಡದ ನಾಯಕಿ ಜೆಮಿಮಾ ರೋಡ್ರಿಗಸ್ ಇನ್‌ಸ್ಟಾಗ್ರಾಮ್‌ನಲ್ಲಿ ಹಂಚಿಕೊಂಡ ಪೋಸ್ಟ್ ಒಂದು ಭಾರೀ ವೈರಲ್ ಆಗಿದೆ.
ನಜ್ಮಾ ಖಾನ್ ಅವರು ಒಂದು ವರ್ಷದ ಹಿಂದೆ ತಮಗೆ ಕಳುಹಿಸಿದ್ದ ಹಳೆಯ ಇನ್‌ಸ್ಟಾಗ್ರಾಮ್ ಸಂದೇಶದ (Message) ಸ್ಕ್ರೀನ್‌ಶಾಟ್ ಹಂಚಿಕೊಂಡಿರುವ ಜೆಮಿಮಾ, “ನಜ್ಮಾಗೆ ಮೆಸೇಜ್ ಮಾಡಲು ಇನ್‌ಸ್ಟಾಗ್ರಾಮ್ ಓಪನ್ ಮಾಡಿದಾಗ ಅವರು ಒಂದು ವರ್ಷದ ಹಿಂದೆ ಕಳುಹಿಸಿದ್ದ ಮೆಸೇಜ್ ಕಣ್ಣಿಗೆ ಬಿತ್ತು. ‘ಮ್ಯಾನಿಫೆಸ್ಟೇಷನ್ ಇಸ್ ರಿಯಲ್’ (ಬಯಸಿದ ಕನಸು ನನಸಾಗಿದೆ). ಡೆಲ್ಲಿ ಕ್ಯಾಪಿಟಲ್ಸ್ ಕುಟುಂಬಕ್ಕೆ ಸ್ವಾಗತ” ಎಂದು ಭಾವನಾತ್ಮಕವಾಗಿ ಬರೆದುಕೊಂಡಿದ್ದಾರೆ.
ಹರಾಜಿನಲ್ಲಿ ಕೇವಲ ಆಟಗಾರರ ಬೆಲೆ ಮತ್ತು ತಂತ್ರಗಾರಿಕೆಗಳಷ್ಟೇ ಸದ್ದು ಮಾಡುತ್ತಿರುವಾಗ, ಜೆಮಿಮಾ ಹಂಚಿಕೊಂಡ ಈ ಹಳೆಯ ಚಾಟ್ ಆಟಗಾರ್ತಿಯರ ವೈಯಕ್ತಿಕ ಶ್ರಮ ಹಾಗೂ ಕನಸುಗಳ ಪ್ರಯಾಣವನ್ನು ಎತ್ತಿಹಿಡಿದಿದೆ. ನಜ್ಮಾ ಖಾನ್ ಅವರಿಗೆ ಡೆಲ್ಲಿ ಕ್ಯಾಪಿಟಲ್ಸ್‌ನಂತಹ ಬೃಹತ್ ಫ್ರಾಂಚೈಸಿಯಲ್ಲಿ ಆಡುವ ದೊಡ್ಡ ಅವಕಾಶ ಒಲಿದುಬಂದಿದ್ದು, ನಾಯಕಿ ಜೆಮಿಮಾ ನೀಡಿದ ಆತ್ಮೀಯ ಸ್ವಾಗತ ಕ್ರೀಡಾಭಿಮಾನಿಗಳ ಹೃದಯ ಗೆದ್ದಿದೆ.
