ಡಿಜಿಟಲ್ ಯುಗದಲ್ಲಿ ನಗದು ಹಣಕ್ಕಾಗಿ ಎಟಿಎಂಗಳು ನಮಗೆ ಪ್ರಮುಖ ಆಧಾರ. ಆದರೆ, ಕೆಲವೊಮ್ಮೆ ತಾಂತ್ರಿಕ ದೋಷಗಳಿಂದ ಅಥವಾ ಸರ್ವರ್ ಸಮಸ್ಯೆಗಳಿಂದಾಗಿ ನಾವು ಹಾಕಿದ ಡೆಬಿಟ್ ಕಾರ್ಡ್ ಮೆಷಿನ್ ಒಳಗಡೆಯೇ ಸಿಲುಕಿಕೊಳ್ಳಬಹುದು. ಅಂತಹ ಸಮಯದಲ್ಲಿ ಭಯವಾಗುವುದು ಸಹಜ, ಆದರೆ ಆವೇಶದಲ್ಲಿ ಎಟಿಎಂ ಮೆಷಿನ್ ಮೇಲೆ ಪ್ರತಾಪ ತೋರಿಸುವುದರಿಂದ ಸಮಸ್ಯೆ ಬಗೆಹರಿಯುವುದಿಲ್ಲ, ಬದಲಿಗೆ ಹೆಚ್ಚಾಗುತ್ತದೆ. ಅಂತಹ ತುರ್ತು ಪರಿಸ್ಥಿತಿಯಲ್ಲಿ ನಿಮ್ಮ ಕಾರ್ಡ್ ಮತ್ತು ಹಣವನ್ನು ಹೇಗೆ ಕಾಪಾಡಿಕೊಳ್ಳಬೇಕು ಎಂದು ಈಗ ತಿಳಿಯೋಣ.
ಕಾರ್ಡ್ ಸಿಲುಕಿಕೊಳ್ಳಲು ಕಾರಣಗಳೇನು?
ಎಟಿಎಂ ಕಾರ್ಡ್ ಸಿಲುಕಿಕೊಳ್ಳಲು ಕೇವಲ ತಾಂತ್ರಿಕ ದೋಷಗಳಷ್ಟೇ ಅಲ್ಲ, ಭದ್ರತಾ ಕಾರಣಗಳೂ ಇರಬಹುದು. ನೀವು ವಹಿವಾಟಿಗೆ ಹೆಚ್ಚಿನ ಸಮಯ ತೆಗೆದುಕೊಳ್ಳುವುದು ಅಥವಾ ಸತತವಾಗಿ ತಪ್ಪು ಪಿನ್ (PIN) ನಂಬರ್ ನಮೂದಿಸಿದಾಗ ಮೆಷಿನ್ ಸ್ವಯಂಚಾಲಿತವಾಗಿ ಕಾರ್ಡ್ ಅನ್ನು ತನ್ನಲ್ಲೇ ಇಟ್ಟುಕೊಳ್ಳುತ್ತದೆ (Hold).
ಅಂತಹ ಸಮಯದಲ್ಲಿ ಏನು ಮಾಡಬೇಕು ?
- ಗಾಬರಿಯಾಗಬೇಡಿ – ಮೆಷಿನ್ ಗಮನಿಸಿ: ಕಾರ್ಡ್ ಬರದಿದ್ದರೆ ತಕ್ಷಣ ಗಾಬರಿಯಾಗಿ ಮೆಷಿನ್ ಎಳೆಯುವುದು ಅಥವಾ ಹೊಡೆಯುವುದು ಮಾಡಬೇಡಿ. ಮೊದಲು ಎಟಿಎಂ ಮೆಷಿನ್ ಮೇಲಿರುವ ATM ID ನಂಬರ್, ಬ್ಯಾಂಕ್ ಹೆಸರು, ಸ್ಥಳ ಮತ್ತು ಸಮಯವನ್ನು ಬರೆದುಕೊಳ್ಳಿ ಅಥವಾ ಫೋಟೋ ತೆಗೆಯಿರಿ.
- ಕಸ್ಟಮರ್ ಕೇರ್ಗೆ ದೂರು ನೀಡಿ: ತಕ್ಷಣವೇ ನಿಮ್ಮ ಬ್ಯಾಂಕ್ನ ಕಸ್ಟಮರ್ ಕೇರ್ ನಂಬರ್ಗೆ ಕರೆ ಮಾಡಿ. ನಡೆದ ವಿಷಯವನ್ನು ವಿವರಿಸಿ, ನಿಮ್ಮ ಕಾರ್ಡ್ ಅನ್ನು ತಕ್ಷಣವೇ ‘ಹಾಟ್ಲಿಸ್ಟ್’ (Hotlist) ಅಥವಾ ಬ್ಲಾಕ್ ಮಾಡಲು ವಿನಂತಿಸಿ. ಇದರಿಂದ ಆ ಕಾರ್ಡ್ ಮೂಲಕ ಯಾರೂ ಹಣ ತೆಗೆಯಲು ಸಾಧ್ಯವಾಗುವುದಿಲ್ಲ.
- ಕಾರ್ಡ್ ರದ್ದು ಮಾಡುವುದು: ನಿಮ್ಮ ಕಾರ್ಡ್ ದುರುಪಯೋಗವಾಗುವ ಸಾಧ್ಯತೆಯಿದೆ ಎಂದು ಅನುಮಾನವಿದ್ದರೆ, ಕಾರ್ಡ್ ಅನ್ನು ಶಾಶ್ವತವಾಗಿ ರದ್ದುಗೊಳಿಸುವುದೇ ಉತ್ತಮ. ನೀವು ಕರೆ ಮಾಡುವ ಮೂಲಕ ಅಥವಾ ಮೊಬೈಲ್ ಬ್ಯಾಂಕಿಂಗ್ ಆ್ಯಪ್ ಮೂಲಕ ಹೊಸ ಕಾರ್ಡ್ಗಾಗಿ ಅರ್ಜಿ ಸಲ್ಲಿಸಬಹುದು. 7 ರಿಂದ 10 ಕೆಲಸದ ದಿನಗಳಲ್ಲಿ ಹೊಸ ಕಾರ್ಡ್ ನಿಮ್ಮ ಮನೆಗೆ ತಲುಪುತ್ತದೆ.
- ಹಳೆಯ ಕಾರ್ಡ್ ಅನ್ನು ಮರಳಿ ಪಡೆಯುವುದು: ಒಂದು ವೇಳೆ ನೀವು ಕಾರ್ಡ್ ರದ್ದು ಮಾಡಲು ಇಷ್ಟವಿಲ್ಲದಿದ್ದರೆ ಮತ್ತು ಅದು ನಿಮ್ಮ ಸ್ವಂತ ಬ್ಯಾಂಕ್ನ ಎಟಿಎಂ ಆಗಿದ್ದರೆ, ಬ್ಯಾಂಕ್ಗೆ ಹೋಗಿ ದೂರು ನೀಡಿ. ಎಟಿಎಂ ನಿರ್ವಹಣಾ ತಂಡವು ಕಾರ್ಡ್ ತೆಗೆದು ನಿಮ್ಮ ಹೋಮ್ ಬ್ರಾಂಚ್ಗೆ ಒಪ್ಪಿಸುತ್ತದೆ. ಅಲ್ಲಿ ನೀವು ಆಧಾರ್ ಅಥವಾ ಪಾನ್ ಕಾರ್ಡ್ ತೋರಿಸಿ ಕಾರ್ಡ್ ಮರಳಿ ಪಡೆಯಬಹುದು.
- ಇದು ಕೇವಲ ಮಾಹಿತಿ ಉದ್ದೇಶಕ್ಕಾಗಿ ಮಾತ್ರ. ಎಟಿಎಂ ಕಾರ್ಡ್ ಸಿಲುಕಿಕೊಂಡಾಗ ಅಲ್ಲಿರುವ ಅಪರಿಚಿತರ ಸಹಾಯ ಪಡೆಯಬೇಡಿ. ಕೇವಲ ಬ್ಯಾಂಕ್’ನ ಅಧಿಕೃತ ನಂಬರ್ಗಳಿಗೆ ಮಾತ್ರ ಕರೆ ಮಾಡಿ.
