ಬಾಲಿವುಡ್‌ನ ಫ್ಯಾಷನ್ ಐಕಾನ್ ಕರೀನಾ ಕಪೂರ್ ಖಾನ್ ತಮ್ಮ ಉಡುಪಿನ ಶೈಲಿಯಿಂದ ಸದಾ ಸುದ್ದಿಯಲ್ಲಿರುತ್ತಾರೆ. ಇದೀಗ ತಮ್ಮ ಮುಂಬರುವ ‘ದಾಯರಾ’ ಚಿತ್ರದ ಪ್ರಚಾರದ ವೇಳೆ ಹಳೆಯ ಟ್ರೆಂಡಿಂಗ್ ಉಡುಪೊಂದಕ್ಕೆ ಹೊಸ ಮೆರುಗು ನೀಡುವ ಮೂಲಕ ಕರೀನಾ ಪ್ರೇಕ್ಷಕರ ಗಮನ ಸೆಳೆದಿದ್ದಾರೆ. ಇತ್ತೀಚಿನ ರನ್ ವೇ ಉಡುಪುಗಳನ್ನು ಆಯ್ಕೆ ಮಾಡುವ ಬದಲು ೧೯೯೯ರ ವಿಂಟೇಜ್ ಫ್ಯಾಷನ್‌ಗೆ ಹಿಂತಿರುಗಿರುವ ಕರೀನಾ, ಉತ್ತಮ ವಿನ್ಯಾಸದ ಉಡುಪುಗಳಿಗೆ ಎಂದಿಗೂ ಕಾಲಾವಧಿ ಮುಗಿಯುವುದಿಲ್ಲ ಎಂಬುದನ್ನು ಮತ್ತೊಮ್ಮೆ ಸಾಬೀತುಪಡಿಸಿದ್ದಾರೆ.
ಚಿತ್ರದ ಪ್ರಚಾರದ ಸರಣಿಯಲ್ಲಿ ಕರೀನಾ, ಪ್ರಸಿದ್ಧ ಡಿಸೈನರ್ ಜಾನ್ ಗಾಲಿಯಾನೋ ಅವರ ೧೯೯೯ರ ಸ್ಪ್ರಿಂಗ್ ಅಂಡ್ ಸಮ್ಮರ್ ಕಲೆಕ್ಷನ್‌ನ ಮೃದುವಾದ ಬೇಬಿ-ಪಿಂಕ್ ಸ್ಕರ್ಟ್ ಸೂಟ್‌ನಲ್ಲಿ ಕಂಗೊಳಿಸಿದ್ದಾರೆ. ಶೋಲ್ಡರ್ ಪ್ಯಾಡ್, ಸೊಗಸಾದ ಬೋ ವಿನ್ಯಾಸ ಮತ್ತು ಸ್ಲಿಮ್-ಫಿಟ್ ಜಾಕೆಟ್ ಹೊಂದಿರುವ ಈ ಉಡುಪಿನಲ್ಲಿ ಕರೀನಾ ಅತ್ಯಂತ ಆಕರ್ಷಕವಾಗಿ ಕಾಣಿಸಿಕೊಂಡಿದ್ದಾರೆ. ಖ್ಯಾತ ಸ್ಟೈಲಿಸ್ಟ್ ರಿಯಾ ಕಪೂರ್ ಅವರು ಕರೀನಾ ಅವರಿಗೆ ಈ ವಿಂಟೇಜ್ ಲುಕ್ ನೀಡಿದ್ದು, ಮೊಣಕಾಲಿನವರೆಗಿನ ಪೆನ್ಸಿಲ್ ಸ್ಕರ್ಟ್ ಮತ್ತು ಹೊಳೆಯುವ ವಜ್ರದ ಕಿವಿಯೋಲೆಗಳು ನಟಿಯ ಅಂದವನ್ನು ಮತ್ತಷ್ಟು ಹೆಚ್ಚಿಸಿವೆ.
ಇಷ್ಟೇ ಅಲ್ಲದೆ, ಗುಲಾಬಿ ಬಣ್ಣದ ಐಶ್ಯಾಡೋ, ಪಿಂಕ್ ಲಿಪ್‌ಸ್ಟಿಕ್ ಹಾಗೂ ಸೈಡ್ ಪಾರ್ಟಿಶನ್ ಮಾಡಿದ ಹೇರ್ ಸ್ಟೈಲ್‌ನಲ್ಲಿ ಕರೀನಾ ರೆಟ್ರೋ ಹಾಗೂ ಮಾಡರ್ನ್ ಲುಕ್ ನೀಡಿದ್ದಾರೆ. ಇತ್ತೀಚೆಗಷ್ಟೇ ನಡೆದ ‘ದಾಯರಾ’ ಚಿತ್ರದ ಟ್ರೇಲರ್ ಬಿಡುಗಡೆ ಸಮಾರಂಭದಲ್ಲೂ ಕರೀನಾ ಕಪೂರ್ ಅವರು ೨೩ ವರ್ಷ ಹಳೆಯ ವರ್ಸೇಚೆ ಬ್ರ್ಯಾಂಡ್‌ನ ಆಲೀವ್ ಗ್ರೀನ್ ಉಡುಪಿನಲ್ಲಿ ಆಗಮಿಸಿ ಎಲ್ಲರ ಗಮನ ಸೆಳೆದಿದ್ದರು.
ಒಟ್ಟಿನಲ್ಲಿ ತಮ್ಮ ಮುಂಬರುವ ‘ದಾಯರಾ’ ಸಿನಿಮಾದ ಪ್ರಚಾರದ ಪ್ರತಿಯೊಂದು ಹಂತದಲ್ಲೂ ಹಳೆಯ ಕಾಲದ ವಿಂಟೇಜ್ ಉಡುಪುಗಳನ್ನು ಅತ್ಯಂತ ಆಧುನಿಕ ಶೈಲಿಯಲ್ಲಿ ಧರಿಸುವ ಮೂಲಕ ಕರೀನಾ ಕಪೂರ್ ಬಾಲಿವುಡ್‌ನ ನಿಜವಾದ ಫ್ಯಾಷನ್ ದಿವ್ಯಾಂಗಿ ಎಂಬುದನ್ನು ಸಾಬೀತುಪಡಿಸುತ್ತಿದ್ದಾರೆ.
