ಬೆಂಡೆಕಾಯಿ (Lady Finger) ಎಂದರೆ ಬಹುತೇಕರಿಗೆ ಇಷ್ಟ. ಆದರೆ, ಅದನ್ನು ಹೆಚ್ಚುವಾಗ ಅಥವಾ ಬೇಯಿಸುವಾಗ ಬರುವ ಲೋಳೆ (Sliminess) ಮಾತ್ರ ಅಡುಗೆಯನ್ನೇ ಕಿರಿಕಿರಿ ಎನಿಸುವಂತೆ ಮಾಡುತ್ತದೆ. ಪದಾರ್ಥ ಮುದ್ದೆಯಾಗುವುದು, ಪಾತ್ರೆಗೆ ಅಂಟಿಕೊಳ್ಳುವುದು ಸಾಮಾನ್ಯ. ಆದರೆ, ಅಡುಗೆ ಮನೆಯ ಕೆಲವು ಸರಳ ಬದಲಾವಣೆಗಳು ನಿಮ್ಮ ಬೆಂಡೆಕಾಯಿ ಪಲ್ಯವನ್ನು ಹೋಟೆಲ್ನಲ್ಲಿ ಸಿಗುವಂತೆ ಬಿಡಿಬಿಡಿಯಾಗಿ ಮತ್ತು ಕ್ರಿಸ್ಪಿಯಾಗಿ ಮಾಡಬಲ್ಲವು.
ಅವು ಯಾವುವು? ಇಲ್ಲಿವೆ ನೋಡಿ ವಿವರವಾದ ಟಿಪ್ಸ್:
1.ತೇವಾಂಶದ ಬಗ್ಗೆ ಇರಲಿ ಎಚ್ಚರ (Moisture Control)
ಬೆಂಡೆಕಾಯಿ ಲೋಳೆಯಾಗಲು ಮುಖ್ಯ ಕಾರಣ ನೀರು.ಬೆಂಡೆಕಾಯಿಯನ್ನು ತೊಳೆದ ತಕ್ಷಣ ಕತ್ತರಿಸಬೇಡಿ. ಅದನ್ನು ಒಂದು ಒಣ ಕಾಟನ್ ಬಟ್ಟೆಯಿಂದ ಹನಿ ನೀರಿಲ್ಲದಂತೆ ಒರೆಸಿ. ಸಾಧ್ಯವಾದರೆ ಅರ್ಧ ಗಂಟೆ ಫ್ಯಾನ್ ಕೆಳಗೆ ಒಣಗಲು ಬಿಡಿ.ತರಕಾರಿ ಪೂರ್ತಿ ಒಣಗಿದ ನಂತರವಷ್ಟೇ ಹೆಚ್ಚಲು ಶುರುಮಾಡಿ. ನೀರಿನ ಅಂಶವಿದ್ದರೆ ಜಿಗುಟು ದುಪ್ಪಟ್ಟಾಗುತ್ತದೆ.
2.ಹುಳಿ ಅಂಶದ ಬಳಕೆ (Acidic Magic)
ಬೆಂಡೆಕಾಯಿಯ ಜಿಗುಟುತನವನ್ನು ಹೋಗಲಾಡಿಸಲು ಹುಳಿ ಅಂಶ ರಾಮಬಾಣ.ಪಲ್ಯ ಅಥವಾ ಫ್ರೈ ಮಾಡುವಾಗ ಒಂದು ಟೀಚಮಚ ನಿಂಬೆ ರಸ, ಸ್ವಲ್ಪ ಮೊಸರು ಅಥವಾ ಆಮ್ಚೂರ್ ಪುಡಿಯನ್ನು (ಮಾವಿನಕಾಯಿ ಪುಡಿ) ಸೇರಿಸಿ.ಇದರಲ್ಲಿರುವ ಆಮ್ಲೀಯ ಗುಣವು ಬೆಂಡೆಕಾಯಿಯ ಫೈಬರ್ ಅನ್ನು ಗಟ್ಟಿಯಾಗಿಸುತ್ತದೆ ಮತ್ತು ಲೋಳೆ ಹೊರಬರದಂತೆ ತಡೆಯುತ್ತದೆ.
3.ಉಪ್ಪು ಹಾಕುವ ಸರಿಯಾದ ಸಮಯ (Salt Timing)
ನಾವೆಲ್ಲರೂ ಸಾಮಾನ್ಯವಾಗಿ ಅಡುಗೆ ಆರಂಭದಲ್ಲೇ ಉಪ್ಪು ಹಾಕುತ್ತೇವೆ. ಆದರೆ ಬೆಂಡೆಕಾಯಿ ವಿಷಯದಲ್ಲಿ ಇದು ತಪ್ಪು.ಬೆಂಡೆಕಾಯಿ ಸುಮಾರು 90% ಬೆಂದ ನಂತರವಷ್ಟೇ ಉಪ್ಪನ್ನು ಸೇರಿಸಿ.ಮೊದಲೇ ಉಪ್ಪು ಹಾಕಿದರೆ ಬೆಂಡೆಕಾಯಿ ತೇವಾಂಶವನ್ನು ಬಿಡುಗಡೆ ಮಾಡುತ್ತದೆ, ಇದರಿಂದ ಪಲ್ಯ ಅಂಟಂಟಾಗಿ ಮುದ್ದೆಯಾಗುತ್ತದೆ.
4.ಪಾತ್ರೆಯನ್ನು ಮುಚ್ಚಬೇಡಿ (No Lid Cooking)
ಅನೇಕರು ತರಕಾರಿ ಬೇಗ ಬೇಯಲಿ ಎಂದು ಪಾತ್ರೆಗೆ ಮುಚ್ಚಳ ಹಾಕುತ್ತಾರೆ.ಬೆಂಡೆಕಾಯಿ ಅಡುಗೆ ಮಾಡುವಾಗ ಪಾತ್ರೆಯನ್ನು ಎಂದಿಗೂ ಮುಚ್ಚಬೇಡಿ. ತೆರೆದ ಪಾತ್ರೆಯಲ್ಲೇ (Open Pan) ಬೇಯಿಸಿ.ಮುಚ್ಚಳ ಹಾಕಿದಾಗ ಹಬೆಯು (Steam) ನೀರಾಗಿ ಹನಿ ಹನಿಯಾಗಿ ಪಲ್ಯಕ್ಕೆ ಬೀಳುತ್ತದೆ. ಇದು ಬೆಂಡೆಕಾಯಿಯನ್ನು ಮೆತ್ತಗೆ ಮಾಡಿ ಜಿಗುಟು ಹೆಚ್ಚಿಸುತ್ತದೆ.
5.ಪದೇ ಪದೇ ಸೌಟು ಹಾಕಬೇಡಿ
ಬೆಂಡೆಕಾಯಿ ತುಂಡುಗಳು ಸಾಫ್ಟ್ ಆಗಿರುತ್ತವೆ.ಅಡುಗೆ ಮಾಡುವಾಗ ಪದೇ ಪದೇ ಸೌಟಿನಿಂದ ತಿರುಗಿಸಬೇಡಿ. ಹೆಚ್ಚು ತಿರುಗಿಸಿದರೆ ತುಂಡುಗಳು ಒಡೆದು ಬೀಜ ಮತ್ತು ಜಿಗುಟು ಹೊರಬರುತ್ತದೆ. ಹಗುರವಾಗಿ ಒಮ್ಮೆ ಮಿಕ್ಸ್ ಮಾಡಿ ಹಾಗೆಯೇ ಬೇಯಲು ಬಿಡಿ.
