ದಶಕಗಳಿಂದ ಭಾರತೀಯರು ಉತ್ತಮ ಅವಕಾಶಗಳಿಗಾಗಿ ವಿದೇಶಕ್ಕೆ ವಲಸೆ ಹೋಗುವುದನ್ನು ನಾವು ಕೇಳಿದ್ದೇವೆ. ಆದರೆ ಈಗ ಕಾಲ ಬದಲಾಗುತ್ತಿದೆ. ವಿದೇಶಿಯರು, ಅದರಲ್ಲೂ ಪಾಶ್ಚಿಮಾತ್ಯ ದೇಶಗಳ ಜನರು ಭಾರತದ ಜೀವನಶೈಲಿಗೆ ಮಾರುಹೋಗಿ ಇಲ್ಲಿಗೆ ವಲಸೆ ಬರುತ್ತಿದ್ದಾರೆ. ಇದಕ್ಕೆ ಸಾಕ್ಷಿ ಎಂಬಂತೆ, ಕೆನಡಾದ ಟೆಕ್ ಸಂಸ್ಥೆಯೊಂದರ ಸಂಸ್ಥಾಪಕರು ತಮ್ಮ ಕುಟುಂಬದೊಂದಿಗೆ ಕೇರಳದ ತ್ರಿಶೂರ್ನಲ್ಲಿ ನೆಲೆಸಿದ್ದು, ತಮ್ಮ ಈ ನಿರ್ಧಾರ ಏಕೆ ಉತ್ತಮವಾದುದು ಎಂಬುದನ್ನು ವಿವರಿಸಿದ್ದಾರೆ.
ಕೆನಡಾದಿಂದ ಭಾರತಕ್ಕೆ ಬರುವ ಮುನ್ನ ಅವರ ಸ್ನೇಹಿತರು ಮತ್ತು ಕುಟುಂಬದವರು, ಭಾರತ ಮಾಲಿನ್ಯದಿಂದ ಕೂಡಿದೆ, ಅಲ್ಲಿ ಜೀವನ ಅಸ್ತವ್ಯಸ್ತವಾಗಿರುತ್ತದೆ ಎಂದು ಎಚ್ಚರಿಸಿದ್ದರಂತೆ. ಆದರೆ, ಈ ಎಲ್ಲ ಮಾತುಗಳನ್ನು ಬದಿಗೊತ್ತಿ ಕಳೆದ ಎರಡು ತಿಂಗಳಿಂದ ತ್ರಿಶೂರ್ನಲ್ಲಿ ನೆಲೆಸಿರುವ ಅವರು, ಇಲ್ಲಿನ ಮೂಲಸೌಕರ್ಯ ಮತ್ತು ಜೀವನಶೈಲಿಗೆ ಫಿದಾ ಆಗಿದ್ದಾರೆ.
ತ್ರಿಶೂರ್ನ ‘ಶೋಭಾ ಸಿಟಿ’ (Sobha City) ವಾಸ: ಇವರು ತ್ರಿಶೂರ್ನ ಪ್ರೀಮಿಯಂ ಗೇಟೆಡ್ ಕಮ್ಯುನಿಟಿಯಾದ ‘ಶೋಭಾ ಸಿಟಿ’ಯಲ್ಲಿ ವಾಸಿಸುತ್ತಿದ್ದಾರೆ. ಇದು ಕೇವಲ ವಸತಿ ಸಂಕೀರ್ಣವಲ್ಲ, ಇದೊಂದು ಸ್ವಾವಲಂಬಿ ಟೌನ್ಶಿಪ್. ಇಲ್ಲಿನ ಸೌಲಭ್ಯಗಳ ಬಗ್ಗೆ ಅವರು ಹೀಗೆ ಹೇಳುತ್ತಾರೆ:
ರೆಸಾರ್ಟ್ನಂತಹ ಅನುಭವ: ಇಲ್ಲಿನ ಎತ್ತರದ ಅಪಾರ್ಟ್ಮೆಂಟ್ಗಳು, ವಿಶಾಲವಾದ ಕೃತಕ ಕೆರೆ, ವಾಕಿಂಗ್ ಪಾತ್ಗಳು ಮತ್ತು ಹಸಿರು ಪರಿಸರವು ಯಾವುದೋ ಐಷಾರಾಮಿ ರೆಸಾರ್ಟ್ನಲ್ಲಿರುವಂತೆ ಭಾಸವಾಗುತ್ತದೆ.
ಭದ್ರತೆ ಮತ್ತು ಶಾಂತಿ: 24 ಗಂಟೆಗಳ ಭದ್ರತೆ, ಹಾರ್ನ್ ಮಾಡುವುದರ ಮೇಲೆ ನಿಷೇಧ ಮತ್ತು ಅತ್ಯುತ್ತಮ ನಿರ್ವಹಣಾ ತಂಡವು ಇಲ್ಲಿನ ಜೀವನವನ್ನು ಸುಲಭಗೊಳಿಸಿದೆ.
ಮನೆಯ ಬಾಗಿಲಲ್ಲೇ ಮಾಲ್: ನಡೆದುಕೊಂಡು ಹೋಗುವ ದೂರದಲ್ಲೇ ಶಾಪಿಂಗ್ ಮಾಲ್ ಇರುವುದು ಮತ್ತೊಂದು ಪ್ಲಸ್ ಪಾಯಿಂಟ್.
ನೆಟ್ಟಿಗರ ಮಿಶ್ರ ಪ್ರತಿಕ್ರಿಯೆ: ಈ ವಿಡಿಯೋ ವೈರಲ್ ಆದ ಬೆನ್ನಲ್ಲೇ ನೆಟ್ಟಿಗರು ಭಿನ್ನವಾಗಿ ಪ್ರತಿಕ್ರಿಯಿಸಿದ್ದಾರೆ. ಕೆಲವರು, ವಿದೇಶಿಯರು ಡಾಲರ್ನಲ್ಲಿ ಗಳಿಸಿ ರೂಪಾಯಿಯಲ್ಲಿ ಖರ್ಚು ಮಾಡುವುದರಿಂದ ಇಲ್ಲಿ ಅವರಿಗೆ ಐಷಾರಾಮಿ ಜೀವನ ಸಾಧ್ಯವಾಗುತ್ತದೆ” ಎಂದರೆ, ಇನ್ನು ಕೆಲವರು ಗೇಟೆಡ್ ಕಮ್ಯುನಿಟಿಯ ಒಳಗಿನ ಜೀವನ ಸುಂದರವಾಗಿರಬಹುದು, ಆದರೆ ಹೊರಬಂದಾಗ ಟ್ರಾಫಿಕ್ ಮತ್ತು ಇತರ ಸಮಸ್ಯೆಗಳನ್ನು ಎದುರಿಸಲೇಬೇಕು” ಎಂದು ವಾಸ್ತವವನ್ನು ನೆನಪಿಸಿದ್ದಾರೆ.
