ಬೆಂಗಳೂರು- ಮಾಜಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರ ರಾಜಕೀಯ ಬಬಲ್ನಲ್ಲಿ ದೀರ್ಘಕಾಲದಿಂದ ಗುರುತಿಸಿಕೊಂಡು ಬಂದಿರುವ ಪ್ರಮುಖ ನಾಯಕರ ನಡುವೆ ಆಂತರಿಕ ಅಸಮಾಧಾನ ಸ್ಫೋಟಗೊಂಡಿದೆ. ಅಧಿಕಾರ ಹಂಚಿಕೆ ಮತ್ತು ರಾಜಕೀಯ ಪ್ರಾಬಲ್ಯದ ಶೀತಲ ಸಮರ ಮುನ್ನೆಲೆಗೆ ಬಂದಿದ್ದು, ಸಚಿವ ಸ್ಥಾನ ವಂಚಿತರು ಹಾಗೂ ಆಪ್ತ ವಲಯದ ಮುಖಂಡರ ನಡುವಿನ ಅಂತರ ಸ್ಪಷ್ಟವಾಗಿ ಗೋಚರಿಸುತ್ತಿದೆ.
ಬೆಂಗಳೂರಿನಲ್ಲಿ ಇತ್ತೀಚೆಗೆ ನಡೆದ ಅಹಿಂದ ಸಮಾವೇಶಕ್ಕೆ ಸಿದ್ದರಾಮಯ್ಯ ಅವರ ಮೂಲ ನಿಷ್ಠಾವತ ಬಣದ ಪ್ರಮುಖರಾದ ಸತೀಶ್ ಜಾರಕಿಹೊಳಿ ಮತ್ತು ಎಚ್.ಸಿ. ಮಹದೇವಪ್ಪ ಅವರನ್ನು ಆಹ್ವಾನಿಸದಿರುವುದು ರಾಜ್ಯ ರಾಜಕೀಯದಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿದೆ.
ಈ ಬೆಳವಣಿಗೆಯ ಬೆನ್ನಲ್ಲೇ ಮಾಧ್ಯಮಗಳೊಂದಿಗೆ ಮಾತನಾಡಿರುವ ಹಿರಿಯ ರಾಜಕಾರಣಿ ಎಚ್.ಸಿ. ಮಹದೇವಪ್ಪ ಅವರು ಸಿದ್ದರಾಮಯ್ಯ ಅವರನ್ನು ನೇರವಾಗಿ ಹೊಗಳುತ್ತಲೇ ತಮ್ಮೊಳಗಿನ ಅಸಮಾಧಾನವನ್ನು ಪರೋಕ್ಷವಾಗಿ ಹೊರಹಾಕಿದ್ದಾರೆ.
ಹುಬ್ಬಳ್ಳಿ ಸಮಾವೇಶದ ಉಲ್ಲೇಖ ಮಾಡಿದ ಮಹದೇವಪ್ಪ, “ನಾನೊಬ್ಬನೇ ನಿಂತು ಅಹಿಂದ ಸಮಾವೇಶವನ್ನು ರೂಪಿಸಿದ್ದೆ. ಅಹಿಂದ ನಾಯಕತ್ವ ಎಂದರೆ ಕೇವಲ ವೇದಿಕೆಯಲ್ಲಿ ಭಾಷಣ ಮಾಡಿ ಹೋಗುವುದಲ್ಲ, ಅದಕ್ಕೆ ಸ್ಪಷ್ಟ ಬದ್ಧತೆ ಬೇಕು” ಎಂದು ಪರೋಕ್ಷವಾಗಿ ಟಾಂಗ್ ನೀಡಿದ್ದಾರೆ.
ಇತ್ತೀಚಿನ ಸಮಾವೇಶವನ್ನು ಕೇವಲ ಒಬಿಸಿ ಸಮಾವೇಶ ಎನ್ನಲಾಗದು ಹಾಗೂ ಕೆಲವು ನಿರ್ದಿಷ್ಟ ವರ್ಗಗಳನ್ನು ಕಡೆಗಣಿಸಿ ಸಮಾವೇಶ ನಡೆಸಿರುವುದು ಸರಿಯಲ್ಲ ಎಂದು ಅತೃಪ್ತಿ ವ್ಯಕ್ತಪಡಿಸಿದ್ದಾರೆ.
ಜೊತೆ ಕಾಯ್ದಿರಿಸುವ ಸಮಾದಾನ
ಜೆಡಿಎಸ್ ಪಕ್ಷಕ್ಕೆ ಸೇರಲಿದ್ದಾರೆ ಎಂಬ ಎಲ್ಲಾ ಊಹಾಪೋಹಗಳನ್ನು ತಳ್ಳಿಹಾಕಿರುವ ಅವರು, ತಾನು ಕಾಂಗ್ರೆಸ್ ಸಂಘಟನೆಯಲ್ಲಿ ಸಕ್ರಿಯವಾಗಿದ್ದು, ವಿನಾಕಾರಣ ದಾರಿ ತಪ್ಪಿಸುವ ಯತ್ನ ನಡೆಯುತ್ತಿದೆ ಎಂದಿದ್ದಾರೆ.
ಸ್ವಯಂ ಘೋಷಣೆಯಿಂದ ಬರುವುದಿಲ್ಲ’
ಈ ಬೆಳವಣಿಗೆಯ ಬೆನ್ನಲ್ಲೇ ಎಚ್.ಸಿ. ಮಹದೇವಪ್ಪ ನೀಡಿರುವ ಹೇಳಿಕೆಗಳು ಅಸಮಾಧಾನದ ಒಳಹರಿವನ್ನು ಬಹಿರಂಗಪಡಿಸಿವೆ.
ಹುಬ್ಬಳ್ಳಿಯಲ್ಲಿ ನಡೆದ ಅಹಿಂದ ಸಮಾವೇಶವನ್ನು ತಾನೊಬ್ಬನೇ ನಿಂತು ರೂಪಿಸಿದ್ದಾಗಿ ಹೇಳಿರುವ ಮಹದೇವಪ್ಪ, ಅಹಿಂದ ನಾಯಕತ್ವ ಎನ್ನುವುದು ಕೇವಲ ವೇದಿಕೆಯಲ್ಲಿ ಭಾಷಣ ಮಾಡಿ ಹೋಗುವುದರಿಂದ ಸಿಗುವುದಿಲ್ಲ ಎಂಬ ಸಂದೇಶ ನೀಡಿದ್ದಾರೆ. ಅಹಿಂದ ನಾಯಕತ್ವ ಸ್ವಯಂ ಘೋಷಣೆಯಾಗುವುದಿಲ್ಲ; ಅದು ಪ್ರಜಾಪ್ರಭುತ್ವದ ಪ್ರಕ್ರಿಯೆಯ ಮೂಲಕ ರೂಪುಗೊಳ್ಳಬೇಕು ಎಂಬುದು ಅವರ ಮಾತಿನ ಸಾರ.
‘ಅಹಿಂದ ಎಂದರೆ ಭಾಷಣ ಮಾಡಿ ಹೋಗುವುದಲ್ಲ, ಸಾಮಾಜಿಕ ನ್ಯಾಯ ಹಾಗೂ ಹಿಂದುಳಿದ ವರ್ಗಗಳ ವಿಚಾರದಲ್ಲಿ ಬದ್ಧತೆಯೊಂದಿಗೆ ಕೆಲಸ ಮಾಡಬೇಕು’ ಎಂಬ ನಿಲುವನ್ನು ಅವರು ಪುನರುಚ್ಚರಿಸಿದ್ದಾರೆ.
ಇದು ನೇರವಾಗಿ ಯಾರನ್ನೂ ಗುರಿಯಾಗಿಸಿಕೊಂಡ ಹೇಳಿಕೆಯಲ್ಲದಿದ್ದರೂ, ಇತ್ತೀಚಿನ ಬೆಂಗಳೂರಿನ ಸಮಾವೇಶದ ಹಿನ್ನೆಲೆಯಲ್ಲಿ ನೋಡಿದರೆ, ಅಹಿಂದ ಚಳವಳಿಯ ಮೇಲೆ ಯಾರಿಗೆ ನೈತಿಕ ಹಾಗೂ ಸಂಘಟನಾ ಹಕ್ಕು ಇದೆ ಎಂಬ ಪ್ರಶ್ನೆಯನ್ನು ಮಹದೇವಪ್ಪ ಎತ್ತಿದ್ದಾರೆ ಎನ್ನುವ ವ್ಯಾಖ್ಯಾನಕ್ಕೆ ಕಾರಣವಾಗಿದೆ.
ವೈಯಕ್ತಿಕ ಸಂಬಂಧದ ಮನವಿ
‘ಸಿದ್ದರಾಮಯ್ಯ ನನ್ನ ದೊಡ್ಡ ಅಣ್ಣನಿದ್ದಂತೆ’
ಕುತೂಹಲಕಾರಿ ಸಂಗತಿಯೆಂದರೆ, ಮಹದೇವಪ್ಪ ತಮ್ಮ ಅಸಮಾಧಾನವನ್ನು ವ್ಯಕ್ತಪಡಿಸುವಾಗಲೂ ಸಿದ್ದರಾಮಯ್ಯ ಅವರೊಂದಿಗಿನ ವೈಯಕ್ತಿಕ ಸಂಬಂಧವನ್ನು ತಳ್ಳಿಹಾಕಿಲ್ಲ.
ಸಿದ್ದರಾಮಯ್ಯ ತಮ್ಮ ಪಾಲಿಗೆ ದೊಡ್ಡ ಅಣ್ಣನಿದ್ದಂತೆ ಎಂದು ಹೇಳಿರುವ ಅವರು, ಇಷ್ಟು ವರ್ಷ ಅವರನ್ನು ಹಾಡಿ ಹೊಗಳಿ ಈಗ ಬೇರೆ ರೀತಿಯಲ್ಲಿ ಮಾತನಾಡಲು ಸಾಧ್ಯವಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ. ತಾನು ಯಾವುದೇ ಗುಂಪಿಗೆ ಸೇರಿದವನಲ್ಲ ಎಂಬ ಸಂದೇಶವನ್ನೂ ನೀಡಿದ್ದಾರೆ.
ಅಂದರೆ, ಮಹದೇವಪ್ಪ ಅವರ ಅಸಮಾಧಾನ ಸಿದ್ದರಾಮಯ್ಯ ವಿರೋಧಿ ರಾಜಕೀಯದತ್ತ ತಿರುಗಿದೆಯೇ ಅಥವಾ ಸಿದ್ದರಾಮಯ್ಯ ಸುತ್ತ ರೂಪುಗೊಳ್ಳುತ್ತಿರುವ ಹೊಸ ರಾಜಕೀಯ ವಲಯದ ಬಗ್ಗೆ ಇರುವ ಅಂತರಂಗದ ಆಕ್ಷೇಪವೇ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ.
ಮಹದೇವಪ್ಪನ ಪ್ರಶ್ನೆ
ಸಚಿವ ಸ್ಥಾನ ಸಿಗದಿರುವ ನೋವು – ಅಹಿಂದ ರಾಜಕೀಯದ ಅಸಮಾಧಾನ?
ಮಹದೇವಪ್ಪ ಸಚಿವ ಸ್ಥಾನದ ಪ್ರಬಲ ಆಕಾಂಕ್ಷಿಯಾಗಿದ್ದರು ಎಂಬುದು ಕಾಂಗ್ರೆಸ್ ವಲಯದಲ್ಲಿ ಬಹುಕಾಲದಿಂದ ಚರ್ಚೆಯಲ್ಲಿರುವ ವಿಚಾರ. ಅಧಿಕಾರದ ಪುನರ್ಹಂಚಿಕೆಯಲ್ಲಿ ತಮ್ಮ ಸ್ಥಾನಮಾನ ಕುಗ್ಗಿದೆ ಎಂಬ ಭಾವನೆ ಅವರಲ್ಲಿದೆಯೇ ಎಂಬ ಪ್ರಶ್ನೆಯೂ ಎದುರಾಗುತ್ತಿದೆ.
ಆದರೆ ಅವರ ಇತ್ತೀಚಿನ ಹೇಳಿಕೆಗಳನ್ನು ಕೇವಲ ಸಚಿವ ಸ್ಥಾನ ಸಿಗದಿರುವ ಅಸಮಾಧಾನ ಎಂದು ಸೀಮಿತಗೊಳಿಸುವುದು ಸರಳೀಕರಣವಾಗಬಹುದು. ಏಕೆಂದರೆ ಅವರು ಪದೇಪದೇ ಸಾಮಾಜಿಕ ನ್ಯಾಯ, ಹಿಂದುಳಿದ ವರ್ಗಗಳ ಸಂಘಟನೆ ಹಾಗೂ ಅಹಿಂದದ ಮೂಲ ಆಶಯಗಳನ್ನೇ ಪ್ರಸ್ತಾಪಿಸುತ್ತಿದ್ದಾರೆ.
ಬೆಂಗಳೂರಿನ ಇತ್ತೀಚಿನ ಸಮಾವೇಶವನ್ನು ಕೇವಲ ‘ಒಬಿಸಿ ಸಮಾವೇಶ’ ಎಂದು ಕರೆಯಬಾರದು; ಕೆಲವು ವರ್ಗಗಳನ್ನು ಹೊರಗಿಟ್ಟು ಸಮಾವೇಶ ನಡೆಸುವುದು ಸರಿಯಲ್ಲ ಎಂಬ ಅವರ ಆಕ್ಷೇಪವೂ ಇದೇ ಹಿನ್ನೆಲೆಯಲ್ಲಿ ಮಹತ್ವ ಪಡೆಯುತ್ತದೆ.
ಜಾರಕಿಹೊಳಿ ಅಸಮಾಧಾನ
ಸತೀಶ್ ಜಾರಕಿಹೊಳಿ ಅಂತರ –
ಸಿದ್ದರಾಮಯ್ಯ ಅವರ ರಾಜಕೀಯ ಪಯಣದಲ್ಲಿ ಸತೀಶ್ ಜಾರಕಿಹೊಳಿ ಕೂಡ ಪ್ರಮುಖ ಸಾಮಾಜಿಕ-ರಾಜಕೀಯ ಮುಖವಾಗಿ ಗುರುತಿಸಿಕೊಂಡವರು. ಆದರೆ ಬೆಂಗಳೂರಿನ ಸಮಾವೇಶಕ್ಕೆ ಅವರಿಗೂ ಆಹ್ವಾನವಿರಲಿಲ್ಲ. ಈ ಬಗ್ಗೆ ಸತೀಶ್ ಜಾರಕಿಹೊಳಿ, ‘ನನ್ನನ್ನು ಕರೆದಿಲ್ಲ, ಹಾಗಾಗಿ ಹೋಗಿಲ್ಲ’ ಎಂದು ಪ್ರತಿಕ್ರಿಯಿಸಿದ್ದಾರೆ.
ಒಂದು ಕಾಲದಲ್ಲಿ ಸಿದ್ದರಾಮಯ್ಯ ಅವರ ಅಹಿಂದ ರಾಜಕೀಯದ ಪ್ರಮುಖ ಬೆಂಬಲಿಗರಾಗಿ ಕಾಣಿಸಿಕೊಂಡಿದ್ದ ಸತೀಶ್ ಜಾರಕಿಹೊಳಿ ಮತ್ತು ಮಹದೇವಪ್ಪ ಇಬ್ಬರೂ ಒಂದೇ ಕಾರ್ಯಕ್ರಮದಿಂದ ಹೊರಗುಳಿದಿರುವುದು ಸಹಜವಾಗಿಯೇ ರಾಜಕೀಯ ಕುತೂಹಲಕ್ಕೆ ಕಾರಣವಾಗಿದೆ.
ಈ ಬೆಳವಣಿಗೆಯ ಹಿನ್ನೆಲೆಯಲ್ಲಿ ಸಿದ್ದರಾಮಯ್ಯ ಅವರ ಹಳೆಯ ಆಪ್ತ ಬಳಗದಲ್ಲಿ ಒಗ್ಗಟ್ಟು ಹಿಂದಿನಂತೆಯೇ ಇದೆಯೇ ಎಂಬ ಪ್ರಶ್ನೆ ಕಾಂಗ್ರೆಸ್ನೊಳಗೇ ಕೇಳಿಬರುತ್ತಿದೆ.
ಹೊಸ ರೂಪದ ಚರ್ಚೆ
ಅಹಿಂದದಿಂದ ‘ಹಿಂದಾ’ವರೆಗೆ?
ಇತ್ತೀಚಿನ ರಾಜಕೀಯ ವಿಶ್ಲೇಷಣೆಗಳಲ್ಲಿ ಸಿದ್ದರಾಮಯ್ಯ ಅವರ ಅಹಿಂದ ರಾಜಕೀಯವನ್ನು ಹೊಸ ರೂಪದಲ್ಲಿ ಕಟ್ಟುವ ಪ್ರಯತ್ನ ನಡೆಯುತ್ತಿದೆ ಎಂಬ ಚರ್ಚೆ ಜೋರಾಗಿದೆ. ಕೆಲವು ವರದಿಗಳ ಪ್ರಕಾರ, ಹಿಂದುಳಿದ ವರ್ಗಗಳು ಮತ್ತು ದಲಿತರನ್ನು ಕೇಂದ್ರವಾಗಿಟ್ಟುಕೊಂಡ ‘ಹಿಂದಾ’ ಸಾಮಾಜಿಕ ಸಮೀಕರಣವನ್ನು ಬಲಪಡಿಸುವ ಸಾಧ್ಯತೆಯ ಕುರಿತೂ ಚರ್ಚೆ ನಡೆದಿದೆ.
ಇದರ ಜೊತೆಗೆ ಡಿಸಿಎಂ ಜಿ. ಪರಮೇಶ್ವರ್ ಮತ್ತು ಸಿದ್ದರಾಮಯ್ಯ ನಡುವೆ ಇತ್ತೀಚಿನ ರಾಜಕೀಯ ಸಮೀಕರಣವೂ ಗಮನ ಸೆಳೆಯುತ್ತಿದೆ. ಸಿದ್ದರಾಮಯ್ಯ ಅವರು ಪರಮೇಶ್ವರ್ ಅವರಿಗೆ ಡಿಸಿಎಂ ಸ್ಥಾನ ದೊರಕುವಲ್ಲಿ ತಮ್ಮ ಪಾತ್ರವಿತ್ತು ಎಂದು ಹೇಳಿದ್ದರೆ, ಪರಮೇಶ್ವರ್ ಕೂಡ ಅದನ್ನು ಸಾರ್ವಜನಿಕವಾಗಿ ಒಪ್ಪಿಕೊಂಡಿದ್ದಾರೆ. ಹೀಗಾಗಿ ದಲಿತ-ಹಿಂದುಳಿದ ವರ್ಗಗಳ ಹೊಸ ರಾಜಕೀಯ ಸಮೀಕರಣದಲ್ಲಿ ಪರಮೇಶ್ವರ್ ಪ್ರಮುಖ ಮುಖವಾಗಬಹುದೇ ಎಂಬ ಚರ್ಚೆಯೂ ಆರಂಭವಾಗಿದೆ.
ಸಕ್ರಿಯ ರಾಜಕಾರಣದ ತಿರುಳು
‘ಸಕ್ರಿಯ ರಾಜಕಾರಣದಲ್ಲಿರಲ್ಲ’ ಎಂದಿದ್ದ ಸಿದ್ದರಾಮಯ್ಯ?
ಮಹದೇವಪ್ಪ, ಸಿದ್ದರಾಮಯ್ಯ ಅವರು ಸಕ್ರಿಯ ರಾಜಕಾರಣದಲ್ಲಿ ಇರಲ್ಲ ಎಂದು ಏಕೆ ಹೇಳಿದ್ದಾರೆ ಎಂಬುದು ತಮಗೆ ಗೊತ್ತಿಲ್ಲ ಎಂದಿದ್ದಾರೆ. ಆದರೆ ಸೆ.6ರ ಸಮಾವೇಶದಲ್ಲಿ ಸಿದ್ದರಾಮಯ್ಯ ಸ್ವತಃ ಈ ವಿಚಾರಕ್ಕೆ ಸ್ಪಷ್ಟನೆ ನೀಡಿದ್ದು, ಸಕ್ರಿಯ ರಾಜಕಾರಣದಲ್ಲಿ ಮುಂದುವರಿಯುತ್ತೇನೆ, ಆದರೆ ಚುನಾವಣಾ ರಾಜಕಾರಣದಲ್ಲಿ ಮತ್ತೆ ಸ್ಪರ್ಧಿಸುವುದಿಲ್ಲ ಎಂದು ಹೇಳಿದ್ದಾರೆ. ಚುನಾವಣಾ ವ್ಯವಸ್ಥೆ ದುಬಾರಿಯಾಗಿದ್ದು, ತಮಗೆ ವಯಸ್ಸಾಗಿರುವುದನ್ನೂ ಅವರು ಉಲ್ಲೇಖಿಸಿದ್ದಾರೆ.
ಇದರಿಂದ ಸಿದ್ದರಾಮಯ್ಯ ಅವರ ಮುಂದಿನ ರಾಜಕೀಯ ಪಾತ್ರದ ಬಗ್ಗೆ ಇದ್ದ ಗೊಂದಲಕ್ಕೆ ಒಂದು ಮಟ್ಟಿಗೆ ತೆರೆ ಬಿದ್ದಂತಾಗಿದೆ. ಅವರು ಚುನಾವಣಾ ಕಣದಿಂದ ಹಿಂದೆ ಸರಿದರೂ, ಪಕ್ಷದೊಳಗಿನ ಸಾಮಾಜಿಕ-ರಾಜಕೀಯ ಪ್ರಭಾವದಿಂದ ಹಿಂದೆ ಸರಿಯುವ ಸೂಚನೆ ನೀಡಿಲ್ಲ.
ಭವಿಷ್ಯದ ದೃಷ್ಠಿಕೋನ
2028ರತ್ತ ಕಾಂಗ್ರೆಸ್ನ ಕಣ್ಣು
ಈ ಬೆಳವಣಿಗೆಗಳನ್ನು 2028ರ ವಿಧಾನಸಭಾ ಚುನಾವಣೆಯ ಹಿನ್ನೆಲೆಯಲ್ಲಿ ನೋಡಿದಾಗ ಮಾತ್ರ ಇದರ ಸಂಪೂರ್ಣ ರಾಜಕೀಯ ಅರ್ಥ ಸ್ಪಷ್ಟವಾಗುತ್ತದೆ. ಸಿದ್ದರಾಮಯ್ಯ ಅವರ ಅಹಿಂದ ಆಧಾರ, ಡಿ.ಕೆ. ಶಿವಕುಮಾರ್ ಅವರ ಸ್ವತಂತ್ರ ರಾಜಕೀಯ ನೆಲೆ, ದಲಿತ ನಾಯಕತ್ವದ ಪ್ರಶ್ನೆ ಹಾಗೂ ಹಿಂದುಳಿದ ವರ್ಗಗಳ ಮತಬ್ಯಾಂಕ್—ಇವೆಲ್ಲವೂ ಮುಂದಿನ ದಿನಗಳಲ್ಲಿ ಕಾಂಗ್ರೆಸ್ನೊಳಗಿನ ಪ್ರಮುಖ ಚರ್ಚೆಗಳಾಗುವ ಸಾಧ್ಯತೆಯಿದೆ.
ಹೀಗಾಗಿ ಮಹದೇವಪ್ಪ ಅವರ ಹೇಳಿಕೆ ಕೇವಲ ಒಬ್ಬ ನಾಯಕರ ವೈಯಕ್ತಿಕ ಅಸಮಾಧಾನವಲ್ಲ; ಅಹಿಂದ ಚಳವಳಿಯ ಮೂಲ ನಾಯಕತ್ವ, ಅದರ ಮುಂದಿನ ಉತ್ತರಾಧಿಕಾರ ಮತ್ತು ಕಾಂಗ್ರೆಸ್ನೊಳಗಿನ ಸಾಮಾಜಿಕ ನ್ಯಾಯದ ರಾಜಕೀಯ ಯಾರ ಕೈಯಲ್ಲಿ ಇರಬೇಕು ಎಂಬ ದೊಡ್ಡ ಪ್ರಶ್ನೆಯ ಮುನ್ನುಡಿಯಾಗಿರಬಹುದು.
ಸಿದ್ದರಾಮಯ್ಯ ಅವರ ಹಳೆಯ ಆಪ್ತರು ಒಂದೊಂದಾಗಿ ತಮ್ಮದೇ ರಾಜಕೀಯ ನಿಲುವುಗಳನ್ನು ವ್ಯಕ್ತಪಡಿಸುತ್ತಿರುವುದು, ಮತ್ತೊಂದೆಡೆ ಸಿದ್ದರಾಮಯ್ಯ ಹೊಸ ಮುಖಗಳೊಂದಿಗೆ ಸಾಮಾಜಿಕ ಸಮೀಕರಣ ಕಟ್ಟುವ ಪ್ರಯತ್ನದಲ್ಲಿದ್ದಾರೆ ಎಂಬ ಚರ್ಚೆ—ಈ ಎರಡೂ ಬೆಳವಣಿಗೆಗಳು ಒಂದೇ ಸಮಯದಲ್ಲಿ ನಡೆಯುತ್ತಿರುವುದು ಕರ್ನಾಟಕ ಕಾಂಗ್ರೆಸ್ ರಾಜಕಾರಣದ ಮುಂದಿನ ಅಧ್ಯಾಯವನ್ನು ಇನ್ನಷ್ಟು ಕುತೂಹಲಕರವಾಗಿಸಿದೆ.
ಒಟ್ಟಿನಲ್ಲಿ, ಸಿದ್ದರಾಮಯ್ಯ ಅವರಿಂದ ಅಹಿಂದ ದೂರವಾಗುತ್ತಿದೆಯೇ ಎಂಬ ಪ್ರಶ್ನೆಗಿಂತ, ಸಿದ್ದರಾಮಯ್ಯ ಅವರ ಸುತ್ತಲಿನ ಹಳೆಯ ಅಹಿಂದ ಬಳಗವೇ ಹೊಸ ರೂಪ ಪಡೆಯುತ್ತಿದೆಯೇ ಎಂಬುದು ಈಗಿನ ಪ್ರಮುಖ ರಾಜಕೀಯ ಪ್ರಶ್ನೆಯಾಗಿದೆ.
ರಾಜ್ಯ ರಾಜಕಾರಣದಲ್ಲಿ ಅಹಿಂದ ಅಸ್ತ್ರವನ್ನು ಬಳಸಿ ಮುಂಚೂಣಿಗೆ ಬಂದಿದ್ದ ಸಿದ್ದರಾಮಯ್ಯ ಅವರ ಪರಮಾಪ್ತರೆ ಎನಿಸಿಕೊಂಡಿದ್ದ ಮಹದೇವಪ್ಪ ಮತ್ತು ಸತೀಶ್ ಜಾರಕಿಹೊಳಿಯಂತಹ ಹಿರಿಯ ನಾಯಕರಿಗೆ ಕಡೆಗಣನೆ ಎದುರಾಗಿರುವುದು ಕಾಂಗ್ರೆಸ್ ಪಕ್ಷದ ಆಂತರಿಕ ಭಿನ್ನಮತವನ್ನು ಮತ್ತಷ್ಟು ಹೆಚ್ಚಿಸಿದೆ.
ಸಿದ್ದರಾಮಯ್ಯ ಅವರ ಸಕ್ರಿಯ ರಾಜಕಾರಣದ ಭವಿಷ್ಯ ಹಾಗೂ ಮುಂದಿನ ರಾಜಕೀಯ ನಡೆಗಳ ಕುರಿತು ಸ್ವತಃ ಅವರ ಆಪ್ತ ವಲಯದಲ್ಲೇ ಗೊಂದಲಗಳು ಮುಂದುವರಿದಿದ್ದು, ಮುಂಬರುವ ದಿನಗಳಲ್ಲಿ ಇದು ಪಕ್ಷದೊಳಗೆ ಯಾವ ಸ್ವರೂಪ ಪಡೆದುಕೊಳ್ಳಲಿದೆ ಎಂಬುದನ್ನು ಕಾದು ನೋಡಬೇಕಿದೆ.
