ಬೆಂಗಳೂರು : ಪ್ರತಿ ವರ್ಷದಂತೆ ಈ ಬಾರಿಯೂ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ (NHAI) ಏಪ್ರಿಲ್ 1 ರಿಂದ ಅನ್ವಯವಾಗುವಂತೆ ರಾಜ್ಯದ ಪ್ರಮುಖ ರಾಷ್ಟ್ರೀಯ ಹೆದ್ದಾರಿಗಳಲ್ಲಿ ಟೋಲ್ ದರವನ್ನು ಪರಿಷ್ಕರಿಸಿದೆ. ಈ ಹೊಸ ದರ ಪಟ್ಟಿಯ ಅನ್ವಯ ರಾಜ್ಯದ ಒಟ್ಟು 9 ರಾಷ್ಟ್ರೀಯ ಹೆದ್ದಾರಿಗಳಲ್ಲಿ ಸಂಚಾರ ಮಾಡುವ ವಾಹನ ಸವಾರರು ಹೆಚ್ಚಿನ ಹಣ ಪಾವತಿಸಬೇಕಿದೆ.
ದರ ಏರಿಕೆ ಆಗಿರುವ ಪ್ರಮುಖ ಹೆದ್ದಾರಿಗಳು
ಬೆಂಗಳೂರು-ಮೈಸೂರು ಎಕ್ಸ್‌ಪ್ರೆಸ್‌ವೇ : ರಾಜ್ಯದ ಅತಿ ಪ್ರಮುಖ ರಸ್ತೆಯಾದ ಇದರ ಟೋಲ್ ದರದಲ್ಲಿ ಸುಮಾರು 3% ರಿಂದ 5% ರಷ್ಟು ಏರಿಕೆಯಾಗಿದೆ. ಕಾರು ಮತ್ತು ಲಘು ವಾಹನಗಳ ದರದಲ್ಲಿ 5 ರಿಂದ 10 ರೂ. ಹೆಚ್ಚಳವಾಗಿದ್ದರೆ, ಭಾರಿ ವಾಹನಗಳಿಗೆ ಹೆಚ್ಚಿನ ಹೊರೆ ಬಿದ್ದಿದೆ.
ಬೆಂಗಳೂರು ಉಪನಗರ ವರ್ತುಲ ರಸ್ತೆ(STRR ): ಹೊಸದಾಗಿ ಆರಂಭವಾಗಿರುವ ದಾಬಸ್‌ಪೇಟೆ-ಹೊಸಕೋಟೆ ರಸ್ತೆಯ ಟೋಲ್ ಕೂಡ ಏರಿಕೆಯಾಗಿದೆ.
ಬಳ್ಳಾರಿ ರಸ್ತೆ(ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ ರಸ್ತೆ) : ಏರ್‌ಪೋರ್ಟ್‌ಗೆ ಹೋಗುವ ಸಾದಹಳ್ಳಿ ಟೋಲ್ ದರದಲ್ಲೂ ಏರಿಕೆಯಾಗಿದ್ದು, ಕಾರುಗಳ ಏಕಮುಖ ಸಂಚಾರಕ್ಕೆ ಈಗ 120 ರೂ. ಪಾವತಿಸಬೇಕಿದೆ.
ಬೆಂಗಳೂರು-ತುಮಕೂರು ರಸ್ತೆ: ನೆಲಮಂಗಲ ಬಳಿಯ ಟೋಲ್ ದರಗಳಲ್ಲೂ ಬದಲಾವಣೆಯಾಗಿದೆ.
ಬೆಂಗಳೂರು-ಕೋಲಾರ ಹೆದ್ದಾರಿ: ಚೆನ್ನೈ ಕಡೆಗೆ ಹೋಗುವ ರಸ್ತೆಯ ಟೋಲ್ ದರಗಳು ಹೆಚ್ಚಳವಾಗಿವೆ.
| ರಾಷ್ಟ್ರೀಯ ಹೆದ್ದಾರಿ ಸಂಖ್ಯೆ | ಮಾರ್ಗ / ಸಂಪರ್ಕಿಸುವ ನಗರಗಳು | ಪ್ರಮುಖ ಟೋಲ್ ಪ್ಲಾಜಾಗಳು |
| NH-48 | ಬೆಂಗಳೂರು – ತುಮಕೂರು – ಹಾವೇರಿ – ಬೆಳಗಾವಿ (ಮುಂಬೈ ಮಾರ್ಗ) | ನೆಲಮಂಗಲ, ಕ್ಯಾತಸಂದ್ರ, ಕರಜೀವನಹಳ್ಳಿ (ತುಮಕೂರು), ಗುಯಿಲಾಲು (ಹಿರಿಯೂರು), ಹೆಬ್ಬಾಳು (ಚಿತ್ರದುರ್ಗ), ಚಳಗೇರಿ (ಹಾವೇರಿ), ಬಂಕಾಪುರ, ಬಾಗೇವಾಡಿ, ವರೂರು, ಹತ್ತರಗಿ, ಕೊಗ್ನೋಳಿ(ಬೆಳಗಾವಿ). |
| NH-275 | ಬೆಂಗಳೂರು – ಮೈಸೂರು ಎಕ್ಸ್‌ಪ್ರೆಸ್‌ವೇ | ಕಣಿಮಿಣಿಕೆ (ಬೆಂಗಳೂರು ಸಮೀಪ), ಶೇಷಗಿರಿಹಳ್ಳಿ, ಗಣಂಗೂರು |
| NH-44 | ಬೆಂಗಳೂರು – ಹೈದರಾಬಾದ್ ಮಾರ್ಗ | ದೇವನಹಳ್ಳಿ (ಅಂತರಾಷ್ಟ್ರೀಯ ವಿಮಾನ ನಿಲ್ದಾಣ ರಸ್ತೆ), ಬಾಗೇಪಲ್ಲಿ. |
| NH-75 (ಪಶ್ಚಿಮ) | ಬೆಂಗಳೂರು – ಹಾಸನ – ಮಂಗಳೂರು | ಕರೇಹಳ್ಳಿ (ನೆಲಮಂಗಲ ಸಮೀಪ), ಶಾಂತಿಗ್ರಾಮ (ಹಾಸನ), ಬ್ರಹ್ಮರಕೂಟ್ಲು |
| NH-75 (ಪೂರ್ವ) | ಬೆಂಗಳೂರು – ಹೊಸಕೋಟೆ – ಕೋಲಾರ | ಹೊಸಕೋಟೆ, ಮುಳಬಾಗಿಲು. |
| NH-66 | ಮಂಗಳೂರು – ಉಡುಪಿ – ಕುಂದಾಪುರ (ಕರಾವಳಿ ಹೆದ್ದಾರಿ) | ತಲಪಾಡಿ, ಹೆಜಮಾಡಿ, ಸಾಸ್ತಾನ (ಉಡುಪಿ), ಶಿರೂರು (ಕುಂದಾಪುರ). |
| NH-50 / 52 | ವಿಜಯಪುರ – ಹೊಸಪೇಟೆ – ಚಿತ್ರದುರ್ಗ | ಮಿಣಜಗಿ, ಗುಳ್ಳಾಲು, ಹಿತ್ತಲ್ (ಹೊಸಪೇಟೆ),ಗುಳ್ಳಾಲು, ಗುಡ್ಡದ ರಂಗವನಹಳ್ಳಿ, ವಾಣಿವಿಲಾಸ ಸಾಗರ. |
| NH-150A | ಹಿರಿಯೂರು – ಬಳ್ಳಾರಿ – ಜೇವರ್ಗಿ | ಚಳ್ಳಕೆರೆ ಮತ್ತು ಮೊಳಕಾಲ್ಮೂರು ಸಮೀಪದ ಕೇಂದ್ರಗಳು. |
| NH-766 | ಮೈಸೂರು – ಗುಂಡ್ಲುಪೇಟೆ (ಕೇರಳ ಮಾರ್ಗ) | ಕಡಕೊಳ |
ಏಪ್ರಿಲ್ 1 ರಿಂದ ಜಾರಿಗೆ ಬರುವ ಹೊಸ ನಿಯಮಗಳು
ವಾರ್ಷಿಕ ಪಾಸ್ ದರ ಏರಿಕೆ: : ಎನ್‌ಎಚ್‌ಎಐ ಫಾಸ್ಟ್ಯಾಗ್ (FASTag) ವಾರ್ಷಿಕ ಪಾಸ್ ದರವನ್ನು 3,000 ರೂ.ನಿಂದ 3,075 ರೂ.ಗೆ ಹೆಚ್ಚಿಸಿದೆ.
ಇ-ನೋಟಿಸ್(e-notice) ವ್ಯವಸ್ಥೆ : ಟೋಲ್ ಪಾವತಿಸದೆ ಹೋಗುವ ವಾಹನಗಳಿಗೆ ಈಗ ಇ-ನೋಟಿಸ್ ಜಾರಿಯಾಗಲಿದೆ. ನೋಟಿಸ್ ಬಂದ 72 ಗಂಟೆಯೊಳಗೆ ಹಣ ಪಾವತಿಸಿದರೆ ಮೂಲ ದರ ಅನ್ವಯವಾಗುತ್ತದೆ, ಇಲ್ಲದಿದ್ದರೆ ದುಪ್ಪಟ್ಟು ದಂಡ ತೆರಬೇಕಾಗುತ್ತದೆ.
ವಾಹನ ವರ್ಗಾವಣೆ ನಿರ್ಬಂಧ : ಟೋಲ್ ಬಾಕಿ ಉಳಿಸಿಕೊಂಡಿರುವ ವಾಹನಗಳಿಗೆ ಫಿಟ್‌ನೆಸ್ ಸರ್ಟಿಫಿಕೇಟ್ ಅಥವಾ ವಾಹನ ವರ್ಗಾವಣೆಗೆ ಎನ್‌ಒಸಿ (NOC) ಸಿಗುವುದಿಲ್ಲ.
ಯಾವ ವಾಹನಕ್ಕೆ ಎಷ್ಟು ಏರಿಕೆ ?
ಸಾಮಾನ್ಯವಾಗಿ ಕಾರು, ಜೀಪ್ ಮತ್ತು ವ್ಯಾನ್‌ಗಳಂತಹ ಲಘು ವಾಹನಗಳಿಗೆ ಒಂದು ಬದಿಯ ಸಂಚಾರಕ್ಕೆ 5 ರೂ.ನಿಂದ 10 ರೂ. ಹೆಚ್ಚಳವಾಗಿದ್ದರೆ, ಬಸ್ ಮತ್ತು ಟ್ರಕ್‌ಗಳಂತಹ ಭಾರಿ ವಾಹನಗಳಿಗೆ 15 ರೂ.ನಿಂದ 30 ರೂ.ವರೆಗೆ ಏರಿಕೆಯಾಗಿದೆ.
ಗಮನಿಸಿ: ಹಣದುಬ್ಬರ ಮತ್ತು ರಸ್ತೆ ನಿರ್ವಹಣಾ ವೆಚ್ಚವನ್ನು ಆಧರಿಸಿ ಪ್ರತಿ ವರ್ಷ ಏಪ್ರಿಲ್‌ನಲ್ಲಿ ಈ ದರ ಪರಿಷ್ಕರಣೆ ಮಾಡಲಾಗುತ್ತದೆ ಎಂದು ಎನ್‌ಎಚ್‌ಎಐ ಅಧಿಕಾರಿಗಳು ತಿಳಿಸಿದ್ದಾರೆ.
ಪ್ರಸ್ತುತ ಇರುವ ದರಗಳು (ಬೆಂಗಳೂರು-ಮೈಸೂರು ಎಕ್ಸ್‌ಪ್ರೆಸ್‌ವೇ)
| ವಾಹನದ ಪ್ರಕಾರ | ಏಕಮುಖ ಸಂಚಾರ (ರೂ.) | ಹೋಗಿ ಬರಲು (ರೂ.) |
| ಕಾರು / ಜೀಪ್ / ವ್ಯಾನ್ | 180 | 270 |
| ಲಘು ವಾಣಿಜ್ಯ ವಾಹನಗಳು | 290 | 430 |
| ಬಸ್ / ಟ್ರಕ್ (2-ಆಕ್ಸಲ್) | 605 | 905 |
| 3-ಆಕ್ಸಲ್ ವಾಹನಗಳು | 660 | 990 |
| ಭಾರಿ ಯಂತ್ರೋಪಕರಣ ವಾಹನಗಳು | 945 | 1420 |
| 7 ಅಥವಾ ಹೆಚ್ಚು ಆಕ್ಸಲ್ ವಾಹನಗಳು | 1155 | 1730 |
