ಸಾಲದ ಇಎಂಐ (EMI) ಪಾವತಿಯಲ್ಲಿ ವಿಳಂಬವಾದ ಸಾಲಗಾರರಿಗೆ ಕಿರುಕುಳ ನೀಡುವುದನ್ನು ತಡೆಯಲು ಭಾರತೀಯ ರಿಸರ್ವ್ ಬ್ಯಾಂಕ್ (RBI) ಹೊಸ ಸಾಲ ವಸೂಲಿ ನಿಯಮಾವಳಿ ಪ್ರಕಟಿಸಿದೆ. ಈ ಹೊಸ ನಿಯಮಗಳು 2027ರ ಜನವರಿ 1ರಿಂದ ಜಾರಿಗೆ ಬರಲಿದ್ದು, ಬ್ಯಾಂಕ್ಗಳು ಮತ್ತು ಇತರ ನಿಯಂತ್ರಿತ ಹಣಕಾಸು ಸಂಸ್ಥೆಗಳು ಕಡ್ಡಾಯವಾಗಿ ಪಾಲಿಸಬೇಕು.
ಇಎಂಐ ಪಾವತಿಯಲ್ಲಿ ವಿಳಂಬವಾದ ಸಾಲಗಾರರಿಗೆ ಕಿರುಕುಳ ನೀಡುವುದನ್ನು ತಡೆಯುವ ಉದ್ದೇಶದಿಂದ ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್ಬಿಐ) ಸಾಲ ವಸೂಲಿಗೆ ಹೊಸ ಕಟ್ಟುನಿಟ್ಟಿನ ನಿಯಮಗಳನ್ನು ಪ್ರಕಟಿಸಿದೆ. ಇನ್ನು ಮುಂದೆ ವಸೂಲಿ ಏಜೆಂಟ್ಗಳು ಬೆಳಿಗ್ಗೆ 8ರಿಂದ ಸಂಜೆ 7 ಗಂಟೆಯವರೆಗೆ ಮಾತ್ರ ಸಾಲಗಾರರನ್ನು ಸಂಪರ್ಕಿಸಬಹುದಾಗಿದ್ದು, ಬೆದರಿಕೆ, ನಿಂದನೆ, ಪದೇಪದೇ ಕರೆ ಮಾಡಿ ಕಿರುಕುಳ ನೀಡುವುದು ಸೇರಿದಂತೆ ಯಾವುದೇ ಆಕ್ರಮಣಕಾರಿ ವಸೂಲಿ ಕ್ರಮಗಳಿಗೆ ಅವಕಾಶ ಇರುವುದಿಲ್ಲ. ಈ ನಿಯಮಗಳು 2027ರ ಜನವರಿ 1ರಿಂದ ಜಾರಿಗೆ ಬರಲಿವೆ.
ಬೆಳಿಗ್ಗೆ 8ರಿಂದ ಸಂಜೆ 7ರವರೆಗೆ ಮಾತ್ರ ಸಂಪರ್ಕ
ಹೊಸ ನಿಯಮಗಳ ಪ್ರಕಾರ, ಸಾಲಗಾರರನ್ನು ಬೆಳಿಗ್ಗೆ 8 ಗಂಟೆಯಿಂದ ಸಂಜೆ 7 ಗಂಟೆಯವರೆಗೆ ಮಾತ್ರ ಬ್ಯಾಂಕ್ ಅಥವಾ ವಸೂಲಿ ಏಜೆಂಟ್ಗಳು ಸಂಪರ್ಕಿಸಬಹುದು. ಸಾಲಗಾರರೇ ವಿಶೇಷವಾಗಿ ಅನುಮತಿ ನೀಡಿದರೆ ಮಾತ್ರ ಈ ಸಮಯದ ಹೊರತಾಗಿ ಸಂಪರ್ಕಿಸಲು ಅವಕಾಶವಿದೆ.
ವೈಯಕ್ತಿಕ ಸಂಕಷ್ಟದ ವೇಳೆ ಕಿರುಕುಳ ನಿಷೇಧ
ಕುಟುಂಬದಲ್ಲಿ ಮರಣ, ವೈದ್ಯಕೀಯ ತುರ್ತು ಪರಿಸ್ಥಿತಿ ಅಥವಾ ಮದುವೆ ಸಮಾರಂಭದಂತಹ ಸೂಕ್ಷ್ಮ ಸಂದರ್ಭಗಳಲ್ಲಿ ಸಾಲಗಾರರನ್ನು ಸಂಪರ್ಕಿಸಬಾರದು ಎಂದು ಆರ್ಬಿಐ ಸೂಚಿಸಿದೆ.
ಬೆದರಿಕೆ, ಅವಮಾನಕ್ಕೆ ಸಂಪೂರ್ಣ ನಿಷೇಧ
ಸಾಲ ವಸೂಲಿ ವೇಳೆ ಬೆದರಿಕೆ, ನಿಂದನೆ ಅಥವಾ ಭಯ ಹುಟ್ಟಿಸುವ ಭಾಷೆ ಬಳಸುವುದನ್ನು ಸಂಪೂರ್ಣವಾಗಿ ನಿಷೇಧಿಸಲಾಗಿದೆ. ಅನಾಮಧೇಯ ಕರೆಗಳು, ಪದೇಪದೇ ಕರೆ ಮಾಡಿ ಕಿರುಕುಳ ನೀಡುವುದು, ಕುಟುಂಬ ಸದಸ್ಯರು, ಆಸ್ತಿ ಅಥವಾ ಗೌರವಕ್ಕೆ ಧಕ್ಕೆ ಉಂಟುಮಾಡುವ ರೀತಿಯ ಬೆದರಿಕೆ ಹಾಕುವುದಕ್ಕೂ ಅವಕಾಶವಿರುವುದಿಲ್ಲ.
ಸಾಮಾಜಿಕ ಜಾಲತಾಣಗಳಲ್ಲಿ ಅವಮಾನ ಮಾಡುವಂತಿಲ್ಲ
ಸಾಲಗಾರರ ವೈಯಕ್ತಿಕ ಮಾಹಿತಿ, ಫೋಟೋ, ವಿಡಿಯೊ ಅಥವಾ ಧ್ವನಿಮುದ್ರಣಗಳನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿ ಅವಮಾನಿಸುವುದನ್ನು ಆರ್ಬಿಐ ಕಟ್ಟುನಿಟ್ಟಾಗಿ ನಿಷೇಧಿಸಿದೆ.
ಮನೆಗೆ ಬರುವ ಮುನ್ನ ಒಂದು ದಿನದ ಮುಂಚಿತ ಮಾಹಿತಿ ಕಡ್ಡಾಯ
ವಸೂಲಿ ಏಜೆಂಟ್ ಮೊದಲ ಬಾರಿಗೆ ಮನೆಗೆ ಅಥವಾ ನೇರವಾಗಿ ಭೇಟಿ ನೀಡುವ ಮುನ್ನ ಕನಿಷ್ಠ ಒಂದು ದಿನ ಮುಂಚಿತವಾಗಿ ಸಾಲಗಾರರಿಗೆ ಮಾಹಿತಿ ನೀಡಬೇಕು. ಜೊತೆಗೆ, ಯಾವ ವಸೂಲಿ ಸಂಸ್ಥೆ ಪ್ರಕರಣವನ್ನು ನಿರ್ವಹಿಸುತ್ತಿದೆ ಎಂಬ ವಿವರಗಳನ್ನೂ ಬ್ಯಾಂಕ್ ನೀಡಬೇಕು.
ಗುರುತಿನ ಚೀಟಿ ಕಡ್ಡಾಯ
ವಸೂಲಿ ಏಜೆಂಟ್ಗಳು ಗುರುತಿನ ಚೀಟಿ, ಅಧಿಕಾರ ಪತ್ರ ಹಾಗೂ ಸಂಬಂಧಿತ ನೋಟಿಸ್ಗಳನ್ನು ಕಡ್ಡಾಯವಾಗಿ ಹೊಂದಿರಬೇಕು. ಅಧಿಕಾರ ಪತ್ರದಲ್ಲಿ ವಸೂಲಿ ಸಂಸ್ಥೆ ಮತ್ತು ಬ್ಯಾಂಕ್ನ ದೂರು ಪರಿಹಾರ ಅಧಿಕಾರಿಯ ಸಂಪರ್ಕ ವಿವರಗಳೂ ಇರಬೇಕು.
ವಸೂಲಿ ಕರೆಗಳ ದಾಖಲೆ ಕಡ್ಡಾಯ
ಬ್ಯಾಂಕ್ಗಳು ವಸೂಲಿ ಸಂಬಂಧಿತ ಎಲ್ಲಾ ಕರೆಗಳ ಸಮಯ, ಕರೆ ಮಾಡಿದ ಸಂಖ್ಯೆ ಹಾಗೂ ಸಂಭಾಷಣೆಯ ದಾಖಲೆಗಳನ್ನು ಕನಿಷ್ಠ ಆರು ತಿಂಗಳು ಸಂರಕ್ಷಿಸಬೇಕು. ವಸೂಲಿ ಕೆಲಸವನ್ನು ಹೊರಗುತ್ತಿಗೆಗೆ ನೀಡಿದರೂ ಅದರ ಜವಾಬ್ದಾರಿ ಬ್ಯಾಂಕ್ನದ್ದೇ ಎಂದು ಆರ್ಬಿಐ ಸ್ಪಷ್ಟಪಡಿಸಿದೆ.
ವೈಯಕ್ತಿಕ ಮಾಹಿತಿಗೆ ಹೆಚ್ಚಿನ ರಕ್ಷಣೆ
ವಸೂಲಿ ಕಾರ್ಯಕ್ಕೆ ಅಗತ್ಯವಿರುವ ಮಾಹಿತಿಯನ್ನು ಮಾತ್ರ ಏಜೆಂಟ್ಗಳಿಗೆ ನೀಡಬೇಕು. ಗ್ರಾಹಕರ ವೈಯಕ್ತಿಕ ಮಾಹಿತಿಯ ದುರುಪಯೋಗವಾಗದಂತೆ ಬ್ಯಾಂಕ್ಗಳು ಸೂಕ್ತ ಭದ್ರತಾ ಕ್ರಮಗಳನ್ನು ಕೈಗೊಳ್ಳಬೇಕು.
ಮೊಬೈಲ್, ಲ್ಯಾಪ್ಟಾಪ್ಗಳನ್ನು ರಿಮೋಟ್ ಮೂಲಕ ಲಾಕ್ ಮಾಡುವ ನಿಯಮ
ಆರ್ಬಿಐ ಮೊದಲ ಬಾರಿಗೆ ತಂತ್ರಜ್ಞಾನ ಆಧಾರಿತ ಸಾಲ ವಸೂಲಿ ವಿಧಾನಕ್ಕೂ ನಿಯಮ ರೂಪಿಸಿದೆ.
- ಸಾಲವನ್ನು ಆ ಮೊಬೈಲ್, ಟ್ಯಾಬ್ಲೆಟ್ ಅಥವಾ ಲ್ಯಾಪ್ಟಾಪ್ ಖರೀದಿಸಲು ಪಡೆದಿದ್ದರೆ ಮಾತ್ರ ರಿಮೋಟ್ ಮೂಲಕ ಸಾಧನವನ್ನು ನಿರ್ಬಂಧಿಸಬಹುದು.
- ಸಾಮಾನ್ಯ ವೈಯಕ್ತಿಕ ಸಾಲ ಪಡೆದವರ ಈಗಾಗಲೇ ಇರುವ ಮೊಬೈಲ್ ಅಥವಾ ಲ್ಯಾಪ್ಟಾಪ್ ಅನ್ನು ರಿಮೋಟ್ ಮೂಲಕ ಲಾಕ್ ಮಾಡುವಂತಿಲ್ಲ.
- ಇಎಂಐ ಬಾಕಿಯಾದ ತಕ್ಷಣ ಸಾಧನವನ್ನು ಲಾಕ್ ಮಾಡಲು ಅವಕಾಶವಿಲ್ಲ.
- 30 ದಿನಗಳಿಗೂ ಹೆಚ್ಚು ಬಾಕಿ ಉಳಿದರೆ ಮಾತ್ರ ನಿರ್ಬಂಧ ಪ್ರಾರಂಭಿಸಬಹುದು.
- 60 ದಿನಗಳಿಗೂ ಹೆಚ್ಚು ಬಾಕಿ ಉಳಿದರೆ ಸಂಪೂರ್ಣ ನಿರ್ಬಂಧ ಹೇರಬಹುದು.
ಅಗತ್ಯ ಸೇವೆಗಳು ಮುಂದುವರಿಯಲೇಬೇಕು
ಸಾಧನಕ್ಕೆ ನಿರ್ಬಂಧ ಹೇರಿದರೂ ಒಳಬರುವ ಕರೆಗಳು, ಎಸ್ಎಂಎಸ್, ತುರ್ತು ಸೇವೆಗಳು ಹಾಗೂ ಉದ್ಯೋಗಕ್ಕೆ ಅಗತ್ಯವಿರುವ ಪ್ರಮುಖ ಸೌಲಭ್ಯಗಳನ್ನು ಸ್ಥಗಿತಗೊಳಿಸುವಂತಿಲ್ಲ.ಸಾಲ ವಸೂಲಿ ಹೆಸರಿನಲ್ಲಿ ಸಂಪರ್ಕಗಳು, ಫೋಟೋಗಳು, ವಿಡಿಯೊಗಳು, ಕರೆ ದಾಖಲೆಗಳು, ಎಸ್ಎಂಎಸ್ ಹಾಗೂ ಸ್ಥಳ ಮಾಹಿತಿ (Location History) ಸೇರಿದಂತೆ ಯಾವುದೇ ವೈಯಕ್ತಿಕ ಮಾಹಿತಿಯನ್ನು ಬ್ಯಾಂಕ್ ಅಥವಾ ವಸೂಲಿ ಸಂಸ್ಥೆಗಳು ಪಡೆಯುವಂತಿಲ್ಲ.
ಪಾವತಿ ಮಾಡಿದ ಬಳಿಕ ಒಂದು ಗಂಟೆಯೊಳಗೆ ಸಾಧನ ಸಕ್ರಿಯಗೊಳಿಸಬೇಕು
ಸಾಲಗಾರರು ಬಾಕಿ ಮೊತ್ತ ಪಾವತಿಸಿದ ಬಳಿಕ ಸಾಮಾನ್ಯವಾಗಿ ಒಂದು ಗಂಟೆಯೊಳಗೆ ಸಾಧನವನ್ನು ಮರುಸಕ್ರಿಯಗೊಳಿಸಬೇಕು.ನಿಗದಿತ ಅವಧಿಯೊಳಗೆ ಸಾಧನವನ್ನು ಮರುಸಕ್ರಿಯಗೊಳಿಸದಿದ್ದರೆ, ಪ್ರತಿ ಗಂಟೆ ವಿಳಂಬಕ್ಕೆ ₹250 ಪರಿಹಾರ ನೀಡಬೇಕಾಗುತ್ತದೆ. ಆದರೆ ಈ ಪರಿಹಾರದ ಗರಿಷ್ಠ ಮೊತ್ತವು ಬಾಕಿ ಸಾಲದ ಮೊತ್ತಕ್ಕೆ ಅನುಗುಣವಾಗಿರುತ್ತದೆ.ರಿಮೋಟ್ ನಿರ್ಬಂಧದಂತಹ ಷರತ್ತುಗಳನ್ನು ದೀರ್ಘ ಸಾಲ ಒಪ್ಪಂದದಲ್ಲಿ ಅಡಗಿಸಿಡದೆ, ಸಾಲ ಮಂಜೂರು ಮಾಡುವಾಗಲೇ ಸ್ಪಷ್ಟವಾಗಿ ಗ್ರಾಹಕರಿಗೆ ತಿಳಿಸಬೇಕು ಎಂದು ಆರ್ಬಿಐ ನಿರ್ದೇಶಿಸಿದೆ.
