ಹೈದರಾಬಾದ್: ವೈದ್ಯಕೀಯ ವೃತ್ತಿಯಲ್ಲಿ ದೀರ್ಘಕಾಲ ಸೇವೆ ಸಲ್ಲಿಸುವವರ ಸಂಖ್ಯೆ ಕಡಿಮೆಯಾಗುತ್ತಿರುವ ಈ ಕಾಲದಲ್ಲಿ, 92 ವರ್ಷದ ಸ್ತ್ರೀರೋಗ ತಜ್ಞೆ ಡಾ. ಸೂರಿ ಶ್ರೀಮತಿ ಅಪರೂಪದ ಮಾದರಿಯಾಗಿದ್ದಾರೆ. ಆರು ದಶಕಗಳಿಗೂ ಹೆಚ್ಚು ಕಾಲ ವೈದ್ಯಕೀಯ ಸೇವೆ ಸಲ್ಲಿಸಿರುವ ಅವರು ಇಂದಿಗೂ ಶಸ್ತ್ರಚಿಕಿತ್ಸೆ ನಡೆಸಿ, ರೋಗಿಗಳಿಗೆ ಚಿಕಿತ್ಸೆ ನೀಡುತ್ತಾ ಸಕ್ರಿಯವಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ.
ಆಗಸ್ಟ್ 5ರಂದು BBC Global Women ತನ್ನ ಇನ್ಸ್ಟಾಗ್ರಾಂ ಪುಟದಲ್ಲಿ ಹಂಚಿಕೊಂಡ ವಿಡಿಯೊ ಮೂಲಕ ಅವರ ಬದುಕಿನ ಪಯಣ ಮತ್ತೊಮ್ಮೆ ಗಮನ ಸೆಳೆದಿದೆ. 2026ರ ಮಾರ್ಚ್ನಲ್ಲಿ ಪ್ರಕಟವಾದ The Better India ವರದಿ ಪ್ರಕಾರ, ಡಾ. ಶ್ರೀಮತಿ ತಮ್ಮ ವೃತ್ತಿ ಜೀವನದಲ್ಲಿ ಸುಮಾರು 2 ಲಕ್ಷ ಶಿಶುಗಳಿಗೆ ಜನ್ಮ ನೀಡಲು ನೆರವಾಗಿದ್ದಾರೆ.
1958ರಲ್ಲಿ ವೈದ್ಯಕೀಯ ಪದವಿ ಪಡೆದವರು
ಡಾ. ಶ್ರೀಮತಿ ಅವರು 1958ರಲ್ಲಿ ವೈದ್ಯಕೀಯ ಪದವಿ ಪೂರ್ಣಗೊಳಿಸಿ, ನಂತರ 1965ರ ಅಕ್ಟೋಬರ್ನಲ್ಲಿ ಉಸ್ಮಾನಿಯಾ ವಿಶ್ವವಿದ್ಯಾಲಯದಿಂದ ಪ್ರಸೂತಿ ಮತ್ತು ಸ್ತ್ರೀರೋಗ ವಿಭಾಗದಲ್ಲಿ ಎಂ.ಡಿ. ಪದವಿ ಪಡೆದರು.ಬಾಲ್ಯದಲ್ಲಿ ತಮ್ಮ ಸಹೋದರ-ಸಹೋದರಿಯರು ಸಿಡುಬು (Smallpox) ರೋಗದಿಂದ ತೀವ್ರವಾಗಿ ಬಳಲಿದ್ದನ್ನು ಕಂಡ ಬಳಿಕ ವೈದ್ಯೆಯಾಗಬೇಕು ಎಂಬ ಸಂಕಲ್ಪ ಮೂಡಿತ್ತು ಎಂದು ಅವರು ತಿಳಿಸಿದ್ದಾರೆ.
ಆ ಕಾಲದಲ್ಲಿ ಮಹಿಳೆಯರು ವೈದ್ಯಕೀಯ ಶಿಕ್ಷಣ ಪಡೆಯುವುದು, ಮೃತದೇಹಗಳ ಅಧ್ಯಯನ ಮಾಡುವುದು ಸಮಾಜದಲ್ಲಿ ವಿರೋಧಕ್ಕೆ ಕಾರಣವಾಗಿತ್ತು. “ನಮ್ಮ ಕುಟುಂಬವನ್ನು ಸಾಮಾಜಿಕವಾಗಿ ಬಹಿಷ್ಕರಿಸಲಾಗಿತ್ತು. ಸಂಬಂಧಿಕರು ಕೂಡ ನಮ್ಮೊಂದಿಗೆ ಮಾತನಾಡುವುದನ್ನು ನಿಲ್ಲಿಸಿದ್ದರು. ಆದರೂ ನಾನು ಹಿಂದೆ ಸರಿಯಲಿಲ್ಲ,” ಎಂದು ಅವರು ಹೇಳಿದ್ದಾರೆ.
ಒಂದೇ ಸಮಯದಲ್ಲಿ ಮೂರು ಜವಾಬ್ದಾರಿ ನಿರ್ವಹಿಸಿದ ವೈದ್ಯೆ
1959ರಲ್ಲಿ ಸಂಗಾರೆಡ್ಡಿಯ ಸರ್ಕಾರಿ ಆಸ್ಪತ್ರೆಯಲ್ಲಿ ಅವರು ಮೊದಲ ಬಾರಿಗೆ ಸ್ವತಂತ್ರವಾಗಿ ಹೆರಿಗೆ ನಡೆಸಿದರು. ಕೇವಲ 15 ವರ್ಷದ ಬಾಲಕಿಗೆ ಸಿಸೇರಿಯನ್ ಶಸ್ತ್ರಚಿಕಿತ್ಸೆ ಮಾಡಬೇಕಾದ ಪರಿಸ್ಥಿತಿ ಎದುರಾಯಿತು.ಆ ಸಮಯದಲ್ಲಿ ಅಗತ್ಯ ವೈದ್ಯಕೀಯ ಸಿಬ್ಬಂದಿ ಇರಲಿಲ್ಲ. “ನಾನೇ ಅನಸ್ಥೀಷಿಯಾ ತಜ್ಞೆ, ನಾನೇ ಸ್ತ್ರೀರೋಗ ತಜ್ಞೆ, ನಾನೇ ಮಕ್ಕಳ ವೈದ್ಯೆ,” ಎಂದು ಅವರು ಆ ದಿನಗಳನ್ನು ನೆನಪಿಸಿಕೊಂಡಿದ್ದಾರೆ.
ಮೂರು ತಲೆಮಾರುಗಳಿಗೆ ಚಿಕಿತ್ಸೆ
ದೀರ್ಘ ವೈದ್ಯಕೀಯ ಸೇವೆಯ ಪರಿಣಾಮವಾಗಿ ಇಂದು ಒಂದೇ ಕುಟುಂಬದ ಮೂರು ತಲೆಮಾರುಗಳ ಮಹಿಳೆಯರಿಗೆ ಅವರು ಚಿಕಿತ್ಸೆ ನೀಡಿದ್ದಾರೆ.ರೋಗಿ ಕೋಟೇರು ತುಳಸಿ ಅವರು, ತಮ್ಮ ಮೂರು ಸಿಸೇರಿಯನ್ ಹೆರಿಗೆಗಳನ್ನು ಡಾ. ಶ್ರೀಮತಿ ಅವರೇ ನಡೆಸಿದ್ದಾರೆ ಎಂದು ಹೇಳಿದ್ದು, “ಅವರ ವಯಸ್ಸು ನೋಡಿ ಮೊದಲಿಗೆ ಆತಂಕವಾಗಿತ್ತು. ಆದರೆ ಅವರು ನನಗೆ ಸಂಪೂರ್ಣ ಆತ್ಮವಿಶ್ವಾಸ ತುಂಬಿದರು,” ಎಂದು ತಿಳಿಸಿದ್ದಾರೆ.ಅವರ ಹಳೆಯ ವಿದ್ಯಾರ್ಥಿನಿ ಹಾಗೂ ವೈದ್ಯೆ ಡಾ. ರಜನಿ ಕುಮಾರಿ, “ಅವರ ಕೈಗಳು ನಡುಗುವುದೇ ಇಲ್ಲ. ಕೆಲವೊಮ್ಮೆ ನಮ್ಮ ಕೈಗಳು ನಡುಗಬಹುದು, ಆದರೆ ಅವರದು ಅಲ್ಲ,” ಎಂದು ಪ್ರಶಂಸಿಸಿದ್ದಾರೆ.
ಶಿಸ್ತುಬದ್ಧ ಜೀವನಶೈಲಿ
ಡಾ. ಶ್ರೀಮತಿ ಪ್ರತಿದಿನ ಬೆಳಿಗ್ಗೆ 5.30ಕ್ಕೆ ಯೋಗಾಭ್ಯಾಸ ಆರಂಭಿಸುತ್ತಾರೆ. ಈ ಅಭ್ಯಾಸವನ್ನು ಅವರಿಗೆ ಅವರ ತಂದೆ ಸೂರಿ ರಾಘವ ದೀಕ್ಷಿತುಲು, ಆಂಧ್ರ ಪ್ರದೇಶದ ಯೋಗ ಪ್ರವರ್ತಕರಲ್ಲಿ ಒಬ್ಬರು, ಕಲಿಸಿಕೊಟ್ಟಿದ್ದರು.ಬೆಳಿಗ್ಗೆ 8.30ರ ವೇಳೆಗೆ ದಿನದ ಶಸ್ತ್ರಚಿಕಿತ್ಸೆಗಳ ಯೋಜನೆ ರೂಪಿಸಿ, ರೋಗಿಗಳ ಮಾಹಿತಿಯನ್ನು ಪರಿಶೀಲಿಸುತ್ತಾರೆ. ಸಂಜೆ ವೇಳೆ 1999ರಲ್ಲಿ ಆರಂಭಿಸಿದ ತಮ್ಮ ಮನೆ ಕ್ಲಿನಿಕ್ನಲ್ಲಿ ರೋಗಿಗಳನ್ನು ನೋಡುತ್ತಾರೆ.ಇಂದಿಗೂ ಸ್ವತಃ ಕಾರು ಚಾಲನೆ ಮಾಡಿ ಓಡಾಡುತ್ತಾರೆ. ವೈದ್ಯಕೀಯ ಕ್ಷೇತ್ರದ ಹೊಸ ಬೆಳವಣಿಗೆಗಳ ಬಗ್ಗೆ ತಿಳಿದುಕೊಳ್ಳಲು ಸಮ್ಮೇಳನಗಳಲ್ಲಿ ಭಾಗವಹಿಸಿ, ವೈದ್ಯಕೀಯ ಜರ್ನಲ್ಗಳನ್ನು ಓದುತ್ತಾ ನಿರಂತರವಾಗಿ ಜ್ಞಾನವನ್ನು ನವೀಕರಿಸಿಕೊಳ್ಳುತ್ತಾರೆ.
ನಿವೃತ್ತಿ ಬಗ್ಗೆ ಯಾವುದೇ ಯೋಚನೆ ಇಲ್ಲ
92 ವರ್ಷ ವಯಸ್ಸಾದರೂ ವೈದ್ಯಕೀಯ ಸೇವೆಯಿಂದ ಹಿಂದೆ ಸರಿಯುವ ಯಾವುದೇ ಉದ್ದೇಶ ಡಾ. ಶ್ರೀಮತಿ ಅವರಿಗೆ ಇಲ್ಲ.”ಸಹಾಯಕ್ಕಾಗಿ ಅನೇಕ ಜನರು ನನ್ನ ಮನೆ ಬಾಗಿಲು ತಟ್ಟುತ್ತಾರೆ. ಅದಕ್ಕಾಗಿಯೇ ನಾನು ಸೇವೆಯನ್ನು ಮುಂದುವರಿಸಲು ಬಯಸುತ್ತೇನೆ,” ಎಂದು ಅವರು ಹೇಳಿದ್ದಾರೆ. ಅವರ ಮಾತಿನಲ್ಲಿ, “ಜನರಿಗೆ ಅಗತ್ಯವಿರುವಾಗ ಅವರಿಗೆ ಚಿಕಿತ್ಸೆ ನೀಡುವುದನ್ನು ನಾವು ನಿರಾಕರಿಸಲು ಸಾಧ್ಯವಿಲ್ಲ. ವೈದ್ಯಕೀಯ ಸೇವೆಯ ನಿಜವಾದ ಧರ್ಮವೇ ಅದು.”
