ನವದೆಹಲಿ: ಭಾರತೀಯ ಕ್ರಿಕೆಟಿಗ ರಿಂಕು ಸಿಂಗ್ ಮತ್ತು ಸಂಸದೆ ಪ್ರಿಯಾ ಸರೋಜ ಅವರ ವಿವಾಹ ಡಿಸೆಂಬರ್ 4 ರಂದು ಲಕ್ನೋದಲ್ಲಿ ನಡೆಯಲಿದೆ.
ಸಮಾಜವಾದಿ ಪಕ್ಷದ ಸಂಸದೆ ಪ್ರಿಯಾ ಸರೋಜ ಮತ್ತು ಕ್ರಿಕೆಟಿಗ ರಿಂಕು ಸಿಂಗ್ ಅವರ ವಿವಾಹದ ದಿನಾಂಕ ನಿಗದಿಯಾಗಿದೆ. ಈ ಜೋಡಿಯು ಡಿಸೆಂಬರ್ 4 ರಂದು ಲಕ್ನೋದ ರಾಮಡಾ ಹೋಟೆಲ್ ನಲ್ಲಿ ದಾಂಪತ್ಯ ಜೀವನಕ್ಕೆ ಕಾಲಿಡಲಿದೆ. ವಿವಾಹದ ದಿನಾಂಕ ಖಚಿತವಾದ ನಂತರ, ಎರಡೂ ಕುಟುಂಬಗಳು ಸಮಾರಂಭದ ಸಿದ್ಧತೆಗಳನ್ನು ಆರಂಭಿಸಿವೆ.
ಕುಟುಂಬ ಸದಸ್ಯರಲ್ಲದೆ, ಆಪ್ತ ಸಂಬಂಧಿಕರು ಮತ್ತು ವಿಶೇಷ ಅತಿಥಿಗಳು ವಿವಾಹದಲ್ಲಿ ಭಾಗವಹಿಸುವ ನಿರೀಕ್ಷೆಯಿದೆ. ರಿಂಕು ಸಿಂಗ್ ಭಾರತೀಯ ಕ್ರಿಕೆಟ್ ತಂಡದ ಪ್ರಮುಖ ಆಟಗಾರರಾಗಿದ್ದರೆ, ಪ್ರಿಯಾ ಸರೋಜ ಅವರು ಉತ್ತರ ಪ್ರದೇಶದ ಮಚ್ಲಿಶಹರ್ನಿಂದ ಸಮಾಜವಾದಿ ಪಕ್ಷದ ಸಂಸದೆಯಾಗಿದ್ದಾರೆ.
ಕ್ರಿಕೆಟಿಗ ರಿಂಕು ಸಿಂಗ್ ಮತ್ತು ಎಸ್ಪಿ ಸಂಸದೆ ಪ್ರಿಯಾ ಸರೋಜ ಅವರ ನಿಶ್ಚಿತಾರ್ಥ ಸಮಾರಂಭವು ಜೂನ್ 8, 2025 ರಂದು ಲಕ್ನೋದ ‘ದಿ ಸೆಂಟ್ರಮ್’ ಹೋಟೆಲ್ ನಲ್ಲಿ ನಡೆದಿತ್ತು.
ರಿಂಕು ಮತ್ತು ಪ್ರಿಯಾ ಅವರ ಪ್ರೇಮಕಥೆ ಹೇಗೆ ಪ್ರಾರಂಭವಾಯಿತು?
2025 ರಲ್ಲಿ ನಡೆದ ನಿಶ್ಚಿತಾರ್ಥದ ನಂತರ ನೀಡಿದ ಸಂದರ್ಶನವೊಂದರಲ್ಲಿ ರಿಂಕು ತಮ್ಮ ಮತ್ತು ಪ್ರಿಯಾ ಅವರ ಪ್ರೇಮಕಥೆ ಹೇಗೆ ಶುರುವಾಯಿತು ಎಂಬುದನ್ನು ಬಹಿರಂಗಪಡಿಸಿದ್ದರು. ಸಮಾಜವಾದಿ ಪಕ್ಷದ ಸಂಸದೆಯ ಫೋಟೋವನ್ನು ಫ್ಯಾನ್ ಪೇಜ್ ಒಂದರಲ್ಲಿ ನೋಡಿದ್ದಾಗಿ ಮತ್ತು ಆರಂಭದಲ್ಲಿ ಅವರಿಗೆ ಸಂದೇಶ ಕಳುಹಿಸುವ ಬಗ್ಗೆ ಖಚಿತವಿರಲಿಲ್ಲ ಎಂದು ಭಾರತೀಯ ಕ್ರಿಕೆಟಿಗ ತಿಳಿಸಿದ್ದರು.
ಆದರೆ ಪ್ರಿಯಾ ತಮ್ಮ ಕೆಲವು ಫೋಟೋಗಳನ್ನು ಇಷ್ಟಪಟ್ಟಿದ್ದಾರೆ(ಲೈಕ್ ಮಾಡಿದ್ದಾರೆ) ಎಂದು ತಿಳಿದ ನಂತರ, ಅವರಿಗೆ ಸಂದೇಶ ಕಳುಹಿಸುವ ಧೈರ್ಯ ರಿಂಕುಗೆ ಬಂತು ಮತ್ತು ಶೀಘ್ರದಲ್ಲೇ ಅವರ ನಡುವೆ ಬಾಂಧವ್ಯ ಬೆಳೆಯಿತು.
“ಇದು ಕೋವಿಡ್ ಸಮಯದಲ್ಲಿ, ಐಪಿಎಲ್ ಮುಂಬೈನಲ್ಲಿ ನಡೆಯುತ್ತಿದ್ದಾಗ ಪ್ರಾರಂಭವಾಯಿತು,” ಎಂದು ರಿಂಕು ಹೇಳಿದರು. “ಅವರ ಗ್ರಾಮದಲ್ಲಿ ನಡೆದ ಮತದಾನವೊಂದಕ್ಕೆ ಸಂಬಂಧಿಸಿದ ಫ್ಯಾನ್ ಪೇಜ್ನಲ್ಲಿ ನಾನು ಅವರ ಫೋಟೋವನ್ನು ನೋಡಿದೆ. ಅವರು ನನಗೆ ಸೂಕ್ತವಾದವರು ಎಂದು ನನಗೆ ಅನ್ನಿಸಿತು, ಆದರೆ ಆರಂಭದಲ್ಲಿ ಅವರಿಗೆ ಸಂದೇಶ ಕಳುಹಿಸಲು ಹಿಂಜರಿಕೆ ಇತ್ತು. ಅವರು ನನ್ನ ಕೆಲವು ಫೋಟೋಗಳನ್ನು ಇಷ್ಟಪಟ್ಟಾಗ, ನಾನು ಅಂತಿಮವಾಗಿ ಅವರಿಗೆ ಸಂದೇಶ ಕಳುಹಿಸಿದೆ, ಹೀಗೆ ಎಲ್ಲವೂ ಶುರುವಾಯಿತು. ಶೀಘ್ರದಲ್ಲೇ ನಾವು ನಿಯಮಿತವಾಗಿ ಮಾತನಾಡಲು ಪ್ರಾರಂಭಿಸಿದೆವು, ಪಂದ್ಯಗಳಿಗೂ ಮುನ್ನವೂ ಮಾತನಾಡುತ್ತಿದ್ದೆವು. ಆಗಲೇ, ಅಂದರೆ 2022 ರಲ್ಲಿ ನನಗೆ ಪ್ರೀತಿಯ ಭಾವನೆ ಮೂಡಲು ಪ್ರಾರಂಭಿಸಿತು,” ಎಂದು ರಿಂಕು ಹೇಳಿದ್ದಾಗಿ ವರದಿಯಾಗಿದೆ.
ರಿಂಕು ಆಡುತ್ತಿರುವಾಗ ಪ್ರಿಯಾ ಅವರಿಗೆ ಬೆಂಬಲ ಸೂಚಿಸಿದ್ದಾರೆ; ಕೆಕೆಆರ್(KKR) ತಂಡದ ಈ ತಾರೆಯ ಪಂದ್ಯಗಳ ವೇಳೆ ಅವರನ್ನು ಹುರಿದುಂಬಿಸಲು ಅವರು ಈಡನ್ ಗಾರ್ಡನ್ಸ್ನಲ್ಲಿ ಕಾಣಿಸಿಕೊಂಡಿದ್ದಾರೆ. ಅಫ್ಘಾನಿಸ್ತಾನದ ವಿರುದ್ಧ ಟಿ20ಐ (T20I) ಸರಣಿಯನ್ನು ಆಡುತ್ತಿರುವ ಭಾರತೀಯ ತಂಡದಲ್ಲಿ ರಿಂಕು ಸದ್ಯಕ್ಕೆ ಇಲ್ಲ.
