ಹಿಂದೂ ಧರ್ಮದಲ್ಲಿ ಅಂಗಾರಕ ಸಂಕಷ್ಟ ಚತುರ್ಥಿ ವ್ರತಕ್ಕೆ ಅಪಾರವಾದ ಧಾರ್ಮಿಕ ಮಹತ್ವವಿದೆ. ಮಂಗಳವಾರದಂದು ಬರುವ ಈ ವಿಶೇಷ ದಿನದಂದು ಕೈಗೊಳ್ಳುವ ಪೂಜೆ ಮತ್ತು ವ್ರತವು ಭಕ್ತರ ಜೀವನದಲ್ಲಿನ ಸಕಲ ವಿಘ್ನಗಳನ್ನು ಹಾಗೂ ಅಡೆತಡೆಗಳನ್ನು ನಿವಾರಿಸುತ್ತದೆ ಎಂಬ ಗಾಢ ನಂಬಿಕೆಯಿದೆ. ಗಣೇಶನನ್ನು ಶಾಸ್ತ್ರೋಕ್ತವಾಗಿ ವಿಘ್ನಹರ್ತ ಎಂದು ಆರಾಧಿಸಲಾಗುತ್ತಿದ್ದು, ಆತನು ಸಂಕಷ್ಟಗಳನ್ನು ದೂರಮಾಡುವ ದೇವನಾಗಿದ್ದಾನೆ.
ಹಿಂದುಗಳ ಧಾರ್ಮಿಕ ನಂಬಿಕೆಯಲ್ಲಿ ಗಣೇಶನಿಗೆ ಪ್ರಥಮ ಪೂಜೆ. ಗಣಪತಿ ವಿಘ್ನ ನಿವಾರಕ. ಬುದ್ಧಿವಂತಿಕೆ ಮತ್ತು ಜ್ಞಾನದ ಅಧಿಪತಿ. ಜೀವನದಲ್ಲಿ ಬರುವ ಅಡೆತಡೆ, ಕಷ್ಟಗಳನ್ನೆಲ್ಲ ಪರಿಹರಿಸುವ ದೇವರು. ಪ್ರತಿ ಸಂಕಷ್ಟ ಚತುರ್ಥಿ ಮತ್ತು ಅಪರೂಪಕ್ಕೆ ಬರುವ ಅಂಗಾರಕ ಸಂಕಷ್ಟಿಯಂದು ನೀವು ಹೀಗೆ ಗಣಪತಿಯ ಪೂಜೆಯನ್ನ ವಿಧಿವತ್ತಾಗಿ ಮಾಡಬೇಕು. ಆಗ ನಿಮ್ಮ ಕಷ್ಟಗಳು ಪರಿಹಾರ ಆಗಿ, ಜೀವದಲ್ಲಿ ನೆಮ್ಮದಿ-ಸುಖ, ಸಮೃದ್ಧಿಗಳು ನೆಲೆಸುತ್ತವೆ.
ಅಂಗಾರಕ ಸಂಕಷ್ಟ ಚತುರ್ಥಿ ಶುಭ ಮುಹೂರ್ತ
ಅಂಗಾರಕ ಸಂಕಷ್ಟ ಚತುರ್ಥಿ ದಿನಾಂಕ: 2026ರ ಮೇ 5, ಮಂಗಳವಾರ.
ತಿಥಿ ಪ್ರಾರಂಭ: 2026ರ ಮೇ 5, ಮುಂಜಾನೆ 5:24 ರಿಂದ.
ತಿಥಿ ಮುಕ್ತಾಯ: 2026ರ ಮೇ 6, ಮುಂಜಾನೆ 7:51ರವರೆಗೆ.
ಚಂದ್ರೋದಯ ಸಮಯ: 2026ರ ಮೇ 5, ರಾತ್ರಿ 10:35ಕ್ಕೆ.
ಪೂಜಾ ವಿಧಾನಗಳು
ಸಿದ್ಧತೆ: ಮುಂಜಾನೆ ಬೇಗ ಎದ್ದು ಸ್ನಾನ ಮಾಡಿ ಶುದ್ಧರಾದ ಬಳಿಕ ಪೂಜೆ ಪ್ರಾರಂಭಿಸಬೇಕು. ದೇವರ ಕೋಣೆ ಮತ್ತು ಪೂಜಾ ಸ್ಥಳವನ್ನು ಸ್ವಚ್ಛಗೊಳಿಸಬೇಕು.
ಸ್ಥಾಪನೆ: ಮರದ ಹಲಗೆ ಅಥವಾ ಮಣೆಯ ಮೇಲೆ ಗಣೇಶನ ವಿಗ್ರಹ ಅಥವಾ ಫೋಟೋವನ್ನು ಪ್ರತಿಷ್ಠಾಪಿಸಿ. ಗಣೇಶನ ಮುಂದೆ ಶುದ್ಧ ತುಪ್ಪದ ದೀಪವನ್ನು ಹಚ್ಚಿಡಬೇಕು.
ಅಲಂಕಾರ: ಗಣೇಶನಿಗೆ ಹಳದಿ ತಿಲಕವನ್ನಿಟ್ಟು, ಹೂವಿನ ಹಾರ ಮತ್ತು ದುರ್ವಾ ಹುಲ್ಲಿನಿಂದ ಅಲಂಕರಿಸಿ.
ನೈವೇದ್ಯ: ಲಡ್ಡು, ಮೋದಕ, ಹಣ್ಣುಗಳು (ವಿಶೇಷವಾಗಿ ಬಾಳೆಹಣ್ಣು) ಮತ್ತು ಸಿಹಿಯಾದ ಪಾನ್ ಅರ್ಪಿಸಿ.
ಆಚರಣೆ: ಗಣೇಶನ ಮುಂದೆ ನೀರು ತುಂಬಿದ ಕಲಶವನ್ನಿಟ್ಟು, ವ್ರತ ಕಥೆಯನ್ನು ಓದಬೇಕು. 108 ಬಾರಿ ಮಂತ್ರ ಪಠಿಸಿ, ಗಣೇಶನಿಗೆ ಆರತಿ ಮಾಡಬೇಕು.
ಉಪವಾಸ ಮುಕ್ತಾಯ: ಚಂದ್ರ ದೇವನಿಗೆ ಅರ್ಘ್ಯ ನೀಡಿ, ಕುಟುಂಬದವರಿಗೆ ಪ್ರಸಾದ ಹಂಚಬೇಕು. ಉಪವಾಸ ತ್ಯಜಿಸುವಾಗ ಈರುಳ್ಳಿ-ಬೆಳ್ಳುಳ್ಳಿ ಇಲ್ಲದ ಸಾತ್ವಿಕ ಆಹಾರ ಸೇವಿಸಬೇಕು.
ಮಹತ್ವ ಮತ್ತು ಪ್ರಯೋಜನಗಳು
ಹಿಂದೂ ಸಂಪ್ರದಾಯದಂತೆ ಈ ದಿನದ ಪೂಜೆಯು ಜೀವನದ ಎಲ್ಲಾ ತೊಂದರೆ ಮತ್ತು ಅಡೆತಡೆಗಳನ್ನು ನಿವಾರಿಸುತ್ತದೆ. ಗಣೇಶನನ್ನು “ವಿಘ್ನಹರ್ತ” ಎಂದು ಕರೆಯಲಾಗುತ್ತಿದ್ದು, ಈ ವ್ರತವು ಈ ಕೆಳಗಿನ ಪ್ರಯೋಜನಗಳನ್ನು ನೀಡುತ್ತದೆ:
ಸಮಸ್ಯೆಗಳ ನಿವಾರಣೆ: ಆರ್ಥಿಕ ತೊಂದರೆಗಳು, ಮಾನಸಿಕ ಒತ್ತಡ ಮತ್ತು ಶತ್ರು ಕಾಟದಿಂದ ಮುಕ್ತಿ ನೀಡುತ್ತದೆ.
ಜ್ಞಾನ ಮತ್ತು ಯಶಸ್ಸು: ಈ ದಿನ ಗಣೇಶನನ್ನು ಪೂಜಿಸುವುದರಿಂದ ಬುದ್ಧಿವಂತಿಕೆ, ಜ್ಞಾನ ಮತ್ತು ಸಕಲ ಪ್ರಯತ್ನಗಳಲ್ಲಿ ಯಶಸ್ಸು ಲಭಿಸುತ್ತದೆ.
ಶಾಂತಿ ಮತ್ತು ಸಮೃದ್ಧಿ: ವೈವಾಹಿಕ ಸಮಸ್ಯೆಗಳು ಪರಿಹಾರವಾಗಿ ಜೀವನದಲ್ಲಿ ಸಂತೋಷ, ಶಾಂತಿ ಮತ್ತು ಉತ್ತಮ ಆರೋಗ್ಯ ಲಭಿಸುತ್ತದೆ.
ದೋಷ ಪರಿಹಾರ: ಈ ವ್ರತವು ಚಂದ್ರ ದೋಷಗಳನ್ನು ತೆಗೆದುಹಾಕಿ ಇಷ್ಟಾರ್ಥಗಳನ್ನು ಈಡೇರಿಸುತ್ತದೆ.
ಅಂಗಾರಕ ಸಂಕಷ್ಟ ಚತುರ್ಥಿ ಮಂತ್ರಗಳು
ಓಂ ಶ್ರೀ ಗಣೇಶಾಯ ನಮಃ.
ಓಂ ಗಣ ಗಣ ಗಣಪತಯೇ ನಮಃ.
ಓಂ ವಕ್ರತುಂಡ ಮಹಾಕಾಯ ಸೂರ್ಯಕೋಟಿ ಸಮಪ್ರಭಃ, ನಿರ್ವಿಘ್ನಂ ಕುರುಮೇ ದೇವ ಸರ್ವಕಾರ್ಯೇಷು ಸರ್ವದಾ.
ಓಂ ಏಕದಂತಾಯ ವಿದ್ಮಹೇ ವಕ್ರತುಂಡಾಯ ಧೀಮಹಿ ತನ್ನೋಂ ದಂತಿ ಪ್ರಚೋದಯಾತ್.
ಅಂಗಾರಕ ಸಂಕಷ್ಟ ಚತುರ್ಥಿ ದಿನದಂದು ಏನು ಮಾಡಬೇಕು.?
ಮುಂಜಾನೆಯ ಸಿದ್ಧತೆ: ಈ ದಿನ ಸೂರ್ಯೋದಯಕ್ಕೂ ಮುನ್ನವೇ ಏಳುವುದು ಅತ್ಯಂತ ಶುಭ ಎಂದು ಪರಿಗಣಿಸಲಾಗುತ್ತದೆ. ಸ್ನಾನದ ನಂತರ ಕೆಂಪು ಅಥವಾ ಹಳದಿ ಬಣ್ಣದ ವಸ್ತ್ರಗಳನ್ನು ಧರಿಸುವುದು ಸೂಕ್ತ.
ವ್ರತ ಸಂಕಲ್ಪ: ವಿಘ್ನನಿವಾರಕ ಗಣೇಶನನ್ನು ಸ್ಮರಿಸುತ್ತಾ, ಭಕ್ತಿಯಿಂದ ಸಂಕಷ್ಟ ಚತುರ್ಥಿ ವ್ರತವನ್ನು ಆಚರಿಸಲು ದೃಢ ಸಂಕಲ್ಪ ಮಾಡಬೇಕು.
ಪೂಜಾ ವೇದಿಕೆ: ಪೂಜಾ ಸ್ಥಳವನ್ನು ಸ್ವಚ್ಛಗೊಳಿಸಿ, ಪೀಠದ ಮೇಲೆ ಕೆಂಪು ಬಟ್ಟೆಯನ್ನು ಹಾಸಿ ಗಣೇಶನ ವಿಗ್ರಹ ಅಥವಾ ಫೋಟೋವನ್ನು ಪ್ರತಿಷ್ಠಾಪಿಸಬೇಕು. ಪೂಜೆ ಮಾಡುವಾಗ ಪೂರ್ವ ಅಥವಾ ಉತ್ತರ ದಿಕ್ಕಿಗೆ ಮುಖ ಮಾಡಿ ಕುಳಿತುಕೊಳ್ಳುವುದು ಸಂಪ್ರದಾಯ.
ಅಲಂಕಾರ ಮತ್ತು ಅರ್ಪಣೆ: ಗಣೇಶನಿಗೆ ಹೂವಿನ ಹಾರ, ಅರಿಶಿನ, ಕುಂಕುಮ, ಶ್ರೀಗಂಧ ಹಾಗೂ ಅಕ್ಷತೆಯನ್ನು ಸಮರ್ಪಿಸಬೇಕು. ಮುಖ್ಯವಾಗಿ ಗಣೇಶನಿಗೆ ಪ್ರಿಯವಾದ ದೂರ್ವಾ (ಗರಿಕೆ) ಹುಲ್ಲನ್ನು ತಪ್ಪದೇ ಅರ್ಪಿಸಿ.
ನೈವೇದ್ಯ: ದೇವರಿಗೆ ಮೋದಕ, ಎಳ್ಳುಂಡೆ, ಮೋತಿಚೂರ್ ಲಡ್ಡು, ಕಬ್ಬು ಮತ್ತು ವಿವಿಧ ರೀತಿಯ ಹಣ್ಣುಗಳನ್ನು ನೈವೇದ್ಯವಾಗಿ ಅರ್ಪಿಸಬೇಕು.
ಮಂತ್ರ ಪಠನೆ: ಗಣೇಶನ ಮಂತ್ರಗಳು ಅಥವಾ ಗಣೇಶ ಚಾಲೀಸಾವನ್ನು ಭಕ್ತಿಯಿಂದ ಪಠಿಸಬೇಕು. ಇದರೊಂದಿಗೆ ಸಂಕಷ್ಟ ಚತುರ್ಥಿ ವ್ರತ ಕಥೆಯನ್ನು ಓದುವುದು ಅಥವಾ ಕೇಳುವುದು ಶ್ರೇಯಸ್ಕರ.
ಆರತಿ ಮತ್ತು ದಾನ: ಪೂಜೆಯ ಕೊನೆಯಲ್ಲಿ ಕರ್ಪೂರದ ಆರತಿ ಬೆಳಗಬೇಕು. ಈ ದಿನದಂದು ಬಡವರಿಗೆ ಮತ್ತು ನಿರ್ಗತಿಕರಿಗೆ ದಾನ ಮಾಡುವುದು ಪುಣ್ಯದಾಯಕ.
ಉಪವಾಸ ಮುಕ್ತಾಯ: ಸಂಜೆ ಗಣೇಶನಿಗೆ ಮತ್ತೊಮ್ಮೆ ನೈವೇದ್ಯ ಸಲ್ಲಿಸಿ, ಚಂದ್ರೋದಯದ ನಂತರ ಚಂದ್ರ ದೇವರಿಗೆ ಅರ್ಘ್ಯ ನೀಡಿ ವ್ರತವನ್ನು ಪೂರ್ಣಗೊಳಿಸಬೇಕು.
ಅಂಗಾರಕ ಸಂಕಷ್ಟ ಚತುರ್ಥಿ ದಿನದಂದು ಏನು ಮಾಡಬಾರದು?
ಮಾತಿನ ಸಂಯಮ: ಈ ದಿನ ಯಾರಿಗೂ ಸುಳ್ಳು ಹೇಳಬಾರದು ಹಾಗೂ ಇತರರನ್ನು ಅವಮಾನಿಸಬಾರದು. ಯಾರ ಬಗ್ಗೆಯೂ ಕೆಟ್ಟದಾಗಿ ಮಾತನಾಡುವುದನ್ನು ತಪ್ಪಿಸಬೇಕು.
ಆಲೋಚನಾ ಲಹರಿ: ಮನಸ್ಸಿನಲ್ಲಿ ಯಾವುದೇ ರೀತಿಯ ನಕಾರಾತ್ಮಕ ಆಲೋಚನೆಗಳಿಗೆ ಆಸ್ಪದ ನೀಡಬಾರದು.
ಆಹಾರ ಪದ್ಧತಿ: ನೀವು ಉಪವಾಸ ಮಾಡದಿದ್ದರೂ ಸಹ ಈ ದಿನ ತಾಮಸಿಕ ಆಹಾರ ಮತ್ತು ವಸ್ತುಗಳ ಸೇವನೆಯಿಂದ ದೂರವಿರುವುದು ಅಗತ್ಯ.
ದಿನಚರಿ: ಸಂಕಷ್ಟ ಚತುರ್ಥಿಯ ದಿನದಂದು ಭಕ್ತರು ಹಗಲಿನಲ್ಲಿ ಮಲಗಬಾರದು.
ಶಿಸ್ತು: ದೇಹ ಮತ್ತು ಮನಸ್ಸಿನಲ್ಲಿ ಬ್ರಹ್ಮಚರ್ಯವನ್ನು ಪಾಲಿಸಬೇಕು.
ಪೂಜಾ ನಿಯಮ: ಪೂಜೆಯ ಸಮಯದಲ್ಲಿ ಗಣೇಶನಿಗೆ ತುಳಸಿಯನ್ನು ಅರ್ಪಿಸಬೇಡಿ. ದೇವರಿಗೆ ಅರ್ಪಿಸುವ ಅಕ್ಷತೆಯು ತುಂಡಾಗಿರಬಾರದು ಅಥವಾ ಮುರಿದಿರಬಾರದು.
ಜೀವಕಾರುಣ್ಯ: ಯಾವುದೇ ಕಾರಣಕ್ಕೂ ಯಾವುದೇ ಜೀವಿಗಳನ್ನು ಹಿಂಸಿಸಬಾರದು. ಪೂಜೆಯ ಸಮಯದಲ್ಲಿ ದೇವರಿಗೆ ಕೇವಲ ಪುಣ್ಯ ವಸ್ತುಗಳನ್ನು ಮಾತ್ರ ಅರ್ಪಿಸಬೇಕು.
ಅಂಗಾರಕ ಸಂಕಷ್ಟ ಚತುರ್ಥಿಯ ಈ ನಿಯಮಗಳನ್ನು ಶ್ರದ್ಧೆಯಿಂದ ಪಾಲಿಸುವುದರಿಂದ ಗಣೇಶನ ಪೂರ್ಣ ಆಶೀರ್ವಾದದ ಜೊತೆಗೆ ಪೂಜೆಯ ಶುಭ ಫಲಿತಾಂಶಗಳನ್ನು ಪಡೆದುಕೊಳ್ಳಬಹುದು.
