ಅಮೆರಿಕದ ಇತಿಹಾಸದಲ್ಲೇ ಅತ್ಯಂತ ದೊಡ್ಡದಾದ ಕ್ರಿಪ್ಟೋಕರೆನ್ಸಿ ಕಳ್ಳತನ ಮತ್ತು ಅಕ್ರಮ ಹಣ ವರ್ಗಾವಣೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಮಹತ್ವದ ಬೆಳವಣಿಗೆಯೊಂದು ಹೊರಬಿದ್ದಿದೆ. ಸುಮಾರು 245 ಮಿಲಿಯನ್ ಡಾಲರ್‌ಗೂ ಹೆಚ್ಚು ಮೌಲ್ಯದ ಡಿಜಿಟಲ್ ಸ್ವತ್ತುಗಳನ್ನು ಲೂಟಿ ಮಾಡಿ, ಆ ಹಣದಲ್ಲಿ ಅತಿರೇಕದ ಐಷಾರಾಮಿ ಜೀವನ ನಡೆಸುತ್ತಿದ್ದ ಸೈಬರ್ ವಂಚಕರ ಜಾಲದ ಪ್ರಮುಖ ಸೂತ್ರಧಾರ ತನ್ನ ಅಪರಾಧವನ್ನು ಅಮೆರಿಕದ ಫೆಡರಲ್ ನ್ಯಾಯಾಲಯದಲ್ಲಿ ಒಪ್ಪಿಕೊಂಡಿದ್ದಾನೆ.
ಮೂಲತಃ ಸಿಂಗಾಪುರ ಮೂಲದ 22 ವರ್ಷದ ಮೆಲೋನ್ ಲ್ಯಾಮ್ ಎಂಬಾತನೇ ಈ ಬೃಹತ್ ದಂಧೆಯ ಕಿಂಗ್‌ಪಿನ್. ಈತ ಅಮೆರಿಕದ ಮಿಯಾಮಿಯಲ್ಲಿ ನೆಲೆಸಿದ್ದು, ಯುವಕರ ತಂಡವನ್ನು ಕಟ್ಟಿಕೊಂಡು ಈ ಜಾಲವನ್ನು ಮುನ್ನಡೆಸುತ್ತಿದ್ದನು. ವಾಷಿಂಗ್ಟನ್ ಡಿಸಿ ಫೆಡರಲ್ ನ್ಯಾಯಾಲಯದಲ್ಲಿ ವಿಚಾರಣೆ ವೇಳೆ ಆತ ಸಂಘಟಿತ ಅಪರಾಧ ಪಿತೂರಿ ಆರೋಪದ ಅಡಿಯಲ್ಲಿ ತನ್ನ ತಪ್ಪನ್ನು ಅಧಿಕೃತವಾಗಿ ಒಪ್ಪಿಕೊಂಡಿದ್ದು, ಈತನಿಗೆ ಗರಿಷ್ಠ 20 ವರ್ಷಗಳವರೆಗೆ ಜೈಲು ಶಿಕ್ಷೆ ವಿಧಿಸುವ ಸಾಧ್ಯತೆಯಿದೆ.
ತನಿಖಾಧಿಕಾರಿಗಳು ನೀಡಿರುವ ಮಾಹಿತಿಯ ಪ್ರಕಾರ, 2024 ರ ಆಗಸ್ಟ್ 18 ರಂದು ವಾಷಿಂಗ್ಟನ್ ಡಿಸಿಯ ಹೂಡಿಕೆದಾರರೊಬ್ಬರನ್ನು ಗುರಿಯಾಗಿಸಿಕೊಂಡು ಈ ತಂಡ ಅತಿ ದೊಡ್ಡ ಕನ್ನ ಹಾಕಿತ್ತು. ಲ್ಯಾಮ್‌ನ ಸಹಚರರು ಜಾಗತಿಕ ತಂತ್ರಜ್ಞಾನ ಸಂಸ್ಥೆಯಾದ ಗೂಗಲ್ ಮತ್ತು ಖ್ಯಾತ ಕ್ರಿಪ್ಟೋ ವಿನಿಮಯ ವೇದಿಕೆಯ ಪ್ರತಿನಿಧಿಗಳ ಸೋಗಿನಲ್ಲಿ ಸಂತ್ರಸ್ತ ವ್ಯಕ್ತಿಗೆ ಕರೆ ಮಾಡಿದ್ದರು. ನಿಮ್ಮ ಖಾತೆಯಲ್ಲಿ ಭದ್ರತಾ ಲೋಪವುಂಟಾಗಿದೆ ಎಂದು ನಂಬಿಸಿ, ಅವರ ಗೂಗಲ್ ಡ್ರೈವ್ ಮತ್ತು ರಹಸ್ಯ ಭದ್ರತಾ ಕೋಡ್‌ಗಳನ್ನು ತಮ್ಮ ಕೈವಶ ಮಾಡಿಕೊಂಡಿದ್ದರು. ಈ ಮಾಹಿತಿಯನ್ನು ಬಳಸಿಕೊಂಡು ಸಂತ್ರಸ್ತನ ಖಾತೆಯಿಂದ ಬರೋಬ್ಬರಿ 4,100 ಕ್ಕೂ ಅಧಿಕ ಬಿಟ್‌ಕಾಯಿನ್‌ಗಳನ್ನು ತಮ್ಮ ಖಾತೆಗಳಿಗೆ ವರ್ಗಾಯಿಸಿಕೊಂಡಿದ್ದರು. ಆ ಸಮಯದಲ್ಲಿ ಈ ಬಿಟ್‌ಕಾಯಿನ್‌ಗಳ ಒಟ್ಟು ಮೌಲ್ಯ 230 ಮಿಲಿಯನ್ ಡಾಲರ್‌ಗೂ ಅಧಿಕವಾಗಿತ್ತು.
ಈ ಕೃತ್ಯದ ನಂತರ ದೋಚಿದ ಅಪಾರ ಹಣವನ್ನು ಆನ್‌ಲೈನ್ ವೇದಿಕೆಗಳ ಮೂಲಕ ಪರಿವರ್ತಿಸಿಕೊಂಡ ಆರೋಪಿಗಳು, ಆ ಹಣವನ್ನು ನೀರಿನಂತೆ ಖರ್ಚು ಮಾಡಲಾರಂಭಿಸಿದ್ದರು. ದುಬಾರಿ ಕಾರುಗಳು, ಖಾಸಗಿ ವಿಮಾನಗಳ ಪ್ರಯಾಣ, ಬೃಹತ್ ಮಹಲುಗಳು ಮತ್ತು ಲಕ್ಷಾಂತರ ಡಾಲರ್ ಬೆಲೆಬಾಳುವ ಕೈಗಡಿಯಾರಗಳನ್ನು ಖರೀದಿಸಿದ್ದರು. ಪ್ರಮುಖ ಆರೋಪಿ ಲ್ಯಾಮ್, ಲಾಸ್ ಏಂಜಲೀಸ್‌ನ ನೈಟ್‌ಕ್ಲಬ್ ಒಂದರಲ್ಲಿ ಒಂದೇ ಒಂದು ರಾತ್ರಿಗೆ ಬರೋಬ್ಬರಿ 569,000 ಡಾಲರ್ ಹಣವನ್ನು ಪಾರ್ಟಿಗಾಗಿ ಖರ್ಚು ಮಾಡಿದ್ದನು. ಈತನ ತಂಡದಲ್ಲಿ ಕೇವಲ ಒಂದು ತಿಂಗಳ ಅವಧಿಯಲ್ಲಿ ನೈಟ್‌ಕ್ಲಬ್‌ಗಳಿಗಾಗಿಯೇ ಸುಮಾರು 4 ಮಿಲಿಯನ್ ಡಾಲರ್ ಹಣ ವ್ಯಯಿಸಲಾಗಿತ್ತು. ಅಷ್ಟೇ ಅಲ್ಲದೆ, ಲ್ಯಾಮ್ 2 ಮಿಲಿಯನ್ ಡಾಲರ್ ಮೌಲ್ಯದ ಒಂದೇ ಒಂದು ಕೈಗಡಿಯಾರ ಹಾಗೂ ಫೆರಾರಿ, ಲ್ಯಾಂಬೋರ್ಗಿನಿ, ಪೋರ್ಷೆ ಸೇರಿದಂತೆ ಸುಮಾರು 30 ಕ್ಕೂ ಅಧಿಕ ಅತ್ಯಂತ ದುಬಾರಿ ಐಷಾರಾಮಿ ಕಾರುಗಳನ್ನು ಖರೀದಿಸಿದ್ದನು.
ಆದರೆ, ಕದ್ದ ಹಣದ ಹರಿವನ್ನು ಬೆಂಬಿಡದೆ ಜಾಡು ಹಿಡಿದ ಅಮೆರಿಕದ ತನಿಖಾ ಸಂಸ್ಥೆಗಳು ಈ ಜಾಲದ ಕೃತ್ಯಗಳನ್ನು ಬಯಲಿಗೆಳೆದವು. ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಒಟ್ಟು 18 ಆರೋಪಿಗಳ ವಿರುದ್ಧ ದೋಷಾರೋಪ ಹೊರಿಸಲಾಗಿದ್ದು, ಲ್ಯಾಮ್ ಸೇರಿದಂತೆ ಈಗಾಗಲೇ 11 ಮಂದಿ ತಮ್ಮ ತಪ್ಪನ್ನು ಒಪ್ಪಿಕೊಂಡಿದ್ದಾರೆ. 2025 ರ ಸೆಪ್ಟೆಂಬರ್‌ನಲ್ಲಿ ಮಿಯಾಮಿಯ ಬಾಡಿಗೆ ಮಹಲಿನಲ್ಲಿ ಈತನನ್ನು ಬಂಧಿಸಲಾಗಿತ್ತು. ನ್ಯಾಯಾಲಯದ ಮುಂದೆ ಹಾಜರಾಗಿ ತಾನು ನಡೆಸಿದ ಬೃಹತ್ ಸೈಬರ್ ಕೃತ್ಯವನ್ನು ಒಪ್ಪಿಕೊಂಡಿರುವ ಲ್ಯಾಮ್ ಅವರ ಪ್ರಕರಣದ ಮುಂದಿನ ವಿಚಾರಣೆ 2026 ರ ಡಿಸೆಂಬರ್ 8 ರಂದು ನಡೆಯಲಿದೆ.
