ಒಂದು ಕಾಲದಲ್ಲಿ ಭಾರತದ ಸ್ಮಾರ್ಟ್‌ಫೋನ್ ಮಾರುಕಟ್ಟೆಯಲ್ಲಿ ಮೈಕ್ರೋಮ್ಯಾಕ್ಸ್ ಎನ್ನುವುದು ಕೇವಲ ಹೆಸರಲ್ಲ, ಅದೊಂದು ಸಂಚಲನವಾಗಿತ್ತು. ಚೀನಿ ಕಂಪನಿಗಳ ಅಬ್ಬರ ಶುರುವಾಗುವ ಮೊದಲೇ ಭಾರತೀಯ ಕಂಪನಿಯೊಂದು ಜಾಗತಿಕ ಮಟ್ಟದಲ್ಲಿ ಸದ್ದು ಮಾಡಬಹುದು ಎಂದು ತೋರಿಸಿಕೊಟ್ಟವರು ರಾಹುಲ್ ಶರ್ಮಾ. 2014ರಲ್ಲಿ ಸ್ಯಾಮ್‌ಸಂಗ್ ಕಂಪನಿಯನ್ನು ಹಿಂದಿಕ್ಕಿ ಭಾರತದ ನಂಬರ್ 1 ಮೊಬೈಲ್ ಬ್ರ್ಯಾಂಡ್ ಆಗಿ ಹೊರಹೊಮ್ಮಿದ್ದ ಮೈಕ್ರೋಮ್ಯಾಕ್ಸ್, ವರ್ಷಕ್ಕೆ 12,000 ರಿಂದ 15,000 ಕೋಟಿ ರೂಪಾಯಿ ವಹಿವಾಟು ನಡೆಸುತ್ತಿತ್ತು.
ಆದರೆ ಚೀನಿ ಕಂಪನಿಗಳ ಆಕ್ರಮಣಕಾರಿ ಮಾರುಕಟ್ಟೆ ತಂತ್ರಗಳಿಂದ ಮೈಕ್ರೋಮ್ಯಾಕ್ಸ್ ಭಾರಿ ಕುಸಿತ ಕಂಡಿತು. ಈ ಪತನ ಎಷ್ಟು ತೀವ್ರವಾಗಿತ್ತೆಂದರೆ ಮೈಕ್ರೋಮ್ಯಾಕ್ಸ್ ಅಧ್ಯಾಯ ಮುಗಿಯಿತು ಎಂದೇ ಎಲ್ಲರೂ ಭಾವಿಸಿದ್ದರು. ಆದರೆ ರಾಹುಲ್ ಶರ್ಮಾ ಸೋಲೊಪ್ಪಿಕೊಳ್ಳಲಿಲ್ಲ.
ಸದ್ದಿಲ್ಲದೆ ಕಟ್ಟಿದ ಮ್ಯಾನುಫ್ಯಾಕ್ಚರಿಂಗ್ ಸಾಮ್ರಾಜ್ಯ
ಬ್ರ್ಯಾಂಡ್ ಯುದ್ಧದಲ್ಲಿ ಹಿನ್ನಡೆಯಾದ ನಂತರ ರಾಹುಲ್ ಶರ್ಮಾ ತಮ್ಮ ಗಮನವನ್ನು ಉತ್ಪಾದನಾ (Manufacturing) ಕ್ಷೇತ್ರದತ್ತ ತಿರುಗಿಸಿದರು. ‘ಭಗವತಿ ಪ್ರಾಡಕ್ಟ್ಸ್’ ಅಡಿಯಲ್ಲಿ ಇಂದು ಅವರು ಐದು ಬೃಹತ್ ಫ್ಯಾಕ್ಟರಿಗಳನ್ನು ಹೊಂದಿದ್ದು, 6,200 ಕೋಟಿ ರೂಪಾಯಿಗಳ ವಹಿವಾಟು ನಡೆಸುತ್ತಿದ್ದಾರೆ. ಬ್ರ್ಯಾಂಡ್ ಹಾವಳಿ ಇಲ್ಲದಿದ್ದರೂ, ಸದ್ದಿಲ್ಲದೆ ಮ್ಯಾನುಫ್ಯಾಕ್ಚರಿಂಗ್ ಮೂಲಕ ಅವರು ದೊಡ್ಡ ಲಾಭ ಗಳಿಸುತ್ತಿದ್ದಾರೆ. ಇದರ ಜೊತೆಗೆ ‘ರಿವೋಲ್ಟ್’ (Revolt) ಎಂಬ ಎಲೆಕ್ಟ್ರಿಕ್ ಬೈಕ್ ಕಂಪನಿಯನ್ನು ಸ್ಥಾಪಿಸಿ ಆಟೋಮೊಬೈಲ್ ಕ್ಷೇತ್ರದಲ್ಲೂ ಛಾಪು ಮೂಡಿಸಿದ್ದಾರೆ.
ಬಾಲಿವುಡ್ ಸುಂದರಿ ಅಸಿನ್ ಜೊತೆಗಿನ ಪ್ರೇಮಕಥೆ
ರಾಹುಲ್ ಶರ್ಮಾ ಅವರ ವೃತ್ತಿಜೀವನದಷ್ಟೇ ಕುತೂಹಲಕಾರಿಯಾದುದು ಅವರ ವೈಯಕ್ತಿಕ ಜೀವನ. ಬಾಲಿವುಡ್‌ನ ಸ್ಟಾರ್ ನಟಿಯಾಗಿ ಮಿಂಚುತ್ತಿದ್ದ ಅಸಿನ್ ತೋಟುಂಕಲ್ ಮತ್ತು ರಾಹುಲ್ ಅವರ ಪರಿಚಯವಾಗಿದ್ದು ಅಕ್ಷಯ್ ಕುಮಾರ್ ಮೂಲಕ. 2016ರಲ್ಲಿ ಈ ಜೋಡಿ ಅದ್ಧೂರಿಯಾಗಿ ವಿವಾಹವಾದರು. ಮದುವೆಯ ನಂತರ ಅಸಿನ್ ಚಿತ್ರರಂಗದಿಂದ ದೂರವುಳಿದು ಸಂಸಾರದಲ್ಲಿ ಬ್ಯುಸಿಯಾಗಿದ್ದಾರೆ. ಇಂದು ಈ ದಂಪತಿ ಸುಮಾರು 1,300 ಕೋಟಿ ರೂಪಾಯಿ ಮೌಲ್ಯದ ಆಸ್ತಿಯನ್ನು ಹೊಂದಿದ್ದಾರೆ.
ಐಷಾರಾಮಿ ಜೀವನ ಮತ್ತು ಕಾರುಗಳ ಕ್ರೇಜ್
ಡೆಲ್ಲಿಯ ಮೆಕ್ಯಾನಿಕಲ್ ಇಂಜಿನಿಯರಿಂಗ್ ಪದವೀಧರರಾದ ರಾಹುಲ್ ಶರ್ಮಾ ಅವರಿಗೆ ವೇಗದ ಕಾರುಗಳೆಂದರೆ ಪಂಚಪ್ರಾಣ. ಅವರ ಗ್ಯಾರೇಜ್‌ನಲ್ಲಿ ರೋಲ್ಸ್ ರಾಯ್ಸ್ ಘೋಸ್ಟ್, ಬೆಂಟ್ಲಿ ಸೂಪರ್ ಸ್ಪೋರ್ಟ್ ಲಿಮಿಟೆಡ್ ಎಡಿಷನ್ ಮತ್ತು ಬಿಎಂಡಬ್ಲ್ಯೂ X6 ನಂತಹ ಕೋಟಿ ಬೆಲೆಯ ಐಷಾರಾಮಿ ಕಾರುಗಳಿವೆ. ದೆಹಲಿಯಲ್ಲಿ ಇವರು ಹೊಂದಿರುವ ಫಾರ್ಮ್ ಹೌಸ್ ಕೂಡ ಅತ್ಯಂತ ಸುಂದರವಾಗಿದೆ.
3 ಲಕ್ಷ ರೂಪಾಯಿ ಸಾಲದೊಂದಿಗೆ ಆರಂಭವಾದ ರಾಹುಲ್ ಶರ್ಮಾ ಅವರ ಪಯಣ ಇಂದು ಸಾವಿರಾರು ಕೋಟಿಗಳ ಮ್ಯಾನುಫ್ಯಾಕ್ಚರಿಂಗ್ ಸಾಮ್ರಾಜ್ಯವಾಗಿ ಬೆಳೆದು ನಿಂತಿದೆ. ಸೋಲನ್ನು ಮೆಟ್ಟಿ ನಿಲ್ಲುವುದು ಹೇಗೆ ಎಂಬುದಕ್ಕೆ ರಾಹುಲ್ ಶರ್ಮಾ ಅವರೇ ಸಾಕ್ಷಿ.
