ರಕ್ತದಾನ ಮಾಡುವುದು ಒಂದು ಪುಣ್ಯದ ಕೆಲಸ. ಇದು ಕೇವಲ ರೋಗಿಯ ಜೀವ ಉಳಿಸುವುದು ಮಾತ್ರವಲ್ಲದೆ, ದಾನಿಯ ಆರೋಗ್ಯದ ಮೇಲೂ ಧನಾತ್ಮಕ ಪರಿಣಾಮ ಬೀರುತ್ತದೆ. ಆದರೆ ಮೊದಲ ಬಾರಿಗೆ ರಕ್ತದಾನ ಮಾಡುವವರಲ್ಲಿ “ನನ್ನ ದೇಹದಲ್ಲಿ ರಕ್ತದ ಕೊರತೆಯಾಗಬಹುದೇ?” ಅಥವಾ “ನಾನು ಸುಸ್ತಾಗಿ ಬಿದ್ದುಬಿಡುತ್ತೇನೆಯೇ?” ಎಂಬ ಆತಂಕವಿರುವುದು ಸಹಜ. ಆದರೆ ವಾಸ್ತವದಲ್ಲಿ, ರಕ್ತದಾನ ಮಾಡಿದ ಕ್ಷಣದಿಂದಲೇ ನಮ್ಮ ದೇಹವು ಅತ್ಯಂತ ವೇಗವಾಗಿ ಚೇತರಿಸಿಕೊಳ್ಳಲು ಆರಂಭಿಸುತ್ತದೆ.
ನಮ್ಮ ದೇಹವು ರಕ್ತದಾನದ ನಂತರದ ಮೊದಲ 24 ಗಂಟೆಗಳಲ್ಲಿ ಹೇಗೆ ಪ್ರತಿಕ್ರಿಯಿಸುತ್ತದೆ ಎಂಬುದು ನಿಜಕ್ಕೂ ಅದ್ಭುತ. ವೈದ್ಯಕೀಯ ತಜ್ಞರ ಪ್ರಕಾರ, ರಕ್ತದಾನ ಮಾಡಿದ ಕೆಲವೇ ಗಂಟೆಗಳಲ್ಲಿ ದೇಹವು ಕಳೆದುಕೊಂಡ ದ್ರವದ ಅಂಶವನ್ನು ಮರುಪೂರಣ ಮಾಡಲು ಆರಂಭಿಸುತ್ತದೆ. ರಕ್ತದ ಪ್ರಮುಖ ದ್ರವ ಭಾಗವಾದ ‘ಪ್ಲಾಸ್ಮಾ’ ಕೇವಲ 24 ಗಂಟೆಗಳ ಒಳಗೆ ಮತ್ತೆ ಮೊದಲಿನ ಸ್ಥಿತಿಗೆ ಮರಳುತ್ತದೆ. ಅಂಗಾಂಶಗಳಲ್ಲಿರುವ ದ್ರವವು ರಕ್ತನಾಳಗಳಿಗೆ ಸೇರಿಕೊಳ್ಳುವ ಮೂಲಕ ರಕ್ತದ ಒತ್ತಡ ಮತ್ತು ಪರಿಚಲನೆಯನ್ನು ಸಮತೋಲನದಲ್ಲಿಡಲು ಸಹಾಯ ಮಾಡುತ್ತದೆ.
ಇನ್ನು ರಕ್ತದ ಕಣಗಳ ವಿಷಯಕ್ಕೆ ಬಂದರೆ, ನಮ್ಮ ಮೂಳೆ ಮಜ್ಜೆಯು (Bone Marrow) ತಕ್ಷಣವೇ ಹೊಸ ಜೀವಕೋಶಗಳ ಉತ್ಪಾದನೆಯನ್ನು ಶುರು ಮಾಡುತ್ತದೆ. ಪ್ಲೇಟ್ಲೆಟ್ಗಳು ಮತ್ತು ಬಿಳಿ ರಕ್ತಕಣಗಳು ಕೆಲವೇ ದಿನಗಳಲ್ಲಿ ಸಹಜ ಸ್ಥಿತಿಗೆ ಬರುತ್ತವೆ. ಆದರೆ ಕೆಂಪು ರಕ್ತಕಣಗಳು ಸಂಪೂರ್ಣವಾಗಿ ಮರುಉತ್ಪತ್ತಿಯಾಗಲು ಕೆಲವು ವಾರಗಳ ಸಮಯ ತೆಗೆದುಕೊಳ್ಳುತ್ತದೆ. ಇದೇ ಕಾರಣಕ್ಕೆ ರಕ್ತದಾನದ ನಂತರ ಕಬ್ಬಿಣದಂಶವಿರುವ ಆಹಾರ ಸೇವಿಸಲು ವೈದ್ಯರು ಸಲಹೆ ನೀಡುತ್ತಾರೆ.
ರಕ್ತದಾನ ಮಾಡಿದ ನಂತರ ಕೆಲವರಿಗೆ ಸ್ವಲ್ಪ ತಲೆಸುತ್ತು ಅಥವಾ ಸುಸ್ತು ಎನಿಸಬಹುದು. ಇದು ರಕ್ತದ ಪ್ರಮಾಣದಲ್ಲಿ ತಾತ್ಕಾಲಿಕವಾಗಿ ಉಂಟಾಗುವ ಬದಲಾವಣೆಯಿಂದ ಆಗುವಂತದ್ದು. ಸರಿಯಾದ ಪ್ರಮಾಣದಲ್ಲಿ ನೀರು ಕುಡಿಯುವುದು, ಪೌಷ್ಟಿಕ ಆಹಾರ ಸೇವನೆ ಮತ್ತು ಸ್ವಲ್ಪ ಸಮಯ ವಿಶ್ರಾಂತಿ ಪಡೆಯುವುದರಿಂದ ಈ ಲಕ್ಷಣಗಳು ತಕ್ಷಣವೇ ಮಾಯವಾಗುತ್ತವೆ. ರಕ್ತದಾನವು ಹೃದಯ, ಕಿಡ್ನಿ ಮತ್ತು ಯಕೃತ್ತಿನಂತಹ ಅಂಗಗಳ ನಡುವೆ ಒಂದು ಅದ್ಭುತ ಸಮನ್ವಯತೆಯನ್ನು ಉಂಟುಮಾಡಿ ದೇಹವನ್ನು ನವಚೈತನ್ಯಗೊಳಿಸುತ್ತದೆ.
ಒಟ್ಟಾರೆಯಾಗಿ ಹೇಳುವುದಾದರೆ, ರಕ್ತದಾನ ಮಾಡುವುದು ದಾನಿಯ ಆರೋಗ್ಯಕ್ಕೆ ಯಾವುದೇ ಅಪಾಯವನ್ನು ತರುವುದಿಲ್ಲ. ಬದಲಾಗಿ ಹೊಸ ರಕ್ತದ ಕಣಗಳ ಉತ್ಪಾದನೆಗೆ ದಾರಿ ಮಾಡಿಕೊಡುವ ಮೂಲಕ ದೇಹವನ್ನು ಚಟುವಟಿಕೆಯಿಂದ ಇರಿಸುತ್ತದೆ.
