ದೇಶಾದ್ಯಂತ ವಿಚ್ಛೇದನ ಪ್ರಕರಣಗಳು ಹೆಚ್ಚುತ್ತಿವೆ ಮತ್ತು ಕೌಟುಂಬಿಕ ಹಿಂಸಾಚಾರವು ಕುಟುಂಬಗಳನ್ನು ಹಾಳುಮಾಡುತ್ತಿದೆ. ಈ ಹಿನ್ನೆಲೆಯಲ್ಲಿ ಒಂದು ಹೊಸ ಬೇಡಿಕೆ ಮುನ್ನೆಲೆಗೆ ಬಂದಿದೆ. ವಿವಾಹದ ಸಮಯದಲ್ಲಿ ವರನಿಗೆ (ಹುಡುಗನಿಗೆ) ಡೋಪಿಂಗ್ ಪರೀಕ್ಷೆ ಮತ್ತು ವೈದ್ಯಕೀಯ ಪರೀಕ್ಷೆಗಳನ್ನು ಕಡ್ಡಾಯಗೊಳಿಸುವ ಕಾನೂನು ತರಬೇಕೆಂದು ಆಮ್ ಆದ್ಮಿ ಪಕ್ಷದ (AAP) ಸಂಸದ ಮಲ್ವಿಂದರ್ ಸಿಂಗ್ ಕಾಂಗ್ ಕೇಂದ್ರ ಸರ್ಕಾರವನ್ನು ಒತ್ತಾಯಿಸಿದ್ದಾರೆ. ಶುಕ್ರವಾರ (ಮಾರ್ಚ್ 27, 2026) ಲೋಕಸಭೆಯ ಶೂನ್ಯವೇಳೆಯಲ್ಲಿ ಅವರು ಈ ವಿಷಯವನ್ನು ಪ್ರಸ್ತಾಪಿಸಿದರು.
“ಇತ್ತೀಚಿನ ದಿನಗಳಲ್ಲಿ ನಮ್ಮ ಸಮಾಜದಲ್ಲಿ ವಿಚ್ಛೇದನ ಮತ್ತು ಕೌಟುಂಬಿಕ ಹಿಂಸೆ ಪ್ರಕರಣಗಳು ಹೆಚ್ಚುತ್ತಿವೆ. ಹೊಸ ಸಂಬಂಧ ಏರ್ಪಡುವಾಗ ಹೆಣ್ಣುಮಕ್ಕಳನ್ನು ಸೂಕ್ಷ್ಮವಾಗಿ ಗಮನಿಸಲಾಗುತ್ತದೆ, ಆದರೆ ಗಂಡುಮಕ್ಕಳ ಬಗ್ಗೆ ಅಷ್ಟಾಗಿ ವಿಚಾರಿಸುವುದಿಲ್ಲ,” ಎಂದು ಮಲ್ವಿಂದರ್ ಸಿಂಗ್ ಹೇಳಿದರು. ಮದುವೆಯ ಸಮಯದಲ್ಲಿ ಜನರು ಇಂತಹ ವಿಷಯಗಳನ್ನು ಮುಚ್ಚಿಡುತ್ತಾರೆ ಎಂದು ಅವರು ಅಭಿಪ್ರಾಯಪಟ್ಟರು.
ಸೋಶಿಯಲ್ ಮೀಡಿಯಾ ಪೋಸ್ಟ್‌ನಲ್ಲಿ ಕಾಂಗ್ ಹೇಳಿದ್ದೇನು? ತಮ್ಮ ಬೇಡಿಕೆಗೆ ಸಂಬಂಧಿಸಿದಂತೆ ಸೋಶಿಯಲ್ ಮೀಡಿಯಾದಲ್ಲಿ ಬರೆದುಕೊಂಡಿರುವ ಮಲ್ವಿಂದರ್ ಸಿಂಗ್, “ಲೋಕಸಭೆಯಲ್ಲಿ ಮೌನವಾಗಿ ನೋವು ಅನುಭವಿಸುತ್ತಿರುವ ದೇಶದ ಪ್ರತಿ ಮಗಳು, ಸಹೋದರಿ ಮತ್ತು ತಾಯಿಯ ಪರವಾಗಿ ನಾನು ಮಾತನಾಡಿದ್ದೇನೆ. ವಿಚ್ಛೇದನಗಳು ಕುಟುಂಬಗಳನ್ನು ಛಿದ್ರಗೊಳಿಸುತ್ತಿವೆ. ಈ ಸಮಸ್ಯೆ ಕೇವಲ ಪಂಜಾಬ್‌ಗೆ ಸೀಮಿತವಾಗಿಲ್ಲ; ಇದು ಇಡೀ ಭಾರತದಾದ್ಯಂತ ಕುಟುಂಬಗಳನ್ನು ನಾಶಪಡಿಸುತ್ತಿದೆ,” ಎಂದಿದ್ದಾರೆ.
“ನಾವು ಮದುಮಗಳ ಶಿಕ್ಷಣ, ನಡವಳಿಕೆ ಮತ್ತು ಹಿನ್ನೆಲೆಯ ಬಗ್ಗೆ ಕೂಲಂಕಷವಾಗಿ ವಿಚಾರಿಸುತ್ತೇವೆ. ಆದರೆ ಮದುಮಗನ ವಿಷಯಕ್ಕೆ ಬಂದಾಗ ಅಸಡ್ಡೆ ತೋರುತ್ತೇವೆ. ಮದುವೆಯ ನಂತರ ಮಾದಕ ವ್ಯಸನ, ಗಂಭೀರ ಅನಾರೋಗ್ಯ ಮತ್ತು ಕ್ರಿಮಿನಲ್ ಪ್ರವೃತ್ತಿಗಳು ಜನರ ಜೀವನವನ್ನು ಹಾಳುಮಾಡುತ್ತಿವೆ. ಈ ದ್ವಂದ್ವ ನೀತಿಗೆ ತಕ್ಷಣವೇ ಮುಕ್ತಾಯ ಹಾಡಬೇಕು!” ಎಂದು ಅವರು ಕರೆ ನೀಡಿದ್ದಾರೆ.
ಹೊಸ ಕಾನೂನಿಗೆ ಒತ್ತಾಯ: “ವಿವಾಹ ನೋಂದಣಿ ಪ್ರಮಾಣಪತ್ರ ನೀಡುವ ಮೊದಲು ಪ್ರತಿಯೊಬ್ಬ ವರನಿಗೆ ಡೋಪಿಂಗ್ ಪರೀಕ್ಷೆ ಮತ್ತು ವೈದ್ಯಕೀಯ ಪ್ರಮಾಣಪತ್ರವನ್ನು ಕಡ್ಡಾಯಗೊಳಿಸುವ ಹೊಸ ಕಾನೂನನ್ನು ಭಾರತ ಸರ್ಕಾರ ಮತ್ತು ಎಲ್ಲಾ ರಾಜ್ಯ ಸರ್ಕಾರಗಳು ತಕ್ಷಣವೇ ಜಾರಿಗೆ ತರಬೇಕು. ಇದೊಂದು ಸಣ್ಣ ಸುಧಾರಣೆಯಾದರೂ, ಇದು ನಮ್ಮ ಮಹಿಳೆಯರಿಗೆ ಮತ್ತು ವಿವಾಹದ ಪವಿತ್ರತೆಗೆ ದೊಡ್ಡ ರಕ್ಷಣಾ ಕವಚವಾಗಲಿದೆ. ಇನ್ನು ಮುಂದೆ ನಾವು ಮೌನವಾಗಿ ನೋವು ಅನುಭವಿಸಲು ಸಾಧ್ಯವಿಲ್ಲ,” ಎಂದು ಮಲ್ವಿಂದರ್ ಸಿಂಗ್ ಕಾಂಗ್ ಪ್ರತಿಪಾದಿಸಿದ್ದಾರೆ.
