‌ʼಆರ್ಥಿಕ ಹಿಂಜರಿತʼ ದ ಆತಂಕದ ಮಧ್ಯೆ ಭಾರತೀಯರಿಗೆ ಭರ್ಜರಿ ಗುಡ್‌ ನ್ಯೂಸ್

ಜಗತ್ತಿನ ಬಲಿಷ್ಠ ರಾಷ್ಟ್ರಗಳು ಕೂಡ ಆರ್ಥಿಕ ಹಿಂಜರಿತದಿಂದ ಕಂಗೆಟ್ಟಿವೆ. ಆದ್ರೆ ಪ್ರಪಂಚದ ಉಳಿದ ಭಾಗಗಳಲ್ಲಿರುವ ಆರ್ಥಿಕ ಬಿಕ್ಕಟ್ಟಿನ ಬಿಸಿ ಭಾರತಕ್ಕಿಲ್ಲ. ಈ ಸ್ಥಿತಿಯಿಂದ ಭಾರತ ದೂರವಿದೆ ಅನ್ನೋ ಸಮಾಧಾನಕರ ಸಂಗತಿ ಈಗ ಬಹಿರಂಗವಾಗಿದೆ.

ಪ್ರಸ್ತುತ ಉದ್ಯೋಗ ನೇಮಕಾತಿ ಪ್ರವೃತ್ತಿಗಳು ಭಾರತದಲ್ಲಿ ಉತ್ತಮವಾಗಿದ್ದು, ಕೆಲವೇ ವರ್ಷಗಳಲ್ಲಿ ಉದ್ಯೋಗದ ಬೆಳವಣಿಗೆಯ ದರ ಏರಿಕೆಯಾಗುವ ನಿರೀಕ್ಷೆಯಿದೆ ಎಂದು Quess Corp’sನ ಸಂಸ್ಥಾಪಕ ಅಜಿತ್ ಐಸಾಕ್ ಹೇಳಿದ್ದಾರೆ.

“ಭಾರತ ಅಭಿವೃದ್ಧಿ ಪಥದಲ್ಲಿ ಸಾಗಲಿದೆ. ಶೇ.8ರಷ್ಟು ಬೆಳವಣಿಗೆ ನಿಶ್ಚಿತ. 2000-2007 ರ ನಡುವೆ ಉದ್ಯೋಗ ಕ್ಷೇತ್ರದಲ್ಲಿ ಸಾಕಷ್ಟು ಸುಧಾರಣೆಯಾಗಿದೆ. 2000ನೇ ಇಸ್ವಿಯಲ್ಲಿ 470 ಬಿಲಿಯನ್‌ ಡಾಲರ್‌ ಇದ್ದ GDP 2007 ರಲ್ಲಿ 1.2 ಟ್ರಿಲಿಯನ್‌ ಡಾಲರ್‌ಗೆ ಏರಿತು. ಪ್ರಸ್ತುತ ಟ್ರೆಂಡ್‌ಗಳು ಮುಂದುವರಿದರೆ ಕೆಲವೇ  ವರ್ಷಗಳಲ್ಲಿ ಆ ಬೆಳವಣಿಗೆಯ ದರವನ್ನು ಮರಳಿ ಪಡೆಯಬಹುದುʼʼ ಅಂತಾ ಐಸಾಕ್‌ ಹೇಳಿದ್ರು.

ಬೆಂಗಳೂರಿನಲ್ಲಿ ನಡೆದ ಸಮಾರಂಭದಲ್ಲಿ ಮಾತನಾಡಿದ ಅವರು ಉದ್ಯೋಗ ಅನ್ವೇಷಣೆ ಪೋರ್ಟಲ್ ಮಾನ್‌ಸ್ಟರ್‌ ಇಂಡಿಯಾದ ಮರುಬ್ರಾಂಡಿಂಗ್ ಅನ್ನು ಘೋಷಿಸಿದರು. ಮಾನ್‌ಸ್ಟರ್‌ ಇಂಡಿಯಾ ಸೌತ್‌ ಈಸ್ಟ್‌ ಏಷ್ಯಾ ಮತ್ತು ಮಧ್ಯಪ್ರಾಚ್ಯದಲ್ಲಿ  ಟ್ಯಾಲೆಂಟ್ ಪ್ಲಾಟ್‌ಫಾರ್ಮ್ ‘ಫೌನಿಟ್’ ಆಗಿ ಉದ್ಯೋಗಾಕಾಂಕ್ಷಿಗಳಿಗೆ ಮತ್ತು ಮ್ಯಾನೇಜರ್‌ಗಳನ್ನು ನೇಮಿಸಿಕೊಳ್ಳಲು ಹಲವಾರು ಸೇವೆಗಳನ್ನು ನೀಡುತ್ತದೆ.

Quess Corp 2018 ರಲ್ಲಿ Monster Worldwide ನ APAC ಮತ್ತು ME ವಹಿವಾಟನ್ನು ತನ್ನ ಮಾನವ ಸಂಪನ್ಮೂಲ ಸೇವೆಗಳ ಬಂಡವಾಳವನ್ನು ಬಲಪಡಿಸಲು ಕಾರ್ಯತಂತ್ರದ ಹೂಡಿಕೆಯಾಗಿ ಸ್ವಾಧೀನಪಡಿಸಿಕೊಂಡಿತು. ಭಾರತ, ಸಿಂಗಾಪುರ, ಮಲೇಷ್ಯಾ, ಫಿಲಿಪೈನ್ಸ್, ಹಾಂಗ್ ಕಾಂಗ್, ವಿಯೆಟ್ನಾಂ, ಥೈಲ್ಯಾಂಡ್, ಇಂಡೋನೇಷಿಯಾ, UAE ಮತ್ತು ಸೌದಿ ಅರೇಬಿಯಾದಲ್ಲಿ ಇದು ಯಶಸ್ವಿಯಾಗಿ ಕಾರ್ಯನಿರ್ವಹಿಸುತ್ತಿದೆ.  ಸಾಮೂಹಿಕ ವಜಾಗೊಳಿಸುವಿಕೆಗೆ ಸಾಕ್ಷಿಯಾಗಿರುವ ಟೆಕ್ ವಲಯ ಮತ್ತು ಇಂಟರ್ನೆಟ್ ಆರ್ಥಿಕತೆ ಇನ್ನೂ ಎರಡು ತ್ರೈಮಾಸಿಕಗಳವರೆಗೆ ಆಘಾತ ಅನುಭವಿಸುವ ಸಾಧ್ಯತೆಯಿದೆ ಎಂದು ಐಸಾಕ್ ಹೇಳಿದ್ದಾರೆ.

ಆದರೆ ಐಟಿ ಉದ್ಯಮವು 5 ಮಿಲಿಯನ್ ಜನರಿಗೆ ನೇರವಾಗಿ ಮತ್ತು ಇನ್ನೂ 5 ಮಿಲಿಯನ್ ಜನರಿಗೆ ಪರೋಕ್ಷವಾಗಿ ಉದ್ಯೋಗ ನೀಡುತ್ತದೆ ಎಂದವರು ಭರವಸೆ ನೀಡಿದ್ದಾರೆ.  “ನಾವು ಐಟಿಗಿಂತ ಆರ್ಥಿಕ ಸನ್ನಿವೇಶವನ್ನು ನೋಡಬೇಕು. 18 ದೇಶಗಳಲ್ಲಿ 70 ದಶಲಕ್ಷಕ್ಕೂ ಹೆಚ್ಚು ಉದ್ಯೋಗಾಕಾಂಕ್ಷಿಗಳಿದ್ದಾರೆ. 10,000 ಗ್ರಾಹಕರಿಗೆ ಸೇವೆ ಸಲ್ಲಿಸುತ್ತಿರುವ ಮಾನ್‌ಸ್ಟರ್, ವಿಶೇಷವಾಗಿ ಕೊರೊನಾ ಬಳಿಕ ಟ್ಯಾಲೆಂಟ್ ಮ್ಯಾನೇಜ್‌ಮೆಂಟ್ ಪ್ಲಾಟ್‌ಫಾರ್ಮ್ ಫೌನಿಟ್‌ಗೆ ತನ್ನನ್ನು ಮರುಬ್ರಾಂಡ್ ಮಾಡುತ್ತಿದೆʼʼ ಎಂದು ಐಸಾಕ್‌ ಮಾಹಿತಿ ನೀಡಿದ್ದಾರೆ.

ಕಂಪನಿಯು ಆರ್ಟಿಫಿಶಿಯಲ್‌ ಇಂಟೆಲಿಜೆನ್ಸ್‌, ಡೇಟಾ ಮತ್ತು ಅನಾಲಿಟಿಕ್ಸ್ ಅನ್ನು ಅಣಕು ಸಂದರ್ಶನಗಳು, ಕಲಿಕೆಯ ಸಂಪನ್ಮೂಲಗಳು, ಪೂರ್ವಸಿದ್ಧತಾ ಸಾಮಗ್ರಿಗಳಾಗಿ ವೈಯಕ್ತೀಕರಿಸಲು ಯೋಜಿಸಿದೆ. “ಭವಿಷ್ಯದ ವೇದಿಕೆಯಲ್ಲಿ ಹೆಚ್ಚು ಕ್ರಿಯಾತ್ಮಕ ಉದ್ಯೋಗ ಮಾರುಕಟ್ಟೆ, ಕೌಶಲ್ಯ ಆಧಾರಿತ ನೇಮಕಾತಿ ಮತ್ತು ವೃತ್ತಿಜೀವನದಿಂದ ಬದಲಾಗುವ ನಿರೀಕ್ಷೆಗಳನ್ನು ಪೂರೈಸುವ ಅಗತ್ಯವಿದೆ. ಮಾನ್‌ಸ್ಟರ್‌ಗೆ ಹೊಸ ದಿಕ್ಕನ್ನು ಅನಾವರಣಗೊಳಿಸಲು ನಾವು ಉತ್ಸುಕರಾಗಿದ್ದೇವೆ, ಉದ್ಯೋಗ ಮತ್ತು ಅಭ್ಯರ್ಥಿಗಳ ಅನ್ವೇಷಣೆಯಿಂದ ಗಮನಾರ್ಹವಾಗಿ ಉತ್ತಮ ಫಲಿತಾಂಶಗಳನ್ನು ಸಕ್ರಿಯಗೊಳಿಸಲು ಅನುವು ಮಾಡಿಕೊಡುತ್ತದೆ ”ಎಂದು ಮಾನ್‌ಸ್ಟರ್‌ನ ಈ ಹಿಂದಿನ ಫೌನಿಟ್‌ನ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ಶೇಖರ್ ಗರಿಸ್ಸಾ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.