ಕ್ಯಾಮೆರಾ ಕಣ್ಣಲ್ಲಿ ಸೆರೆಯಾಯ್ತು ಅಪರೂಪದ ಹಿಮ ಚಿರತೆ: ಫೋಟೋ ನೋಡಿ ಫಿದಾ ಆದ ನೆಟ್ಟಿಗರು

ವನ್ಯಜೀವಿಗಳ ಜಗತ್ತೆ ವಿಸ್ಮಯಭರಿತವಾಗಿರುತ್ತೆ. ಅದು ನಾವಿರುವ ಜಗತ್ತಿಗಿಂತ ಭಿನ್ನವಾಗಿರುತ್ತೆ ಪ್ರಾಣಿಗಳದ್ದೇ ದರ್ಬಾರ್‌ ನಡೆಯೋ ಆ ಜಗತ್ತಿನ ಪರಿಚಯ ತುಂಬಾ ಕಡಿಮೆ ಜನರಿಗೆ ಇರುತ್ತೆ. ಎಷ್ಟೋ ಬಾರಿ ಕಾಡಿನಲ್ಲಿರುವ ಅನೇಕ ಪ್ರಾಣಿಗಳನ್ನ ನಾವು ನೋಡೇ ಇರೋಲ್ಲ. ಆದರೆ ಈ ವೈಲ್ಡ್‌ಲೈಫ್‌ ಫೋಟೋಗ್ರಫಿ ಮಾಡುವವರು ಆಗಾಗ ತಮ್ಮ ಕ್ಯಾಮೆರಾ ಕಣ್ಣಲ್ಲಿ ಅದನ್ನ ಸೆರೆ ಹಿಡಿದು ನಮ್ಮ ಮುಂದೆ ಇಡುತ್ತಾರೆ.

ಇಲ್ಲೊಬ್ಬ ಅದ್ಭುತ ಫೋಟೋಗ್ರಾಫರ್ ಮಾಡಿರುವ ಸಾಹಸದ ಕೆಲಸ ನೋಡಿ ನೀವು ಮೂಕವಿಸ್ಮಿತರಾಗಿ ಬಿಡ್ತಿರಾ. ಇವರು ಅಪರೂಪದಲ್ಲೇ ಅಪರೂಪವಾಗಿರುವ ಹಿಮಚಿರತೆಯ ಚಿತ್ರ ತೆಗೆದು ಜಗತ್ತನ್ನೇ ಬೆರಗುಗೊಳಿಸಿದ್ದಾರೆ.‌

ವಿಶ್ವದ ಅತ್ಯಂತ ವಿಶಿಷ್ಟ ಪ್ರಾಣಿಗಳಲ್ಲೊಂದು ಹಿಮ ಚಿರತೆ. ಈ ಹಿಮಚಿರತೆ ವಾಸಿಸೋದು ಮಧ್ಯ ಮತ್ತು ದಕ್ಷಿಣ ಏಷ್ಯಾದ ಪರ್ವತ ಶ್ರೇಣಿಗಳಲ್ಲಿ ಮಾತ್ರ. ಇವು ಆದಷ್ಟು ಮರೆಯಲ್ಲಿದ್ದು ರಹಸ್ಯವಾಗಿಯೇ ಜೀವನ ನಡೆಸುತ್ತವೆ ಅನ್ನೋದು ವಿಶೇಷ.

ಈ ಪ್ರಜಾತಿಯ ಚಿರತೆಗಳು ಅಷ್ಟು ಸುಲಭವಾಗಿ ಯಾರ ಕಣ್ಣಿಗೂ ಬೀಳೋದಿಲ್ಲ. ಹೀಗಾಗಿಯೇ ಅವುಗಳನ್ನು ಹೆಚ್ಚಾಗಿ ‘ಮೌಂಟೆನ್ ಘೋಸ್ಟ್ಸ್’ ಅಂತ ಕರೀತಾರೆ. ಅವು ಟಿಬೆಟಿಯನ್ ಪ್ರಸ್ಥಭೂಮಿಯಲ್ಲಿ ಮತ್ತು ಭಾರತ, ನೇಪಾಳ ಮತ್ತು ಭೂತಾನ್‌ನಲ್ಲಿ ಹಿಮಾಲಯದ ಎತ್ತರದ ಪ್ರದೇಶಗಳಲ್ಲಿ ವಾಸವಿದ್ದರೂ ಸಹ ಒಂದೇ ಒಂದು ಹಿಮ ಚಿರತೆಯನ್ನು ನೋಡುವುದು ಕಷ್ಟ.

ಯುಎಸ್ ಮೂಲದ ಛಾಯಾಗ್ರಾಹಕರಾದ ಕಿಟ್ಟಿಯಾ ಪಾವ್ಲೋವ್ಸ್ಕಿ ಇಂಥ ಅಪರೂಪದ ಪ್ರಾಣಿಯ ಫೋಟೋವನ್ನು ಅದ್ಭುತವಾಗಿ ಸೆರೆಹಿಡಿದಿದ್ದು ಅದನ್ನು ಇನ್‌ ಸ್ಟಾಗ್ರಾಂ ನಲ್ಲಿ ಪೋಸ್ಟ್‌ ಮಾಡಿದ್ದಾರೆ. ಒಟ್ಟು 5 ಪೋಟೋಗಳನ್ನು ಹೊಂದಿರುವ ಅವರ ಪೋಸ್ಟ್‌ ಗೆ ನೆಟ್ಟಿಗರು ಬೆರಗಾಗಿದ್ದಾರೆ.

ತನ್ನ ಮೊದಲ ಪೋಸ್ಟ್‌ನಲ್ಲಿ, ಬಿಳಿ ಚಿರತೆಯನ್ನು ಪತ್ತೆಹಚ್ಚಲು ಕಾಲ್ನಡಿಗೆಯಲ್ಲಿ 103 ಮೈಲುಗಳಷ್ಟು ಚಾರಣ ಮಾಡಬೇಕಾಗಿತ್ತು ಎಂದು ಅವರು ವಿವರಿಸಿದ್ದಾರೆ.

“ಗೋರಕ್ ಶೆಪ್‌ನ ಹೊರಗೆ ಒಂದು ಕಟುವಾದ ಚಳಿಯ ಮುಂಜಾನೆ, ನಾನು ನನ್ನ ನಿಕ್ಕೋನ್ 500mm f/4 ಲೆನ್ಸ್‌ನೊಂದಿಗೆ ಖುಂಬು ಕಣಿವೆಯನ್ನು ಹೊರತೆಗೆಯುತ್ತಾ ಅಂತರದ ಕಂದರದ ಅಂಚನ್ನು ಹಿಂಬಾಲಿಸಿದೆ. ನನ್ನ ಕ್ಯಾಮೆರಾದ ಟೆಲಿಫೋಟೋ ಲೆನ್ಸ್ ಮೂಲಕ ಕಣ್ಣು ಹಾಯಿಸುತ್ತಾ, ಮೌಂಟ್ ಪೂಮೋರಿ ನೆರಳಿನಲ್ಲಿ ಏನೋ ಕಂಡಂತಾಯಿತು. ಮೊದಲಿಗೆ, ಇದು ಬಂಡೆ ಎಂದು ನಾನು ಭಾವಿಸಿದೆ, ಆದರೆ ಕೊನೆಗೆ ನಾನು ಹುಡುಕುತ್ತಿರುವುದು ಅದನ್ನೇ ಎಂಬುದು ನನಗೆ ಗೊತ್ತಾಯಿತು” ಎಂದು ಪೋಸ್ಟ್‌ ನಲ್ಲಿ ಬರೆದುಕೊಂಡಿದ್ದಾರೆ.

ಮೊದಲ ಫೋಟೋದಲ್ಲಿ ದೊಡ್ಡ ಬೆಕ್ಕು ಬಹಳ ದೂರದಲ್ಲಿರುವುದನ್ನು ನೋಡಬಹುದು. ಹಿಮ ಪರ್ವತದಿಂದ ಆವೃತವಾದ ಪರ್ವತಗಳ ನಡುವೆ ನಡೆದುಕೊಂಡು ಹೋಗುತ್ತಿದೆ. ಪಾವ್ಲೋವ್ಸ್ಕಿಯವರ ಎರಡನೇ ಪೋಸ್ಟ್, ಹಿಮಕರಡಿ ಕಂದಕದ ಮೇಲೆ ಕುಳಿತಿರುವುದನ್ನು ತೋರಿಸುತ್ತದೆ.

“ಹಿಮ ಚಿರತೆಗಳು ಮುಂಜಾನೆ ಮತ್ತು ಮುಸ್ಸಂಜೆಯ ಸಮಯದಲ್ಲಿ ಹೆಚ್ಚು ಸಕ್ರಿಯವಾಗಿರುತ್ತವೆ. ಮುಂಜಾನೆ 4 ಗಂಟೆಯ ಹೊತ್ತಿಗೆ ನನ್ನ ಬೂಟುಗಳನ್ನು ಹಾಕಿಕೊಂಡು ಹೊರಟೆ. ರಾತ್ರಿಯು ತಂಪಾದ, ಫ್ಯಾಂಟಸ್ಮಲ್ ಸೌಂದರ್ಯವನ್ನು ಹೊಂದಿತ್ತು. 25 ಪೌಂಡ್‌ಗಳ ಕ್ಯಾಮೆರಾ ಗೇರ್‌ನೊಂದಿಗೆ, ನಾನು ಗೋರಕ್ ಶೆಪ್‌ನ ಈಶಾನ್ಯಕ್ಕೆ ಹೊರಟೆ ಮತ್ತು ಹೆಪ್ಪುಗಟ್ಟಿದ ಸರೋವರವನ್ನು ದಾಟಿದೆ. ಅಷ್ಟು ಕಷ್ಟಪಟ್ಟ ನಂತರವೇ ಈ ಅದ್ಭುತ ಫೋಟೋ ಕ್ಲಿಕ್ಕಿಸಲು ಸಾಧ್ಯವಾಗಿದ್ದು ಎಂದು ಅವರು ಪೋಸ್ಟ್ ನಲ್ಲಿ ಬರೆದುಕೊಂಡಿದ್ದಾರೆ.