‘ಕಾಂತಾರ’ ಹೊಗಳುವ ಭರದಲ್ಲಿ ಎಡವಟ್ಟು ಮಾಡಿಕೊಂಡ್ರಾ ಆರ್ ಎಸ್ ಎಸ್ ಕಾರ್ಯಕರ್ತೆ….?

ಸೆಲಿಬ್ರಿಟಿಗಳು ಸೇರಿದಂತೆ ಸಂಘ ಸಂಸ್ಥೆಗಳು ಕೂಡ ರಿಷಬ್ ಅವರನ್ನು ಹಾಡಿ ಹೊಗಳುತ್ತಿದ್ದಾರೆ. ಇನ್ನು ಆರ್ ಎಸ್ ಎಸ್ ನ ಕಾರ್ಯಕರ್ತೆ ಜ್ಯೋತಿ ಸುಪರ್ಣಾ ಚಿಂಚೋಳಿ ಅವರು ಸಿನಿಮಾ ಬಗ್ಗೆ ಮಾತನಾಡುತ್ತಾ ಡಾ. ರಾಜ್​ಕುಮಾರ್​ ಕುಟುಂಬದ ಬಗ್ಗೆ ಅವಹೇಳನಕಾರಿಯಾಗಿ ಟ್ವೀಟ್​ ಮಾಡಿದ್ದಾರೆ.

ಹೌದು, ಕಾಂತಾರ ಸಿನಿಮಾ ಹೊಗಳುವ ಭರದಲ್ಲಿ ರಾಜ್ ಕುಟುಂಬದ ಮೇಲೆ ನೆಪೊಟಿಸಂ ಆರೋಪ ಹೊರಿಸಿದ್ದಾರೆ‌. ಈ ಕುರಿತು ಟ್ವೀಟ್ ಮಾಡಿರುವ ಅವರು, ಪುನೀತ್ ರಾಜ್ ಕುಮಾರ್ ನೆಪೊ ಕಿಡ್ ಎಂದು ಹೇಳಿದ್ದಾರೆ.‌ ಬಾಲಿವುಡ್​ನಲ್ಲಿ ಕರಣ್​ ಜೋಹರ್​ ಇದ್ದಂತೆ, ಕರ್ನಾಟಕದಲ್ಲಿ ರಾಜ್​ಕುಮಾರ್ ಅವರು.​ ಅವರ ಮಕ್ಕಳು ಅಂದರೆ ನೆಪೋಕಿಡ್ಸ್​ ದೇವರಿದ್ದಂತೆ ಎಂದಿದ್ದಾರೆ. ಬೇರೆ ನಟರು ಸ್ಯಾಂಡಲ್​ವುಡ್​ನಲ್ಲಿ ಇಲ್ಲಿ ಉಳಿಯಬೇಕಾದರೆ ಇವರಿಗೆ ನಮಸ್ಕಾರ ಹೇಳಿ ಸಲಾಂ ಹೊಡೆಯಬೇಕು. ರಿಷಬ್​ ಶೆಟ್ಟಿ ಕೂಡ ಪುನೀತ್​ ರಾಜ್​ಕುಮಾರ್​ ಅವರಿಗೆ ಈ ಪಾತ್ರವನ್ನು ನೀಡಿದ್ದೆ ಅಂತ ಹೇಳಬೇಕಾಯಿತು ಎಂದು ಹೇಳಿದ್ದಾರೆ.

ಇನ್ನು ಮುಂದುವರೆದ ಅವರ ಟ್ವೀಟ್, ನಿಜವಾಗಿ ಹೇಳಿ, ಪುನೀತ್​ಗೆ ಈ ಪಾತ್ರ ಮಾಡಲು ಸಾಧ್ಯವಾಗುತ್ತಿತ್ತಾ..? ರಿಷಬ್​ ಅವರ ಆ ಮೂಲದವರೇ. ದೈವಾರಾಧನೆ ಮತ್ತು ಭೂತಕೋಲದ ಬಗ್ಗೆ ರಿಷಬ್ ಗೆ ಗೊತ್ತಿದೆ. ಹಾಗಾಗಿಯೇ ಅವರು ದೈವಿ ನಟನೆ ಮಾಡಲು ಸಾಧ್ಯವಾಯ್ತು ಎಂದಿದ್ದಾರೆ. ಇನ್ನು ಪುನೀತ್ ಅವರ ಸಾವಿಗೂ ಸಂತಾಪ ಸೂಚಿಸಿದ್ದಾರೆ ಜ್ಯೋತಿ. ಮತ್ತೊಂದು ವಿಚಾರ ಅಂದರೆ ಜ್ಯೋತಿ ಅವರ ಟ್ವಿಟರ್​ ಖಾತೆಯನ್ನು ನರೇಂದ್ರ ಮೋದಿ, ಸಿ.ಟಿ. ರವಿ ಮುಂತಾದ ಮುಖಂಡರು ಕೂಡ ಫಾಲೋ ಮಾಡುತ್ತಿದ್ದಾರೆ. ಜ್ಯೋತಿ ಅವರ ಟ್ವೀಟ್ ಗೆ ಅಪ್ಪು ಅಭಿಮಾನಿಗಳು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ.