ಆಪಲ್​ ಕಂಪನಿಯನ್ನು ಅಣಕಿಸಲು ಹೋಗಿ ಪೇಚಿಗೆ ಸಿಲುಕಿದ ಗೂಗಲ್​…! ಆಗಿದ್ದೇನು ಗೊತ್ತಾ ?

ಪ್ರತಿಸ್ಪರ್ಧಿ ಕಂಪೆನಿಗಳನ್ನು ಅಣಕಿಸುವುದು, ಕಾಲೆಳೆಯುವುದು ಸರ್ವೇ ಸಾಮಾನ್ಯ, ಅವು ಮಾಡುವ ತಪ್ಪುಗಳನ್ನು ಹುಡುಕುವಲ್ಲಿ ಉಳಿದ ಕಂಪನಿಗಳು ಕಾರ್ಯನಿರತವಾಗಿರುತ್ತವೆ ಎನ್ನುವುದು ಸುಳ್ಳಲ್ಲ. ಆದರೆ ಆಪಲ್​ ಕಂಪೆನಿಯ ಸಿಇಒ ಅವರನ್ನು ಅಣಕಿಸಲು ಹೋಗಿ ಖುದ್ದು ಗೂಗಲ್​ ಕಂಪೆನಿ ಪೇಚಿಗೆ ಸಿಲುಕಿರುವ ಘಟನೆ ನಡೆದಿದೆ.

ಆಗಿದ್ದೇನೆಂದರೆ, ಆಪಲ್​ ಕಂಪನಿಯು ತನ್ನ ಹೊಸ M2 iPad Pro, iPad 10, ಮುಂದಿನ ಪೀಳಿಗೆಯ ಆಪಲ್​ ಟಿವಿ 4K ಅನ್ನು ಅನಾವರಣಗೊಳಿಸುವ ಸಂಬಂಧ ಕೆಲವೊಂದು ಮಾಹಿತಿಗಳನ್ನು ಸಾಮಾಜಿಕ ಜಾಲತಾಣದಲ್ಲಿ ಶೇರ್​ ಮಾಡಿಕೊಂಡಿದೆ.

ತನ್ನ ಹೊಸ ಉತ್ಪನ್ನಗಳ ಬಗ್ಗೆ ಜನರಿಗೆ ಮಾಹಿತಿ ನೀಡಲು ಆಪಲ್​ ಸಿಇಒ ಟಿಮ್ ಕುಕ್ ಅವರು ಟ್ವಿಟರ್‌ನಲ್ಲಿ #TakeNote ಹ್ಯಾಶ್‌ಟ್ಯಾಗ್ ಅನ್ನು ಪೋಸ್ಟ್ ಮಾಡಿದ್ದರು. ಅವರನ್ನು ಅಣಕಿಸಲು ಯತ್ನಿಸಿದ ಗೂಗಲ್ ಪಿಕ್ಸೆಲ್​ನ ಅಮೆರಿಕದ ಖಾತೆಯು ಅದೇ #TakeNote ಹ್ಯಾಷ್​ಟ್ಯಾಗ್​ನೊಂದಿಗೆ ತನ್ನ ಕಂಪನಿಯ ಪ್ರಚಾರದಲ್ಲಿ ತೊಡಗಿಸಿಕೊಂಡಿತು. ಆದರೆ ಈ ತಮಾಷೆ ಅದಕ್ಕೆ ಬಲು ದುಬಾರಿಯಾಗಿ ಪರಿಣಿಸಿತು.

ಇದಕ್ಕೆ ಕಾರಣ ಏನೆಂದರೆ ಗೂಗಲ್​ ಪಿಕ್ಸೆಲ್​ ಈ ರೀತಿ ಟ್ವೀಟ್​ ಮಾಡಿದ್ದು ಆಪಲ್​ ಕಂಪೆನಿಯ ಐ-ಫೋನ್​ನಿಂದಲೇ! ಟ್ವಿಟರ್​ನಲ್ಲಿ ಅದು ಸ್ಪಷ್ಟವಾಗಿ ಗೋಚರಿಸುತ್ತಲೇ ಕಮೆಂಟಿಗರು ವಿವಿಧ ರೀತಿಯ ವಿರುದ್ಧ ಕಮೆಂಟ್​ ಮಾಡಲು ಶುರು ಮಾಡಿದರು. ಎಡವಟ್ಟು ಗೊತ್ತಾಗುತ್ತಿದ್ದಂತೆಯೇ ಪೇಚಿಗೆ ಸಿಲುಕಿದ ಗೂಗಲ್​ ಪಿಕ್ಸೆಲ್​, ಮತ್ತೊಂದು ಟ್ವೀಟ್​ ಮಾಡಿ ಸಮಜಾಯಿಷಿ ಕೊಟ್ಟಿದೆ. ಆದರೆ ಹಳೆಯ ಟ್ವೀಟ್​ ಮಾತ್ರ ವೈರಲ್​ ಆಗುತ್ತಲೇ ಇದೆ!