ಕಟ್ಟಡದೆತ್ತರಕ್ಕೆ ಚಿಮ್ಮುವ ಸಮುದ್ರದ ಅಲೆ….! ಪ್ರವಾಸಿಗರಿಗೆ ಇದೇ ಆಕರ್ಷಣೆ

ಸಮುದ್ರ ಕಂಡೊಡನೆ ಅದರ ಮುಂದೆ ಅಥವಾ ಸಮೀಪ ಮನೆ ಹೊಂದಿರಬೇಕೆಂದು ಬಯಸುವವರು ಸಾಕಷ್ಟು ಮಂದಿ ಸಿಗುತ್ತಾರೆ. ಆದರೆ ಎತ್ತರದ ಅಲೆಗಳು ಕಟ್ಟಡದ ಮೇಲ್ಭಾಗವನ್ನು ಸ್ಪರ್ಶಿಸುವ ಸ್ಥಳದಲ್ಲಿ ವಾಸಿಸಲು ಸಿದ್ಧವೇ? ಅದರಲ್ಲೂ ಅಲೆಯ ಆ ಭಯಾನಕ ದನಿ ಸದಾ ಕೇಳಿಕೊಂಡಿರಲು ಸಾಧ್ಯವೇ? ಆದರೆ ಪ್ರಪಂಚದಾದ್ಯಂತದ ಪ್ರವಾಸಿಗರು ಫ್ರಾನ್ಸ್​ನ ಬಂದರು ನಗರವಾದ ಸೇಂಟ್​-ಮಾಲೋದಲ್ಲಿ ವೀಕ್ಷಿಸಲು ಬರುವುದು ಇಂಥದ್ದೇ ಒಂದು ಕಾರಣಕ್ಕೆ.

ಸೇಂಟ್​-ಮಾಲೋ ಮಧ್ಯಕಾಲೀನ ಫ್ರೆಂಚ್​ ವಾಲ್​ ನಗರವಾಗಿದ್ದು, ಇಂಗ್ಲಿಷ್​ ಚಾನೆಲ್​ (ಕೆನಾಲ್​ ಡ ಮಂಚಾ) ದ ದಡದಲ್ಲಿರುವ ಬ್ರಿಟಾನಿ ಪ್ರದೇಶದಲ್ಲಿದೆ. ಕಡಲ್ಗಳ್ಳರು ಮತ್ತು ಸುಂದರವಾದ ಕಡಲತೀರಗಳಿಗೆ ಇದು ಹೆಸರುವಾಸಿಯಾಗಿದೆ. ಇದೀಗ ಸಾಮಾಜಿಕ ಜಾಲತಾಣದಲ್ಲಿ ಕಾಣಿಸಿಕೊಂಡಿರುವ ವಿಡಿಯೋದಲ್ಲಿ ಕಂಡುಬರುವಂತೆಯೇ ಆಕರ್ಷಕ ನಗರವಾದ ಸೇಂಟ್​-ಮಾಲೋ ಎತ್ತರದ ಅಲೆಗಳಿಗೆ ಸಾಕ್ಷಿಯಾಗಿದೆ. ಆಶ್ಚರ್ಯಕರವಾಗಿಯೂ ಇದೆ. ಈ ಸುಂದರವಾದ ಮತ್ತು ಭಯಾನಕ ವಿದ್ಯಮಾನವನ್ನು ಕಣ್ಣುತುಂಬಿಕೊಳ್ಳಲು ಪ್ರವಾಸಿಗರು ಯುರೋಪಿನಾದ್ಯಂತ ಇಲ್ಲಿಗೆ ಬರುತ್ತಾರೆ.

ವೈರಲ್​ ಆಗಿರುವ ರೀಲ್​ 30.4 ಮಿಲಿಯನ್​ ವೀಕ್ಷಣೆಯಾಗಿದ್ದು, 1.12 ಮಿಲಿಯನ್​ ಲೈಕ್​ ಪಡೆದುಕೊಂಡಿದೆ. ಮಿರಾಕಲ್​ ಆಫ್​ ಸೌಂಡ್​ ಹಾಡು ವಿಡಿಯೋವನ್ನು ಇನ್ನಷ್ಟು ಭಯಾನಕವಾಗಿಸುತ್ತದೆ ಎಂದು ಕೆಲವು ಜಾಲತಾಣ ಬಳಕೆದಾರರು ಗಮನಸೆಳೆದಿದ್ದಾರೆ.

ಸೇಂಟ್​ ಮಾಲೋವನ್ನು ಕಡಲ್ಗಳ್ಳರ ನಗರ ಎಂದು ಕರೆಯಲಾಗುತ್ತದೆ, ಬೃಹತ್​ ಗ್ರಾನೈಟ್​ ವಾಲ್​ ಐತಿಹಾಸಿಕ ಕೇಂದ್ರವನ್ನು ಸುತ್ತುವರೆದಿವೆ. ಇದು ಹಿಂದೆ ಕಡಲ್ಗಳ್ಳರಿಗೆ ಭದ್ರಕೋಟೆಯಾಗಿತ್ತು. ಅಲ್ಲಿ ಹಾದುಹೋಗುವ ವಿದೇಶಿ ಹಡಗುಗಳನ್ನು ಆಕ್ರಮಿಸಲು ದರೋಡೆಕೋರರು ಫ್ರಾನ್ಸ್​ ರಾಜನಿಂದ ಅಧಿಕಾರ ಪಡೆದಿದ್ದರೆಂಬ ಮಾಹಿತಿಯೂ ಇದೆ.