ಗುಂಪು ಘರ್ಷಣೆಗೆ ಮಾರುಕಟ್ಟೆ ಧಗಧಗ: ಇಬ್ಬರಿಗೆ ಚಾಕು ಇರಿತ; ಅಂಗಡಿ ಧ್ವಂಸ, ಬೈಕ್, ತಳ್ಳುವ ಗಾಡಿ ಜಖಂ

ಬಾಗಲಕೋಟೆ: ಕೆರೂರಿನ ಮಾರುಕಟ್ಟೆಯಲ್ಲಿ ಗುಂಪು ಘರ್ಷಣೆ ಉಂಟಾಗಿದ್ದು, ಇಬ್ಬರಿಗೆ ಚಾಕುವಿನಿಂದ ಇರಿಯಲಾಗಿದೆ.

ಬಾಗಲಕೋಟೆ ಜಿಲ್ಲೆ ಬಾದಾಮಿ ತಾಲೂಕಿನ ಕೆರೂರು ಪಟ್ಟಣದಲ್ಲಿ ಘಟನೆ ನಡೆದಿದ್ದು, ಅರುಣ ಕಟ್ಟಿಮನಿ ಮತ್ತು ಲಕ್ಷ್ಮಣ ಕಟ್ಟಿಮನಿ ಅವರಿಗೆ ದುಷ್ಕರ್ಮಿಗಳು ಚಾಕುವಿನಿಂದ ಇರಿದಿದ್ದಾರೆ. ರಸ್ತೆಗೆ ತರಕಾರಿ ಚೆಲ್ಲಲಾಗಿದ್ದು, ಎರಡು ತಳ್ಳುವ ಗಾಡಿಗಳಿಗೆ ಬೆಂಕಿ ಹಚ್ಚಲಾಗಿದೆ.

ಗುಂಪು ಘರ್ಷಣೆಯ ವೇಳೆಯಲ್ಲಿ 10 ಅಂಗಡಿಗಳು ಧ್ವಂಸವಾಗಿದ್ದು, 5 ಬೈಕ್ ಗಳು ಜಖಂಗೊಂಡಿವೆ. ಎರಡು ಗುಂಪುಗಳ ನಡುವಿನ ಘರ್ಷಣೆಯಲ್ಲಿ ಮಾರುಕಟ್ಟೆ ಧ್ವಂಸಗೊಂಡಿದೆ. ಗಾಯಾಳುಗಳನ್ನು ಬಾಗಲಕೋಟೆ ಜಿಲ್ಲಾ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ಕೊಡಿಸಲಾಗಿದೆ. ಕೆರೂರು ಪೊಲೀಸರು ಸ್ಥಳಕ್ಕೆ ಆಗಮಿಸಿ ಪರಿಸ್ಥಿತಿಯನ್ನು ನಿಯಂತ್ರಿಸಿದ್ದಾರೆ. ಸ್ಥಳದಲ್ಲೇ ಮೊಕ್ಕಾಂ ಹೂಡಿ ಪರಿಸ್ಥಿತಿ ತಿಳಿಗೊಳಿಸಿದ್ದಾರೆ.