ಕರೋನಾ ಸಂಕಷ್ಟದ ವೇಳೆ ಶೇ.24 ವಿದ್ಯಾರ್ಥಿಗಳ ಬಳಿ ಇರಲಿಲ್ಲ ಇ-ಉಪಕರಣಗಳು; ಸಮೀಕ್ಷೆಯಲ್ಲಿ ಶಾಕಿಂಗ್‌ ಸಂಗತಿ ಬಹಿರಂಗ

ನವದೆಹಲಿ: ದೇಶಾದ್ಯಂತ ನಡೆದ ಸಮೀಕ್ಷೆಯಲ್ಲಿ ಭಾಗವಹಿಸಿದ ಮೂರು, ಐದು, ಏಳು ಮತ್ತು 10ನೇ ತರಗತಿಯ 34 ಲಕ್ಷ ಶಾಲಾ ವಿದ್ಯಾರ್ಥಿಗಳ ಪೈಕಿ ಶೇಕಡ 38 ವಿದ್ಯಾರ್ಥಿಗಳಿಗೆ ಕರೊನಾ ಅವಧಿಯಲ್ಲಿ ಶಿಕ್ಷಣ ಪಡೆಯವುದು ಬಹಳ ತ್ರಾಸದಾಯಕವಾಗಿತ್ತು. ಶೇಕಡ 24 ಮಕ್ಕಳಿಗೆ ಮನೆಯಲ್ಲಿ ಆನ್‌ಲೈನ್‌ ಶಿಕ್ಷಣ ಪಡೆಯುವುದಕ್ಕೆ ಉಪಕರಣವಿರಲಿಲ್ಲ ಎಂಬ ಅಂಶ ಗಮನಸೆಳೆದಿದೆ. ಈ ಸಮೀಕ್ಷಾ ವರದಿ ಪ್ರಕಾರ, ಶೇಕಡ 80 ವಿದ್ಯಾರ್ಥಿಗಳಿಗೆ ಸಹಪಾಠಿಗಳ ಜತೆಗೆ ಕುಳಿತು ಕಲಿಯುವುದರಲ್ಲೇ ಒಲವು ಇದ್ದುದು ಕಂಡುಬಂತು.

ಭಾಷೆ, ಗಣಿತ, ಪರಿಸರ ವಿಜ್ಞಾನ, ಸಮಾಜ ವಿಜ್ಞಾನ ಮತ್ತು ಇಂಗ್ಲಿಷ್‌ನಲ್ಲಿ ಸಾಮರ್ಥ್ಯ ಆಧಾರಿತ ಮೌಲ್ಯಮಾಪನದ ಮೇಲೆ ಕೇಂದ್ರೀಕರಿಸಿದ ರಾಷ್ಟ್ರೀಯ ಸಾಧನೆ ಸಮೀಕ್ಷೆ 2021 ವಿದ್ಯಾರ್ಥಿಗಳು ಉನ್ನತ ತರಗತಿಗೆ ಹೋದಂತೆ ಅವರ ಕಲಿಕೆಯ ಮಟ್ಟಗಳು (ಸಾಧನೆಗಳು) ಕುಸಿಯುತ್ತವೆ ಮತ್ತು ಭಾರತದಲ್ಲಿ 48% ವಿದ್ಯಾರ್ಥಿಗಳು ಕಾಲ್ನಡಿಗೆಯಲ್ಲಿ ಶಾಲೆಗೆ ಹೋಗುತ್ತಾರೆ ಎಂದು ಸಮೀಕ್ಷೆಯು ಎತ್ತಿ ತೋರಿಸಿದೆ.

ಶಾಲಾ ಶಿಕ್ಷಣ ಮತ್ತು ಸಾಕ್ಷರತೆ ಇಲಾಖೆ, ಶಿಕ್ಷಣ ಸಚಿವಾಲಯವು ಬುಧವಾರ ಸಂಜೆ ರಾಷ್ಟ್ರೀಯ ಸಾಧನೆ ಸಮೀಕ್ಷೆ 2021ರ ವರದಿಯನ್ನು ಬಿಡುಗಡೆ ಮಾಡಿದೆ. ಇದು ಮೂರು, ಐದು, ಎಂಟು ಮತ್ತು 10ನೇ ತರಗತಿಗಳ ಮಕ್ಕಳ ಕಲಿಕಾ ಸಾಮರ್ಥ್ಯಗಳ ಸಮಗ್ರ ಸಮೀಕ್ಷೆಯನ್ನು ನಡೆಸುವ ಮೂಲಕ ದೇಶದ ಶಾಲಾ ಶಿಕ್ಷಣ ವ್ಯವಸ್ಥೆಯ ಆರೋಗ್ಯವನ್ನು ನಿರ್ಣಯಿಸುತ್ತದೆ. ಮೂರು ವರ್ಷಗಳಿಗೆ ಒಮ್ಮೆ ಈ ಸಮೀಕ್ಷೆ ನಡೆಯುತ್ತದೆ. ಇದು ಶಾಲಾ ಶಿಕ್ಷಣ ವ್ಯವಸ್ಥೆಯ ಒಟ್ಟಾರೆ ಮೌಲ್ಯಮಾಪನವನ್ನು ಪ್ರತಿಬಿಂಬಿಸುತ್ತದೆ. 2017ರಲ್ಲಿ ಹಿಂದಿನ ಸಮೀಕ್ಷೆ ಪ್ರಕಟವಾಗಿತ್ತು. ಒಟ್ಟು 34,01,158 ವಿದ್ಯಾರ್ಥಿಗಳು ಮತ್ತು ಸರಿಸುಮಾರು 1,18,274 ಶಾಲೆಗಳ 26,824 ಶಿಕ್ಷಕರು ಸಮೀಕ್ಷೆಯಲ್ಲಿ ಭಾಗವಹಿಸಿದ್ದರು.

ವರದಿಯ ಪ್ರಕಾರ, 500 ಸ್ಕೋರ್‌ನಲ್ಲಿ ರಾಷ್ಟ್ರೀಯ ಮಟ್ಟದಲ್ಲಿ ವಿದ್ಯಾರ್ಥಿಗಳ ಸರಾಸರಿ ಕಾರ್ಯಕ್ಷಮತೆಯು ಉನ್ನತ ತರಗತಿಗಳಲ್ಲಿ ಕಡಿಮೆಯಾಗಲು ಪ್ರಾರಂಭಿಸುತ್ತದೆ. ಉದಾಹರಣೆಗೆ, ಭಾಷೆಯಲ್ಲಿ ಮೂರನೇ ತರಗತಿಯ ವಿದ್ಯಾರ್ಥಿಯ ರಾಷ್ಟ್ರೀಯ ಸರಾಸರಿ ಪ್ರದರ್ಶನವು 500 ರಲ್ಲಿ 323 ಆಗಿದೆ, ಆದರೆ 10ನೇ ತರಗತಿಯಲ್ಲಿ 260 ಕ್ಕೆ ಇಳಿಯುತ್ತದೆ. ಅದೇ ರೀತಿ, ಗಣಿತಶಾಸ್ತ್ರದಲ್ಲಿ ಮೂರನೇ ತರಗತಿಯಲ್ಲಿ ರಾಷ್ಟ್ರೀಯ ಸರಾಸರಿ ಸ್ಕೋರ್ 306 ಆಗಿದೆ, ಇದು 284 ಕ್ಕೆ ಇಳಿಯುತ್ತದೆ. ಐದನೇ ತರಗತಿಯಲ್ಲಿ, ಎಂಟನೇ ತರಗತಿಯಲ್ಲಿ 255 ಮತ್ತು 10ನೇ ತರಗತಿಯಲ್ಲಿ 220ಕ್ಕೆ ಇಳಿಕೆಯಾಗುತ್ತದೆ.