ಏರ್ ಇಂಡಿಯಾ ವಿಮಾನದ ಒಳಾಂಗಣ ವಿನ್ಯಾಸ ಕಳಪೆ ಎಂದ ಪ್ರಯಾಣಿಕ; ಹೀಗಿತ್ತು ಡಿಜಿಸಿಎ ಪ್ರತಿಕ್ರಿಯೆ

ನವದೆಹಲಿ: ಟಾಟಾ ಗ್ರೂಪ್ ಒಡೆತನದ ಏರ್ ಇಂಡಿಯಾದ ಒಳಾಂಗಣ ವಿನ್ಯಾಸ ಕಳಪೆಯಾಗಿದೆ ಎಂದು ಪ್ರಯಾಣಿಕರೊಬ್ಬರು ದೂರಿದ ನಂತರ, ನಾಗರಿಕ ವಿಮಾನಯಾನ ಮಹಾನಿರ್ದೇಶನಾಲಯ (ಡಿಜಿಸಿಎ) ವಿಮಾನವನ್ನು ದುರಸ್ತಿ ಮಾಡುವಂತೆ ವಿಮಾನಯಾನ ಸಂಸ್ಥೆಗೆ ಆದೇಶಿಸಿದೆ.

ವಿಟಿ-ಇಡಿಎಫ್ ನೋಂದಣಿ ಸಂಖ್ಯೆ ಹೊಂದಿರುವ ಏರ್ ಇಂಡಿಯಾದ ಏರ್‌ಬಸ್ ಎ 320 ವಿಮಾನದ ಮುರಿದ ಆರ್ಮ್‌ ಸ್ಟ್ರೆಸ್ಟ್ ಸೇರಿದಂತೆ ಕಳಪೆ ಒಳಾಂಗಣದ ಒಂದೆರಡು ಚಿತ್ರಗಳನ್ನು ಪ್ರಯಾಣಿಕರು ಸೋಮವಾರ ಸಾಮಾಜಿಕ ಮಾಧ್ಯಮದಲ್ಲಿ ಪೋಸ್ಟ್ ಮಾಡಿದ್ದಾರೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಇದರ ನಂತರ, ಡಿಜಿಸಿಎ ಸಾಧ್ಯವಾದಷ್ಟು ಬೇಗ ಸಮಸ್ಯೆಯನ್ನು ಪರಿಶೀಲಿಸಿ ಮತ್ತು ಸರಿಪಡಿಸಲು ವಿಮಾನಯಾನ ಸಂಸ್ಥೆಗೆ ಹೇಳಿದೆ ಎಂದು ಅವರು ಉಲ್ಲೇಖಿಸಿದ್ದಾರೆ.

ಕಳೆದ ವಾರ, ಕೊಳಕು ಸೀಟುಗಳು ಮತ್ತು ಅಸಮರ್ಪಕ ಕ್ಯಾಬಿನ್ ಪ್ಯಾನೆಲ್‌ಗಳು ಎಂಬ ಪ್ರಯಾಣಿಕರ ದೂರಿನ ಮೇರೆಗೆ ಡಿಜಿಸಿಎ ಸ್ಪೈಸ್ ಜೆಟ್ ವಿಮಾನ ಹಾರಾಟವನ್ನು ಸ್ಥಗಿತಗೊಳಿಸಿತು. ಎಲ್ಲಾ ರಿಪೇರಿಗಳನ್ನು ಮಾಡಿದ ಒಂದು ದಿನದ ನಂತರ ಸ್ಪೈಸ್ ಜೆಟ್ ವಿಮಾನವು ಕಾರ್ಯಾರಂಭ ಮಾಡಿತು.

ಕಳೆದ ವರ್ಷ ಅಕ್ಟೋಬರ್ 8 ರಂದು ಏರ್‌ಲೈನ್‌ನ ಬಿಡ್ ಅನ್ನು ಯಶಸ್ವಿಯಾಗಿ ಗೆದ್ದ ನಂತರ ಟಾಟಾ ಗ್ರೂಪ್ ಜನವರಿ 27 ರಂದು ಏರ್ ಇಂಡಿಯಾವನ್ನು ನಿಯಂತ್ರಣಕ್ಕೆ ತೆಗೆದುಕೊಂಡು ಕಾರ್ಯನಿರ್ವಹಿಸುತ್ತಿದೆ.