ವಿಶ್ವದಲ್ಲಿ ಕಾಡ್ಗಿಚ್ಚಿನಂತೆ ಹರಡುತ್ತಿರುವ ಓಮಿಕ್ರಾನ್ ಪ್ರಕರಣಗಳು ಮುಂದಿನ ದಿನಗಳಲ್ಲಿ ಹೊಸದಾದ ಹಾಗೂ ಇನ್ನಷ್ಟು ಅಪಾಯಕಾರಿ ರೂಪಾಂತರಿಗಳು ಸೃಷ್ಟಿಯಾಗಲು ಕಾರಣವಾಗಬಹುದು ಎಂದು ವಿಶ್ವ ಆರೋಗ್ಯ ಸಂಸ್ಥೆ ಕಳವಳ ವ್ಯಕ್ತಪಡಿಸಿದೆ.
ಹೊಸ ಓಮಿಕ್ರಾನ್ ರೂಪಾಂತರಿಯು ಪ್ರಪಂಚದಾದ್ಯಂತ ದಿನದಿಂದ ದಿನಕ್ಕೆ ಮಿತಿಮೀರುತ್ತಿದೆ ಎಂದು ವಿಶ್ವ ಆರೋಗ್ಯ ಸಂಸ್ಥೆಯ ಹಿರಿಯ ಎಮರ್ಜೆನ್ಸಿ ಆಫೀಸರ್ ಕ್ಯಾಥರೀನ್ ಸ್ಮಾಲ್ವುಡ್ ಹೇಳಿದರು.
ಓಮಿಕ್ರಾನ್ ದಿನದಿಂದ ದಿನಕ್ಕೆ ಗಂಭೀರ ಪ್ರಮಾಣದಲ್ಲಿ ಹರಡುತ್ತಿದೆ. ಇಂತಹ ಸಂದರ್ಭದಲ್ಲಿ ಕೊರೊನಾದ ಇನ್ನಷ್ಟು ತಳಿಗಳು ಸೃಷ್ಟಿಯಾಗುವ ಸಾಧ್ಯತೆಗಳು ದಟ್ಟವಾಗಿರುತ್ತದೆ. ಓಮಿಕ್ರಾನ್ ಮಾರಣಾಂತಿಕ ಅಥವಾ ಸಂಭಾವ್ಯ ಮಾರಣಾಂತಿಕವಾಗಿದೆ. ಬಹುಶಃ ಇದು ಡೆಲ್ಟಾಗಿಂತ ಕಡಿಮೆ ಮಾರಣಾಂತಿಕ ಇರಬಹುದು ಎಂದು ಸಂದರ್ಶನವೊಂದರಲ್ಲಿ ಸ್ಮಾಲ್ವುಡ್ ಹೇಳಿದರು.
ಓಮಿಕ್ರಾನ್ ಕಡಿಮೆ ಪ್ರಮಾಣದ ಗಂಭೀರತೆ ಹೊಂದಿರುವುದರಿಂದ ವಿಜ್ಞಾನಿಗಳು ಈ ಓಮಿಕ್ರಾನ್ ರೂಪಾಂತರಿಯು ಸಾಂಕ್ರಾಮಿಕ ವೈರಸ್ನ ತೀವ್ರತೆಯನ್ನು ಕಡಿಮೆ ಮಾಡಬಹುದು. ರೋಗವು ನಿವಾರಣೆಗೊಂಡ ಬಳಿಕ ಜನ ಜೀವನ ಸಾಮಾನ್ಯ ಸ್ಥಿತಿಗೆ ಮರಳಬಹುದು ಎಂಬ ಭರವಸೆಯನ್ನು ಹೊಂದಿದ್ದಾರೆ.
ಆದರೆ ಕೊರೊನಾ ಆರಂಭವಾದಾಗಿನಿಂದ ಯುರೋಪ್ನಲ್ಲಿ 100 ದಶಲಕ್ಷಕ್ಕೂ ಅಧಿಕ ಪ್ರಕರಣಗಳು ವರದಿಯಾಗಿವೆ. ಆದರೆ 2021ರ ಕೊನೆಯ ವಾರವೊಂದರಲ್ಲಿಯೇ 5 ದಶಲಕ್ಷಕ್ಕೂ ಅಧಿಕ ಮಂದಿ ಸೋಂಕಿಗೆ ಒಳಗಾಗಿದ್ದಾರೆ ಎಂದು ಸ್ಮಾಲ್ವುಡ್ ಹೇಳಿದರು.
ಪ್ರಸ್ತುತ ನಾವು ಅತ್ಯಂತ ಅಪಾಯಕಾರಿ ಹಂತದಲ್ಲಿದ್ದೇವೆ. ಪಶ್ಚಿಮ ಯುರೋಪ್ನಲ್ಲಂತೂ ಸೋಂಕಿನ ಪ್ರಮಾಣದಲ್ಲಿ ಗಣನೀಯ ಪ್ರಮಾಣದಲ್ಲಿ ಏರಿಕೆ ಕಂಡುಬರುತ್ತಿದೆ. ಹೀಗಾಗಿ ಓಮಿಕ್ರಾನ್ ರೂಪಾಂತರಿಯ ಸಂಪೂರ್ಣ ಪರಿಣಾಮವು ಇನ್ನೂ ಸ್ಪಷ್ಟವಾಗಿಲ್ಲ. ಫ್ರಾನ್ಸ್ನಲ್ಲಿ ಇದೀಗ ಹೊಸ ಕೋವಿಡ್ ರೂಪಾಂತರಿಯೊಂದು ಪತ್ತೆಯಾಗಿದೆ. ಇದಕ್ಕೆ ಐಹೆಚ್ಯು ಎಂದು ತಾತ್ಕಾಲಿಕವಾಗಿ ಹೆಸರಿಡಲಾಗಿದೆ. ಇದೆಲ್ಲವೂ ನಮಗೆ ಎಚ್ಚರಿಕೆಯ ಕರೆಘಂಟೆಯಾಗಿದೆ ಎಂದು ಸ್ಮಾಲ್ವುಡ್ ಹೇಳಿದರು.