ಸಿಡಿಎಸ್ ಜನರಲ್​ ಬಿಪಿನ್​ ರಾವತ್​ ಹಾಗೂ ಮಧುಲಿಕಾ ರಾವತ್​​ ಕುಟುಂಬಸ್ಥರ ಬಗ್ಗೆ ಇಲ್ಲಿದೆ ಮಾಹಿತಿ

ಭಾರತೀಯ ಸೇನೆಯ ಹೆಲಿಕಾಪ್ಟರ್​ ದುರಂತದಲ್ಲಿ ಸೇನಾಪಡೆಗಳ ಮುಖ್ಯಸ್ಥ ಬಿಪಿನ್​ ರಾವತ್​ ದುರ್ಮರಣಕ್ಕೀಡಾಗಿದ್ದಾರೆ. ಪತ್ನಿ ಮಧುಲಿಕಾ ರಾವತ್​ ಸೇರಿದಂತೆ 13 ಮಂದಿಯೊಂದಿಗೆ ಬಿಪಿನ್​ ರಾವತ್​​ ಸೇನಾ ಹೆಲಿಕಾಪ್ಟರ್​ನಲ್ಲಿ ಪ್ರಯಾಣಿಸುತ್ತಿದ್ದರು.

ಹೆಲಿಕಾಪ್ಟರ್​ನಲ್ಲಿದ್ದ 14 ಮಂದಿಯಲ್ಲಿ 13 ಮಂದಿ ಸಾವನ್ನಪ್ಪಿದ್ದಾರೆ. ಡಿಎನ್​ಎ ಪರೀಕ್ಷೆಯ ಮೂಲಕ ಮೃತದೇಹಗಳನ್ನು ಪತ್ತೆ ಹಚ್ಚಲಾಗಿದೆ. ದುರಂತ ಸಂಭವಿಸುತ್ತಿದ್ದಂತೆಯೇ ಬಿಪಿನ್​ ರಾವತ್​​ರನ್ನು ಆಸ್ಪತ್ರೆಗೆ ದಾಖಲಿಸಲಾಗಿತ್ತಾದರೂ ಚಿಕಿತ್ಸೆ ಫಲಕಾರಿಯಾಗದೇ ಆಸ್ಪತ್ರೆಯಲ್ಲಿಯೇ ಸಾವನ್ನಪ್ಪಿದ್ದಾರೆ.

ಜನರಲ್​ ಬಿಪಿನ್​ ರಾವತ್​​ ದೇಶದ ಮೊದಲ ಸೇನಾಪಡೆಗಳ ಮುಖ್ಯಸ್ಥರಾಗಿದ್ದಾರೆ. 2020ರ ಜನವರಿ 1ರಂದು ಬಿಪಿನ್​ ಈ ಹುದ್ದೆಗೆ ನೇಮಕಗೊಂಡಿದ್ದರು.

ಉತ್ತರಾಖಂಡ್​ನ ಪೌರಿ ಎಂಬಲ್ಲಿ ಜನಿಸಿದ ಜನರಲ್​ ಬಿಪಿನ್​ ರಾವತ್​ ಕುಟುಂಬ ಬರೋಬ್ಬರಿ 4 ದಶಕಗಳ ಕಾಲ ಭಾರತೀಯ ಸೇನೆಯಲ್ಲಿ ಸೇವೆ ಸಲ್ಲಿಸಿದ್ದಾರೆ. ಈ ದೀರ್ಘ ವರ್ಷದ ಸೇನಾ ಪಯಣದಲ್ಲಿ ಬಿಪಿನ್​ ಪತ್ನಿ ಮಧುಲಿಕಾ ರಾವತ್​​ ಪತಿಗೆ ಬೆನ್ನೆಲುಬಾಗಿ ನಿಂತಿದ್ದಾರೆ.

ಮೃತ ಮಧುಲಿಕಾ ರಾವತ್​ ಆರ್ಮಿ ವೈವ್ಸ್​​ ವೆಲ್​ಫೇರ್​​ ಅಸೋಸಿಯೇಷನ್​​ ಮುಖ್ಯಸ್ಥರಾಗಿದ್ದರು.

ಮಧುಲಿಕಾ ರಾವತ್​ ಸೇನಾ ಸಿಬ್ಬಂದಿಯ ಮಕ್ಕಳು ಹಾಗೂ ಪತ್ನಿಯಂದಿರ ಕಲ್ಯಾಣಕ್ಕಾಗಿ ಶ್ರಮಿಸಿದ್ದಾರೆ.

ದೆಹಲಿ ವಿಶ್ವವಿದ್ಯಾಲಯದಲ್ಲಿ ಮನಃಶಾಸ್ತ್ರಜ್ಞ ವಿಭಾಗದಲ್ಲಿ ಪದವಿ ಪಡೆದಿದ್ದಾರೆ. ಸಾಕಷ್ಟು ಸಾಮಾಜಿಕ ಅಭಿಯಾನಗಳ ಮೂಲಕ ಮಧುಲಿಕಾ ಹುತಾತ್ಮ ಯೋಧರ ಪತ್ನಿಯಂದಿರು, ಕ್ಯಾನ್ಸರ್​​ ರೋಗಿಗಳು, ದಿವ್ಯಾಂಗ ಮಕ್ಕಳ ಕಲ್ಯಾಣಕ್ಕಾಗಿ ಶ್ರಮಿಸಿದ್ದಾರೆ.

ಜನರಲ್​ ಬಿಪಿನ್​ ರಾವತ್​ ಹಾಗೂ ಮಧುಲಿಕಾ ರಾವತ್​​ ಕೃತಿಕಾ ರಾವತ್​ ಸೇರಿದಂತೆ ಮತ್ತೊಬ್ಬ ಪುತ್ರಿಯನ್ನು ಅಗಲಿದ್ದಾರೆ.

ಬಿಪಿನ್​ ರಾವತ್​ ತಂದೆ ಲಕ್ಷ್ಮಣ ಸಿಂಗ್​ ರಾವತ್​​ ಲೆಫ್ಟಿನಂಟ್​ ಜನರಲ್​ ಆಗಿ ಭಾರತೀಯ ಸೇನೆಗೆ ಸೇವೆ ಸಲ್ಲಿಸಿದ್ದರು. ಬಿಪಿನ್​ ರಾವತ್​ ತಾಯಿ ಕಿಶನ್​​ ಸಿಂಗ್​ ಪಾರ್ಮರ್​​ ಉತ್ತರಾಕಾಶಿಯ ಮಾಜಿ ಶಾಸಕನ ಪುತ್ರಿಯಾಗಿದ್ದಾರೆ.