ʼಕೋವ್ಯಾಕ್ಸಿನ್ʼ ಲಸಿಕೆ ಪಡೆದವರು ಯಾವೆಲ್ಲಾ ದೇಶಗಳಿಗೆ ಹೋಗಬಹುದು ಗೊತ್ತಾ..? ಇಲ್ಲಿದೆ ಈ ಕುರಿತ ಮಾಹಿತಿ

ಕೋವಿಡ್​​​ 19 ವಿರುದ್ಧ ಹೋರಾಟಕ್ಕಾಗಿ ಸ್ವದೇಶದಲ್ಲೇ ನಿರ್ಮಾಣಗೊಂಡ ಕೋವ್ಯಾಕ್ಸಿನ್ ಲಸಿಕೆಯು ಸಾಂಕ್ರಾಮಿಕದ ವಿರುದ್ಧದ ಹೋರಾಟದಲ್ಲಿ ದೇಶದ ಪಾಲಿಗೆ ಬಹುದೊಡ್ಡ ಅಸ್ತ್ರವಾಗಿ ಮಾರ್ಪಟ್ಟಿದೆ. ವಿಶ್ವ ಆರೋಗ್ಯ ಸಂಸ್ಥೆ ಈ ಲಸಿಕೆಯ ಜಾಗತಿಕ ಬಳಕೆಗೆ ಇನ್ನಷ್ಟೇ ಅನುಮೋದನೆ ನೀಡಬೇಕಿದೆ. ಅಲ್ಲದೇ ಈ ಸಂಬಂಧ ಹೈದರಾಬಾದ್​ ಮೂಲದ ಭಾರತ್​ ಬಯೋಟೆಕ್​ ಕಂಪನಿ ಬಳಿ ಹೆಚ್ಚಿನ ಸ್ಪಷ್ಟನೆಯನ್ನು ನವೆಂಬರ್​ 3ರ ಒಳಗಾಗಿ ನೀಡುವಂತೆ ಸೂಚನೆ ನೀಡಿದೆ.

ವಿಶ್ವ ಆರೋಗ್ಯ ಸಂಸ್ಥೆ ಜಾಗತಿಕ ಅನುಮೋದನೆಯನ್ನು ಬಾಕಿ ಇರಿಸಿರುವ ಕಾರಣ ಯುರೋಪಿಯನ್​ ಒಕ್ಕೂಟ ಹಾಗೂ ಅಮೆರಿಕ, ಭಾರತದಲ್ಲಿ ಕೋವ್ಯಾಕ್ಸಿನ್​​ ಸ್ವೀಕರಿಸಿದವರಿಗೆ ತಮ್ಮ ದೇಶಕ್ಕೆ ಪ್ರವೇಶ ನೀಡಲು ತಯಾರಿಲ್ಲ. ಹಾಗಾದರೆ ಯಾವೆಲ್ಲ ದೇಶಗಳು ಕೋವ್ಯಾಕ್ಸಿನ್​ ಪಡೆದವರ ಆಗಮನಕ್ಕೆ ಅನುಮತಿ ನೀಡಿದೆ ಅನ್ನೋದರ ವಿವರ ಇಲ್ಲಿದೆ ನೋಡಿ.

ಓಮನ್​ : ಭಾರತೀಯ ರಾಯಭಾರಿ ಕಚೇರಿ ನೀಡಿರುವ ಮಾಹಿತಿಯ ಪ್ರಕಾರ ಓಮನ್​ ರಾಷ್ಟ್ರವು ಕೋವ್ಯಾಕ್ಸಿನ್​​ಗೆ ಅನುಮೋದನೆ ನೀಡಿದೆ. ಆದ್ದರಿಂದ ಭಾರತದಿಂದ ಕೋವ್ಯಾಕ್ಸಿನ್​ ಪಡೆದು ತೆರಳಿದವರು ಕ್ವಾರಂಟೈನ್​ಗೆ ಒಳಗಾಗಬೇಕಾದ ಅವಶ್ಯಕತೆ ಇರೋದಿಲ್ಲ.

ಇರಾನ್​ : ಇರಾನ್​ ಕೂಡ ಕೋವ್ಯಾಕ್ಸಿನ್​ ಪಡೆದ ಜನತೆಗೆ ದೇಶಕ್ಕೆ ಎಂಟ್ರಿ ನೀಡುತ್ತಿದೆ. ಕೊರೊನಾ ನೆಗೆಟಿವ್​ ವರದಿ ಪ್ರಸ್ತುತ ಪಡಿಸಿದರೆ ಕ್ವಾರಂಟೈನ್​ಗೆ ಒಳಗಾಗುವ ಅವಶ್ಯಕತೆ ಇರೋದಿಲ್ಲ. ಇಲ್ಲವಾದಲ್ಲಿ 14 ದಿನಗಳ ಕ್ವಾರಂಟೈನ್​ ಕಡ್ಡಾಯವಾಗಿರಲಿದೆ.

ಫಿಲಿಪೈನ್ಸ್​ : ಫಿಲಿಪೈನ್ಸ್​ ಕೂಡ ಕೋವ್ಯಾಕ್ಸಿನ್ ಲಸಿಕೆಗಳ ತುರ್ತು ಬಳಕೆಗೆ ಅನುಮೋದನೆ ನೀಡಿದೆ. ಮೊದಲ ಡೋಸ್​ನಿಂದ ಎರಡನೇ ಡೋಸ್​ 14 ದಿನಗಳ ಅಂತರವನ್ನು ನಿಗದಿಪಡಿಸಲಾಗಿದೆ.

ಮಾರಿಷಸ್​ : ಎರಡನೇ ಕೊವ್ಯಾಕ್ಸಿನ್​ ಡೋಸ್​ ಪಡೆದು 14 ದಿನಗಳನ್ನು ಪೂರೈಸಿದವರು ಮಾರಿಷಸ್​ಗೆ ಎಂಟ್ರಿ ಕೊಡಬಹುದಾಗಿದೆ. ಆದರೆ ಜಾನ್ಸನ್​ & ಜಾನ್ಸನ್​ ಸಿಂಗಲ್​ ಡೋಸ್​ ಪಡೆಯುವವರು 28 ದಿನಗಳ ಬಳಿಕ ಮಾರಿಷಸ್​ಗೆ ಎಂಟ್ರಿ ನೀಡಬಹುದು. ಅಲ್ಲದೇ ಕೊರೊನಾ ನೆಗೆಟಿವ್ ವರದಿ ಕೂಡ ಕಡ್ಡಾಯವಾಗಿದೆ.

ಮೆಕ್ಸಿಕೋ : ಭಾರತದ ಕೋವ್ಯಾಕ್ಸಿನ್​ ಲಸಿಕೆಗಳಿಗೆ ಮೆಕ್ಸಿಕೋದಲ್ಲಿ ತುರ್ತು ಅನುಮೋದನೆ ನೀಡಲಾಗಿದೆ. ಹೀಗಾಗಿ ಕೋವ್ಯಾಕ್ಸಿನ್​ ಲಸಿಕೆ ಪಡೆದವರಿಗೆ ಕಡ್ಡಾಯ ಕ್ವಾರಂಟೈನ್​​ಗೆ ಒಳಗಾಗುವ ಅವಶ್ಯಕತೆ ಇರೋದಿಲ್ಲ. ಆದರೆ ಕೋವಿಡ್​ ಲಕ್ಷಣಗಳನ್ನು ಹೊಂದಿದ್ದಲ್ಲಿ ಮಾತ್ರ ಕ್ವಾರಂಟೈನ್​ ಅನಿವಾರ್ಯವಾಗಿರಲಿದೆ.

ನೇಪಾಳ : ಕೋವ್ಯಾಕ್ಸಿನ್​ ಲಸಿಕೆ ಪಡೆದ ಭಾರತೀಯರು ನೇಪಾಳಕ್ಕೆ ಪ್ರಯಾಣ ಬೆಳೆಸಬಹುದು. ಆದರೆ ಎರಡನೇ ಡೋಸ್​ ಪಡೆದು 14 ದಿನಗಳ ಅವಧಿಯನ್ನು ಪೂರೈಸುವುದು ಮಾತ್ರ ಕಡ್ಡಾಯವಾಗಿರಲಿದೆ. ಹಾಗೂ ಕೋವಿಡ್​ ನೆಗೆಟಿವ್​ ವರದಿ ಹೊಂದಿರುವುದು ಅನಿವಾರ್ಯವಾಗಿದೆ.

ಜಿಂಬಾಬ್ವೆ : ಜಿಂಬಾಬ್ವೆ ಕೂಡ ಭಾರತ ನಿರ್ಮಿತ ಕೋವ್ಯಾಕ್ಸಿನ್​ ಲಸಿಕೆಗೆ ಅನುಮೋದನೆ ನೀಡಿದೆ. ಕೊರೊನಾ ನೆಗೆಟಿವ್​ ವರದಿ ಸಮೇತ ಜಿಂಬಾಬ್ವೆಗೆ ಪ್ರಯಾಣ ಬೆಳೆಸುವವರು 10 ದಿನಗಳ ಕ್ವಾರಂಟೈನ್​​ಗೆ ಒಳಗಾಗುವುದು ಅನಿವಾರ್ಯವಾಗಲಿದೆ. ನೆಗೆಟಿವ್​ ವರದಿಯನ್ನು ಹೊಂದಿಲ್ಲದವರಿಗೆ ಜಿಂಬಾಬ್ವೆ ಎಂಟ್ರಿಗೆ ನಿರ್ಬಂಧ ಇರಲಿದೆ.