Big News: ಓಲಾದಿಂದ ಒಂದೇ ದಿನ 600 ಕೋಟಿ ರೂ. ಮೌಲ್ಯದ S1 ಸ್ಕೂಟರ್ ಮಾರಾಟ…!

ಒಂದೇ ದಿನದಲ್ಲಿ 600 ಕೋಟಿ ರೂಪಾಯಿಗೂ ಅಧಿಕ ಮೌಲ್ಯದ ಓಲಾ ಎಸ್​ 1 ಸ್ಕೂಟರ್​ಗಳನ್ನು ಮಾರಾಟ ಮಾಡಿರುವುದಾಗಿ ಓಲಾ ಎಲೆಕ್ಟ್ರಿಕ್​ ಘೋಷಣೆ ಮಾಡಿದೆ.

ಈಗಾಗಲೇ ಸ್ಕೂಟರ್​ಗಾಗಿ ಬುಕ್ಕಿಂಗ್​ ಮಾಡಿದವರಿಗೆ ಕಂಪನಿಯು ಬುಧವಾರದಿಂದ ಮಾರಾಟ ಆರಂಭಿಸಿದೆ.

ಮೊದಲ 24 ಗಂಟೆಗಳ ಅವಧಿಯಲ್ಲಿ ಪ್ರತಿ ಸೆಕೆಂಡ್​ಗೆ 4 ಸ್ಕೂಟರ್​ಗಳನ್ನು ಮಾರಾಟ ಮಾಡಿರುವುದಾಗಿ ಓಲಾ ಎಲೆಕ್ಟ್ರಿಕ್​ ಹೇಳಿಕೊಂಡಿದೆ. ಈ ಸಂಬಂಧ ಟ್ವೀಟ್​ ಮೂಲಕ ಸಂತಸ ವ್ಯಕ್ತಪಡಿಸಿರುವ ಓಲಾ ಸಿಇಓ ಭವೀಶ್ ಅರ್ಗವಾಲ್​, ಭಾರತವು ಪೆಟ್ರೋಲ್​ನ್ನು ತಿರಸ್ಕರಿಸಿದೆ ಹಾಗೂ ಎಲೆಕ್ಟ್ರಿಕ್​ ವಾಹನಗಳತ್ತ ಮುಖ ಮಾಡುತ್ತಿದೆ. ಪ್ರತಿ ಸೆಕೆಂಡ್​ಗೆ 4 ಸ್ಕೂಟರ್​ಗಳನ್ನು ಮಾರಾಟ ಮಾಡುವ ಮೂಲಕ ನಾವು ಒಂದು ದಿನದಲ್ಲಿ 600 ಕೋಟಿಗೂ ಅಧಿಕ ಹಣ ಸಂಪಾದಿಸಿದ್ದೇವೆ. ಇಂದು ಕೊನೆಯ ದಿನವಾಗಿದ್ದು ಮಧ್ಯರಾತ್ರಿಗೆ ಖರೀದಿ ಪ್ರಕ್ರಿಯೆ ಅಂತ್ಯಗೊಳ್ಳಲಿದೆ ಎಂದು ಟ್ವೀಟಾಯಿಸಿದ್ದಾರೆ.

ಗ್ರಾಹಕರಿಗೆ ತಮ್ಮ ಓಲಾ ಎಸ್​1 ಹಾಗೂ ಎಸ್​ 1ಪ್ರೋ ಸ್ಕೂಟರ್​ ಖರೀದಿ ಮಾಡಲು ಇಂದು ಕೊನೆಯ ದಿನವಾಗಿದೆ. ಓಲಾ ಅಪ್ಲಿಕೇಶನ್​​ನಲ್ಲಿ ಮಾತ್ರ ಖರೀದಿ ಲಭ್ಯವಿದೆ. ಓಲಾ ಎಸ್​ 1 ಸ್ಕೂಟರ್​​ಗೆ 2999 ರೂಪಾಯಿಗೆ ಇಎಂಐ ಆರಂಭವಾಗಲಿದೆ. ಓಲಾ ಎಸ್​ 1 ಪ್ರೋಗೆ ಇಎಂಐ 3199 ರೂಪಾಯಿಯಿಂದ ಆರಂಭವಾಗಲಿದೆ.