ಮೆಗಾಸ್ಟಾರ್​ ಚಿರಂಜೀವಿ ಸೋದರಳಿಯ , ನಟ ಸಾಯಿ ಧರಂ ತೇಜ್​​ಗೆ ರಸ್ತೆ ಅಪಘಾತ

ಹೈದರಾಬಾದ್​ನಲ್ಲಿ ಬೈಕ್​ನಲ್ಲಿ ತೆರಳುತ್ತಿದ್ದ ವೇಳೆ ತೆಲುಗು ನಟ ಸಾಯಿ ಧರಂ ತೇಜ್​ ಅಪಘಾತಕ್ಕೀಡಾಗಿದ್ದಾರೆ. ಬೈಕ್​ ನಿಯಂತ್ರಣ ತಪ್ಪಿ ಅವರು ಬಿದ್ದಿದ್ದಾರೆ ಎನ್ನಲಾಗಿದೆ.

ಪೊಲೀಸರು ನೀಡಿರುವ ಮಾಹಿತಿಯ ಪ್ರಕಾರ ಸಾಯಿ ಧರಂ ತೇಜ್​ ಸ್ಪೋರ್ಟ್ಸ್​ ಬೈಕ್​ನಲ್ಲಿ ತೆರಳುತ್ತಿದ್ದರು. ಆದರೆ ಕೇಬಲ್​ ಬ್ರಿಡ್ಜ್​ನ ಬಳಿಯಲ್ಲಿ ಬೈಕ್​ ಸ್ಕಿಡ್​ ಆಗಿದೆ. ಅಪಘಾತದಿಂದಾಗಿ ಸಾಯಿ ಧರಂಗೆ ಏಟಾಗಿದ್ದು ಅವರನ್ನು ಆಂಬುಲೆನ್ಸ್​ ಮೂಲಕ ಮೆಡಿಕವರ್​ ಆಸ್ಪತ್ರೆಗೆ ದಾಖಲು ಮಾಡಲಾಗಿತ್ತು. ಸಾಯಿ ಧರಂ ಪ್ರಜ್ಞಾಹೀನ ಸ್ಥಿತಿಯಲ್ಲಿ ಇದ್ದ ಹಿನ್ನೆಲೆಯಲ್ಲಿ ಅವರನ್ನು ಕೂಡಲೇ ಅಪೋಲೋ ಆಸ್ಪತ್ರೆಗೆ ದಾಖಲು ಮಾಡಲಾಗಿದೆ. ಸದ್ಯಕ್ಕೆ ಸಾಯಿ ಧರಂ ಪ್ರಾಣಾಪಾಯದಿಂದ ಪಾರಾಗಿದ್ದಾರೆ ಎಂದು ತಿಳಿದುಬಂದಿದೆ.

ಸಾಯಿ ಧರಂ ಸ್ಕಿಡ್​ ಆಗುತ್ತಿದ್ದಂತೆಯೇ ಬೈಕ್​ ಮೇಲಿನ ನಿಯಂತ್ರಣ ಕಳೆದುಕೊಂಡಿದ್ದಾರೆ. ಹೀಗಾಗಿ ಈ ಅಪಘಾತ ಸಂಭವಿಸಿದೆ ಎಂದು ಮಾಧಾಪುರ ಠಾಣೆಯ ಪೊಲೀಸ್​ ಅಧಿಕಾರಿ ಮಾಹಿತಿ ನೀಡಿದ್ದಾರೆ.

ಅಂದಹಾಗೆ ಸಾಯಿತೇಜ್​ ಮೆಗಾಸ್ಟಾರ್​ ಚಿರಂಜೀವಿಯ ಸೋದರಳಿಯ ಆಗಿದ್ದಾರೆ. ಸಾಯಿತೇಜ್​ ಬೈಕ್​ಗಳ ಮೇಲೆ ಅತಿಯಾದ ಕ್ರೇಜ್​​ ಹೊಂದಿದ್ದಾರೆ. ಶೂಟಿಂಗ್​ನಿಂದ ಬಿಡುವು ಸಿಕ್ಕಾಗಲೆಲ್ಲ ಸಾಯಿ ತೇಜ್​ ಬೈಕ್​ ರೈಡ್​ ಮಾಡುತ್ತಾರೆ .
ಸಾಯಿತೇಜ್​ ಅಪಘಾತದ ಸುದ್ದಿ ವೈರಲ್​ ಆಗುತ್ತಿದ್ದಂತೆಯೇ ನಟನ ಶೀಘ್ರ ಚೇತರಿಕೆಗೆ ಕೋರಿ ಹಾರೈಕೆಗಳ ಸುರಿಮಳೆಯೇ ಹರಿದುಬರ್ತಿದೆ.

ಮೆಗಾ ಸ್ಟಾರ್​ ಚಿರಂಜೀವಿ ಹಾಗೂ ಕುಟುಂಬಸ್ಥರು, ನಿರ್ಮಾಪಕ ಅಲ್ಲು ಅರವಿಂದ್​, ನಟ ಹಾಗೂ ರಾಜಕಾರಣಿ ಪವನ್ ಕಲ್ಯಾಣ್​, ನಟ ವೈಷ್ಣವ್​ ತೇಜ್​, ನಿಹಾರಿಕಾ, ನಟ ಸಂದೀಪ್​ ಕಿಶನ್​ ವಿಷಯ ತಿಳಿಯುತ್ತಿದ್ದಂತೆಯೇ ಅಪೋಲೋ ಆಸ್ಪತ್ರೆಗೆ ಧಾವಿಸಿದ್ದಾರೆ.

ಸಾಯಿತೇಜ್​ ಪ್ರಾಣಾಪಾಯದಿಂದ ಪಾರಾಗಿದ್ದು ಚಿಕಿತ್ಸೆಗೆ ಸ್ಪಂದಿಸುತ್ತಿದ್ದಾರೆ ಎಂದು ಅಪೊಲೋ ಆಸ್ಪತ್ರೆ ಮಾಹಿತಿ ನೀಡಿದೆ.