ಬೆಕ್ಕುಗಳನ್ನು ಸಾಕಲು ಈ ವ್ಯಕ್ತಿ ಖರ್ಚು ಮಾಡುವ ಹಣದ ಮೊತ್ತ ಕೇಳಿದ್ರೆ ಶಾಕ್​ ಆಗ್ತೀರಾ….!

ಬೆಕ್ಕು ಪ್ರಿಯರಿಗೆ ನಮ್ಮಲ್ಲೇನು ಬರಗಾಲವಿಲ್ಲ. ಆದರೆ ಗುಜರಾತ್​ ಕಚ್​ನಲ್ಲಿರುವ ಈ ಮಾರ್ಜಾಲ ಪ್ರಿಯ ಮಾತ್ರ ಮಿಕ್ಕೆಲ್ಲರಿಗಿಂತ ಡಿಫರೆಂಟ್​. ಇವರು ತಾವು ಸಾಕಿರುವ ಬೆಕ್ಕುಗಳಿಗೆಂದೇ ‘ಕ್ಯಾಟ್ ಗಾರ್ಡನ್​’ ಎಂಬ ಹೆಸರಿನ ಮನೆಯನ್ನೇ ನಿರ್ಮಿಸಿದ್ದಾರೆ.

ಕಚ್​​ನ ಗಾಂಧಿಧಾಮ ನಗರದ ನಿವಾಸಿಯಾದ ಉಪೇಂದ್ರ ಗೋಸ್ವಾಮಿ ಎಂಬವರು 500 ಚದರ ಗಜದ ಮನೆಯನ್ನು ಬೆಕ್ಕುಗಳಿಗೆಂದೇ ಮೀಸಲಿಟ್ಟಿದ್ದಾರೆ. 2017ರಲ್ಲಿ ನಿರ್ಮಾಣವಾದ ಕ್ಯಾಟ್​ ಗಾರ್ಡನ್​ನಲ್ಲಿ ಪ್ರಸ್ತುತ 200 ಬೆಕ್ಕುಗಳು ಆಶ್ರಯ ಪಡೆದಿವೆ. 1994ರಲ್ಲಿ ನಿಧನರಾದ ತಮ್ಮ ಸಹೋದರಿಯ ಸವಿನೆನಪಿಗೆಂದು ಉಪೇಂದ್ರ ಈ ಬೆಕ್ಕಿನ ಮನೆಯನ್ನು ನಿರ್ಮಾಣ ಮಾಡಿದ್ದಾರಂತೆ.

ಬೆಕ್ಕಿನ ಮನೆ ನಿರ್ಮಾಣದ ಬಗ್ಗೆ ಮಾತನಾಡಿದ ಉಪೇಂದ್ರ, ನನ್ನ ಸಹೋದರಿ ನಿಧನರಾದ ಬಳಿಕವೂ ನಾವು ಆಕೆಯ ಜನ್ಮದಿನವನ್ನು ಆಚರಿಸುತ್ತಿದ್ದೆವು. ಒಂದು ದಿನ ಮನೆಗೆ ಬಂದ ಬೆಕ್ಕು ಬರ್ತಡೆ ಕೇಕ್​ನ್ನು ತಿಂದಿತ್ತು. ಇದಾದ ಬಳಿಕ ಆ ಬೆಕ್ಕು ನಮ್ಮೊಟ್ಟಿಗೆ ಇರಲು ಆರಂಭಿಸಿತು. ಹೀಗಾಗಿ ನಾವು ಆಕೆ ನಮ್ಮ ಜೊತೆ ಬೆಕ್ಕಿನ ರೀತಿಯಲ್ಲೇ ವಾಸವಿದ್ದಾಳೆ ಎಂದು ನಂಬಿದ್ದೇವೆ ಎಂದು ಹೇಳಿದ್ರು.

ಈ ಬೆಕ್ಕಿನ ಮನೆಯಲ್ಲಿ 4 ಎಸಿ ಕೋಣೆಯಿದೆ ಹಾಗೂ 12 ಹಾಸಿಗೆಗಳಿವೆ. ಇಲ್ಲಿ ಸ್ನಾನಗೃಹ ಹಾಗೂ ಸಣ್ಣ ಥಿಯೇಟರ್​ ಕೂಡ ಇದೆ. ಈ ಥಿಯೇಟರ್​ನಲ್ಲಿ ಸಂಜೆ ವೇಳೆ ಬೆಕ್ಕುಗಳು ಪ್ರಾಣಿಗೆ ಸಂಬಂಧಿಸಿದ ವಿಡಿಯೋವನ್ನು ನೋಡುತ್ತವೆ. ಬೆಕ್ಕುಗಳಿಗೆ ಮೂರು ಬಾರಿ ತಿನ್ನಲು ನೀಡುತ್ತೇವೆ. ಈ ಬೆಕ್ಕುಗಳಿಗೆಂದೇ ಪ್ರತಿ ತಿಂಗಳು 1.5 ಲಕ್ಷ ರೂಪಾಯಿಗಳನ್ನು ಖರ್ಚು ಮಾಡುತ್ತೇನೆ ಎಂದು ಹೇಳಿದ್ರು.

ಉಪೇಂದ್ರ ಬೆಕ್ಕುಗಳನ್ನು ತಮ್ಮ ಕುಟುಂಬದ ಅವಿಭಾಜ್ಯ ಅಂಗ ಎಂದೇ ಭಾವಿಸಿದ್ದಾರೆ. ಬೆಕ್ಕುಗಳಿಗೆ ನಿಯಮಿತವಾಗಿ ಆರೋಗ್ಯ ತಪಾಸಣೆ ಮಾಡಿಸಲಾಗುತ್ತದೆ. ಉಪೇಂದ್ರರ ಈ ಮಾನವೀಯ ಕಾರ್ಯಕ್ಕೆ ಅಹಮದಾಬಾದ್​​ನ ಜೀವದಯಾ ಟ್ರಸ್ಟ್​ ಕೂಡ ಸಹಾಯ ಮಾಡುತ್ತಿದೆ.