ಶಬರಿಮಲೆಯಾತ್ರೆ ಸಂಬಂಧ ಮಹತ್ವದ ಆದೇಶ ಪ್ರಕಟಿಸಿದ ಕೇರಳ ಹೈಕೋರ್ಟ್​

ಶಬರಿಮಲೆ ಮಂದಿರದ ವಿಚಾರದಲ್ಲಿ ಕೇರಳ ಹೈಕೋರ್ಟ್ ಮಹತ್ವದ ತೀರ್ಪನ್ನು ಪ್ರಕಟಿಸಿದೆ. ಈ ತೀರ್ಪಿನ ಪ್ರಕಾರ ಶಬರಿಮಲೆಗೆ ತೆರಳುವ ಪುರುಷರು ತಮ್ಮ ಜೊತೆಯಲ್ಲಿ 10 ವರ್ಷದೊಳಗಿನ ಪ್ರಾಯದ ಪುತ್ರಿಯನ್ನು ಕರೆದೊಯ್ಯಬಹುದಾಗಿದೆ.

ಶಬರಿಮಲೆ ದೇಗುಲ ದರ್ಶನ ಸಂಬಂಧ 9 ವರ್ಷದ ಬಾಲಕಿ ಸಲ್ಲಿಸಿದ ಅರ್ಜಿಯನ್ನು ವಿಚಾರಿಸಿದ ಕೇರಳ ಹೈಕೋರ್ಟ್ ಈ ಮಹತ್ವದ ತೀರ್ಪನ್ನು ನೀಡಿದೆ. ಈ ಬಾಲಕಿಯು 23 ಆಗಸ್ಟ್​​​​ರಂದು ತನ್ನ ತಂದೆಯ ಜೊತೆಗೆ ಶಬರಿಮಲೆಗೆ ತೆರಳಲು ಅನುಮತಿ ನೀಡುವಂತೆ ಕೋರಿ ಕೋರ್ಟ್ ಮೆಟ್ಟಿಲೇರಿದ್ದಳು. 10 ವರ್ಷದೊಳಗೆ ತನಗೆ ಶಬರಿಮಲೆ ದರ್ಶನ ಮಾಡಲು ಸಾಧ್ಯವಾಗದೇ ಹೋದಲ್ಲಿ ಇನ್ನೂ 4 ದಶಕಗಳ ಕಾಲ ಕಾಯಬೇಕು ಅನ್ನೋದು ಬಾಲಕಿಯ ವಾದವಾಗಿತ್ತು.

ಈ ಅರ್ಜಿ ವಿಚಾರಣೆ ನಡೆಸಿದ ಬಳಿಕ ಮಾತನಾಡಿದ ಕೋರ್ಟ್, ಅರ್ಜಿದಾರ ಬಾಲಕಿಯು ಆಗಸ್ಟ್​ 23ರಂದು ಶಬರಿಮಲೆ ಯಾತ್ರೆಗೆ ತನ್ನ ತಂದೆಯ ಜೊತೆಗೆ ಹೋಗಬಹುದು ಎಂದು ಹೇಳಿದೆ.

ಈ ಹಿಂದೆ ಕೇರಳ ಹೈಕೋರ್ಟ್​ ಕೊರೊನಾ ಲಸಿಕೆಯನ್ನು ಸ್ವೀಕರಿಸಿದವರು ಮಾತ್ರ ಶಬರಿಮಲೆಯಾತ್ರೆಯನ್ನು ಕೈಗೊಳ್ಳಬಹುದು ಎಂದು ಹೇಳಿತ್ತು. ಹೀಗಾಗಿ 9 ವರ್ಷದ ಬಾಲಕಿ ತನಗೂ ಶಬರಿಮಲೆಗೆ ಅನುಮತಿ ನೀಡುವಂತೆ ಕೋರಿ ಕೋರ್ಟ್ ಮೆಟ್ಟಿಲೇರಿದ್ದಳು. ಇದೀಗ ಲಸಿಕೆ ಪಡೆಯದ ಮಕ್ಕಳು ತಂದೆಯ ಜೊತೆ ಶಬರಿಮಲೆ ಯಾತ್ರೆ ಕೈಗೊಳ್ಳಬಹುದು ಎಂದು ಹೇಳಿದೆ.

ಈ ಶಬರಿಮಲೆ ದೇಗುಲವು ಸರಿ ಸುಮಾರು 800 ವರ್ಷ ಹಿಂದಿನ ಇತಿಹಾಸವನ್ನು ಹೊಂದಿದೆ. ಅಯ್ಯಪ್ಪ ಸ್ವಾಮಿಯು ಬ್ರಹ್ಮಚಾರಿ ಆಗಿರುವ ಕಾರಣ ಈ ದೇಗುಲಕ್ಕೆ ಮಹಿಳೆಯರು ಬರಬಾರದು ಅನ್ನೋದು ದೇವಸ್ಥಾನದ ವಾದವಾಗಿದೆ. 2006ರಲ್ಲಿ ಮುಖ್ಯ ಜ್ಯೋತಿಷಿ ಉನ್ನಿಕೃಷ್ಣನ್​​​, ದೇಗುಲಕ್ಕೆ ಯುವತಿಯ ಪ್ರವೇಶದಿಂದ ಅಯ್ಯಪ್ಪನ ಶಕ್ತಿ ಕಡಿಮೆಯಾಗಿದೆ ಎಂದು ಹೇಳಿಕೆ ನೀಡಿದ್ದರು.

ಸ್ಯಾಂಡಲ್​ವುಡ್​ ಹಿರಿಯ ನಟಿ ಜಯಮಾಲಾ ತಾವು ಅಯ್ಯಪ್ಪನ ಮೂರ್ತಿಯನ್ನು ಸ್ಪರ್ಶಿಸಿದ್ದೇನೆ ಎಂದು ಹೇಳಿಕೆ ನೀಡುವ ಮೂಲಕ ವಿವಾದದ ಕೇಂದ್ರ ಬಿಂದು ಆಗಿದ್ದರು.