ಆನಂದ್​ ಸಿಂಗ್ ಸಂಧಾನ ಸಾರಥ್ಯ ಶಾಸಕ ರಾಜುಗೌಡಗೆ ವಹಿಸಿದ್ರಾ ಸಿಎಂ ಬೊಮ್ಮಾಯಿ..?

ಮೈತ್ರಿ ಸರ್ಕಾರಕ್ಕೆ ರಾಜೀನಾಮೆ ನೀಡಿದ್ದ ವೇಳೆಯೂ ಆನಂದ್​ ಸಿಂಗ್​ಗೆ ಸಾರಥ್ಯ ವಹಿಸಿದ್ದ ಶಾಸಕ ರಾಜು ಗೌಡ ಇದೀಗ ಖಾತೆ ಅಸಮಾಧಾನ ವಿಚಾರದಲ್ಲಿಯೂ ಆನಂದ್​ ಸಿಂಗ್​​​ಗೆ ಸಾರಥಿಯಾಗಿದ್ದಾರಾ ಎಂಬ ಕುತೂಹಲ ರಾಜಕೀಯ ವಲಯದಲ್ಲಿ ಮೂಡಿದೆ. ಆನಂದ್​ ಸಿಂಗ್​​ರ ಅಸಮಾಧಾನ ಶಮನಕ್ಕೆ ಸಿಎಂ ಬೊಮ್ಮಾಯಿ ರಾಜು ಗೌಡರ ಸಹಾಯ ಕೋರಿದ್ದಾರೆ ಎನ್ನಲಾಗಿದೆ.

ಆನಂದ್​ ಸಿಂಗ್​ರ ಭೇಟಿಗೆ ಸಿಎಂ ಬೊಮ್ಮಾಯಿ ಮುಂದಾದ ಹಿನ್ನೆಲೆಯಲ್ಲಿ ಆನಂದ್​ ಸಿಂಗ್,​ ಶಾಸಕ ರಾಜು ಗೌಡರ ಜೊತೆಯಲ್ಲಿ ಜಿಂದಾಲ್​ನಿಂದ ಬೆಂಗಳೂರಿಗೆ ಪ್ರಯಾಣ ಬೆಳೆಸಿದ್ದಾರೆ. ಆದರೆ ಆನಂದ್​ ಸಿಂಗ್​ರನ್ನು ಕರೆದುಕೊಂಡು ಬರುವ ಕೆಲಸವನ್ನು ಸಿಎಂ ಬೊಮ್ಮಾಯಿ, ರಾಜುಗೌಡರಿಗೆ ಏಕೆ ನೀಡಿದ್ರು ಅನ್ನೋದು ಸದ್ಯದ ಪ್ರಶ್ನೆಯಾಗಿದೆ.

ಆನಂದ್​ ಸಿಂಗ್​ ಸಮ್ಮಿಶ್ರ ಸರ್ಕಾರ ಅಧಿಕಾರದಲ್ಲಿದ್ದಾಗ ರಾಜೀನಾಮೆ ನೀಡಿದ್ದಾಗಲೂ ರಾಜು ಗೌಡ ಇವರ ಜೊತೆ ಕಾಣಿಸಿಕೊಂಡಿದ್ದರು. ಆನಂದ್​​ ಸಿಂಗ್​ ಉಪಚುನಾವಣೆಗೆ ನಾಮಪತ್ರ ಸಲ್ಲಿಸುವಾಗಲೂ ಇದೇ ರಾಜು ಗೌಡ ನೇತೃತ್ವ ವಹಿಸಿದ್ದರು. ಇದೀಗ ಆನಂದ್​ ಸಿಂಗ್​ ಖಾತೆ ಕ್ಯಾತೆ ಶಮನಕ್ಕೂ ರಾಜು ಗೌಡರನ್ನೇ ಬಿಜೆಪಿ ಮುಂದೆ ಬಿಟ್ಟಿದೆ. ಉಪಚುನಾವಣೆ ವೇಳೆ ಆನಂದ್​ ಸಿಂಗ್​​ರನ್ನು ಎತ್ತಿನ ಗಾಡಿ ಮೇಲೆ ಕೂರಿಸಿಕೊಂಡು ಹೊರಟಿದ್ದ ರಾಜು ಗೌಡ ಇಂದು ಹೆಲಿಕಾಪ್ಟರ್​ನಲ್ಲಿ ಬೆಂಗಳೂರಿಗೆ ಪ್ರಯಾಣ ಬೆಳೆಸುವಲ್ಲಿಯೂ ಆನಂದ್​ ಸಿಂಗ್​ ಜೊತೆ ನಿಂತಿದ್ದಾರೆ. ಈ ಮೂಲಕ ಕಲ್ಯಾಣ ಕರ್ನಾಟಕದ ಜೋಡಿ ಹಕ್ಕಿ ಎಂಬ ಬಿರುದನ್ನು ಈ ಜೋಡಿ ಮತ್ತೊಮ್ಮೆ ಸಾಬೀತು ಪಡಿಸಿದೆ.