ಟೋಕಿಯೋದಲ್ಲಿ ಕೊರೊನಾತಂಕ: ಒಂದೇ ದಿನದಲ್ಲಿ 3865 ಹೊಸ ಪ್ರಕರಣ ವರದಿ

ಜಪಾನ್​ ರಾಜಧಾನಿ ಟೋಕಿಯೋದಲ್ಲಿ ಒಲಿಂಪಿಕ್​ ಆಟ ನಡೆಯುತ್ತಿರೋದರ ಬೆನ್ನಲ್ಲೇ ಕೋವಿಡ್​ ಸಂಖ್ಯೆ ಕೂಡ ಗಣನೀಯ ಪ್ರಮಾಣದಲ್ಲಿ ಏರಿಕೆ ಕಾಣುತ್ತಿರೋದು ಆತಂಕಕ್ಕೆ ಕಾರಣವಾಗಿದೆ.

ಕ್ಯಾಬಿನೇಟ್​ ಮುಖ್ಯ ಕಾರ್ಯದರ್ಶಿ ಕಟ್ಸುನೊಬು ಕ್ಯಾಟೋ ಈ ವಿಚಾರವಾಗಿ ಮಾತನಾಡಿದ್ದು, ಈ ಪ್ರಮಾಣದಲ್ಲಿ ಸೋಂಕು ಏರಿಕೆಯಾಗುತ್ತಿರೋದನ್ನ ನಾವು ಹಿಂದೆಂದೂ ಕಂಡೇ ಇರಲಿಲ್ಲ ಎಂದು ಆತಂಕ ಹೊರಹಾಕಿದ್ದಾರೆ. ಹೊಸ ಪ್ರಕರಣಗಳು ಟೋಕಿಯೋದಲ್ಲಿ ಮಾತ್ರವಲ್ಲದೇ ಜಪಾನ್​ನಾದ್ಯಂತ ಹೆಚ್ಚುತ್ತಿದೆ.
ಗುರುವಾರ ಟೋಕಿಯೋದಲ್ಲಿ 3865 ಹೊಸ ಕೊರೊನಾ ಪ್ರಕರಣಗಳು ವರದಿಯಾಗಿದೆ. ಕಳೆದ ವಾರಕ್ಕೆ ಹೋಲಿಸಿದ್ರೆ ಸೋಂಕಿನ ಸಂಖ್ಯೆಯಲ್ಲಿ ದುಪ್ಪಟ್ಟು ಏರಿಕೆಯಾಗಿದೆ. ಕಳೆದ ವರ್ಷ ಕೊರೊನಾ ಎಂಟ್ರಿ ಕೊಟ್ಟಾಗಲೂ ದಾಖಲೆಯಾಗದ್ದಷ್ಟು ಪ್ರಕರಣಗಳು ಈಗ ಜಪಾನ್​ನಲ್ಲಿ ವರದಿಯಾಗುತ್ತಿದೆ. ಜಪಾನ್​ನಾದ್ಯಂತ ಒಂದು ದಿನದಲ್ಲಿ 9500 ಹೊಸ ಪ್ರಕರಣಗಳು ವರದಿಯಾಗಿದ್ದು ಇದು ಕೂಡ ಹೊಸ ದಾಖಲೆಯಾಗಿದೆ.

ಜಪಾನ್​ ಸರ್ಕಾರದ ಮೆಡಿಕಲ್​​​ ಸಲಹೆಗಾರ ಡಾ. ಶಿಗೆರು ಒಮಿ ಒಲಿಂಪಿಕ್​ ಹಾಗೂ ಬೇಸಿಗೆ ರಜೆಯು ದೇಶದಲ್ಲಿ ಕೊರೊನಾ ಪ್ರಕರಣಗಳು ಹೆಚ್ಚಾಗಲು ಕಾರಣ ಎಂದು ಹೇಳಿದ್ದಾರೆ.