ಭಾರತೀಯ ಜಿಮ್ನಾಸ್ಟ್​ ವಿರುದ್ಧ ಗಂಭೀರ ಆರೋಪ ಮಾಡಿದ ಮಾಜಿ ಕೋಚ್​…!

ಭಾರತೀಯ ಜಿಮ್ನಾಸ್ಟ್​ ಪ್ರಣತಿ ನಾಯಕ್​ ಟೋಕಿಯೋ ಒಲಿಂಪಿಕ್​​​ನಿಂದ ಬಹುಬೇಗನೇ ಔಟ್​ ಆಗಿದ್ದಾರೆ. ಈ ಮೂಲಕ ಜಿಮ್ನಾಸ್ಟ್​ ಪ್ರಣತಿ ನಾಯಕ್​​ಗೆ ಒಲಿಂಪಿಕ್​ ಪದಕ ಕೈ ತಪ್ಪಿದಂತಾಗಿದೆ.

ಪ್ರಣತಿ ನಾಯಕ್​ ಪಂದ್ಯದಿಂದ ಹೊರಬೀಳುತ್ತಿದ್ದಂತೆಯೇ ಪ್ರಣತಿ ಹಿಂದಿನ ಕೋಚ್​ ಮಿನರಾ ಬೇಗಂ ಪ್ರಣತಿ ವಿರುದ್ಧ ಗಂಭೀರ ಆರೋಪ ಮಾಡಿದ್ದಾರೆ. ಪ್ರಣತಿ ಆಟದ ಬಗ್ಗೆ ಗಂಭೀರತೆಯನ್ನೇ ಹೊಂದಿರಲಿಲ್ಲ. ಪ್ರಣತಿಗೆ ಆಟ ಅನ್ನೋದು ಫೋಟೋ ತೆಗೆಸಿಕೊಳ್ಳಲು ಇರುವ ಅವಕಾಶ ಮಾತ್ರ ಆಗಿತ್ತು. ಕೇವಲ ಪ್ರಣತಿ ಮಾತ್ರವಲ್ಲದೇ ಆಕೆಯ ಈಗಿನ ಕೋಚ್​ 27 ವರ್ಷದ ಲಖನ್​ ಶರ್ಮಾ ಕೂಡ ಗಂಭೀರ ರೀತಿಯಲ್ಲಿ ವರ್ತಿಸುತ್ತಿರಲಿಲ್ಲ. ಈಕೆಗೆ 26 ವರ್ಷ, ಕೋಚ್​ಗೆ 27 ವರ್ಷ. ನನಗೆ ಇಬ್ಬರಲ್ಲೂ ಆಟದ ಬಗ್ಗೆ ಗಂಭೀರತೆ ಕಂಡು ಬಂದೇ ಇರಲಿಲ್ಲ ಎಂದು ಆರೋಪಿಸಿದ್ದಾರೆ.

ಒಲಿಂಪಿಕ್​​​ ಪಂದ್ಯಕ್ಕೂ ಕೇವಲ 2 ತಿಂಗಳ ಹಿಂದೆ ಮಿನಾರಾರನ್ನ ಪ್ರಣತಿಯ ಕೋಚ್​ ಸ್ಥಾನದಿಂದ ತೆಗೆಯಲಾಗಿತ್ತು. ಇದಾದ ಬಳಿಕ ಅವರು ಪ್ರಧಾನಿ ಮೋದಿ ಹಾಗೂ ಪ್ರಶ್ಚಿಮ ಬಂಗಾಳ ಸಿಎಂ ಮಮತಾ ಬ್ಯಾನರ್ಜಿ ಈ ವಿಚಾರವಾಗಿ ಮಧ್ಯ ಪ್ರವೇಶ ಮಾಡಬೇಕು ಎಂದು ಮನವಿ ಮಾಡಿದ್ದರು.

ಪ್ರಣತಿಗೆ 8 ವರ್ಷ ಇದ್ದಾಗಿನಿಂದ ಮಿನಾರಾ ಅವರ ಕೋಚ್​ ಆಗಿದ್ದರು. ಮಿನರಾ ಮಾರ್ಗದರ್ಶನದಲ್ಲಿ ಪ್ರಣತಿ ಸಾಕಷ್ಟು ಸ್ಪರ್ಧೆಯನ್ನು ಎದುರಿಸಿದ್ದರು. ಒಲಿಂಪಿಕ್​ನಲ್ಲಿ ಪ್ರಣತಿ ಉತ್ತಮ ಪ್ರದರ್ಶನವನ್ನೇ ನೀಡಿಲ್ಲ. 27 ವರ್ಷದ ವ್ಯಕ್ತಿ ಪ್ರಣತಿಗೆ ತರಬೇತಿ ನೀಡಲು ಸರಿಯಾದವರಲ್ಲ. ಪ್ರತಿಯೊಂದು ವಿಭಾಗದಲ್ಲೂ ಪ್ರಣತಿ ಎಡವಿದ್ದಾರೆ ಎಂದು ಹೇಳಿದ್ದಾರೆ.