ಮತ್ತೆ ಹೆಚ್ಚಿದ ಡೆಡ್ಲಿ ವೈರಸ್​ ಅಟ್ಟಹಾಸ: ಪ್ರಮುಖ ಕಾರಣಗಳನ್ನ ಬಿಚ್ಚಿಟ್ಟ ವಿಶ್ವ ಆರೋಗ್ಯ ಸಂಸ್ಥೆ

ವಿಶ್ವದಲ್ಲಿ ಕೊರೊನಾ ಹರಡುವಿಕೆ ಮಂದಗತಿಯಲ್ಲಿಲ್ಲ. ಕೊರೊನಾ ಲಸಿಕೆ ಹಂಚಿಕೆಯಲ್ಲಿ ವಿಳಂಬ ಒಂದೆಡೆಯಾದರೆ ಡೆಲ್ಟಾ ರೂಪಾಂತರಿ ಪ್ರಕರಣಗಳು ಏರಿಕೆ ಕಾಣುತ್ತಲೇ ಇದೆ ಎಂದು ವಿಶ್ವ ಆರೋಗ್ಯ ಸಂಸ್ಥೆ ಹೇಳಿದೆ.

ಸಂದರ್ಶನವೊಂದರಲ್ಲಿ ಈ ವಿಚಾರವಾಗಿ ಮಾತನಾಡಿದ ವಿಶ್ವ ಆರೋಗ್ಯ ಸಂಸ್ಥೆಯ ಮುಖ್ಯ ವಿಜ್ಞಾನಿ ಸೌಮ್ಯ ಸ್ವಾಮಿನಾಥನ್​, ಆರರಲ್ಲಿ ಐದು ಪ್ರದೇಶಗಳಲ್ಲಿ ಕೋವಿಡ್ -​ 19 ಪ್ರಕರಣಗಳು ಹೆಚ್ಚಾಗುತ್ತಲೇ ಇವೆ. ಆಫ್ರಿಕಾದಲ್ಲಿ ಕಳೆದ 2 ವಾರಗಳಲ್ಲಿ ಕೋವಿಡ್​ ಸಾವಿನ ಪ್ರಮಾಣ 30 – 40 ಪ್ರತಿಶತ ಏರಿಕೆ ಕಂಡಿದೆ ಎಂದು ಹೇಳಿದ್ದಾರೆ.

ಕಳೆದ 24 ಗಂಟೆಗಳಲ್ಲಿ 5 ಲಕ್ಷಕ್ಕೂ ಅಧಿಕ ಹೊಸ ಕೊರೊನಾ ಕೇಸ್​ಗಳು ಹಾಗೂ 9300 ಮರಣಗಳು ವರದಿಯಾಗಿವೆ ಎಂದು ಸ್ವಾಮಿನಾಥನ್​ ಹೇಳಿದ್ರು.

ಡೆಲ್ಟಾ ರೂಪಾಂತರಿ, ಸಾಮಾಜಿಕ ಅಂತರ ಕಾಯ್ದುಕೊಳ್ಳದೇ ಇರೋದು, ಲಾಕ್​​ಡೌನ್​ ನಿರ್ಬಂಧಗಳ ಸಡಿಲಿಕೆ ಹಾಗೂ ಕೊರೊನಾ ಲಸಿಕೆ ಅಭಿಯಾನ ಮಂದಗತಿಯಲ್ಲಿ ಸಾಗುತ್ತಿರೋದು ಕೊರೊನಾ ಪ್ರಕರಣ ಇನ್ನಷ್ಟು ಹೆಚ್ಚಲು ಪ್ರಮುಖ ನಾಲ್ಕು ಕಾರಣಗಳು ಎಂದು ಹೇಳಿದ್ದಾರೆ.

ಮೂಲ ವೈರಸ್​​ನಿಂದ ಸೋಂಕಿಗೆ ಒಳಗಾದ ವ್ಯಕ್ತಿಯು ಮೂವರಿಗೆ ಸೋಂಕನ್ನ ಹರಡುವ ಸಾಮರ್ಥ್ಯ ಹೊಂದಿರುತ್ತಾನೆ. ಆದರೆ ಡೆಲ್ಟಾ ರೂಪಾಂತರಿಯಿಂದ ಸೋಂಕಿಗೆ ಒಳಗಾದ ವ್ಯಕ್ತಿಯು ಬರೋಬ್ಬರಿ 8 ಮಂದಿಗೆ ಸೋಂಕನ್ನ ಹರಡುತ್ತಾನೆ ಎಂದು ಹೇಳಿದ್ದಾರೆ.