ಅಪರಿಚಿತರ ಮನೆಯಲ್ಲಿ ಸ್ನಾನ ಮಾಡೋಕೆ ಹೋಗಿ ಜೈಲುಪಾಲಾದ ಭೂಪ..!

ಕ್ಯಾಲಿಫೋರ್ನಿಯಾದ ಮೀಡೋ ವಿಸ್ಟಾದಲ್ಲಿ ದಂಪತಿ ವಾಸವಿದ್ದ ಮನೆಗೆ ನುಗ್ಗಿದ ದರೋಡಕೋರ ಸ್ನಾನ ಮಾಡಲು ಹೋಗಿ ಜೈಲು ಪಾಲಾಗಿದ್ದಾನೆ.

ಸ್ನಾನ ಗೃಹದಿಂದ ಟವೆಲ್​ ಹೊದ್ದು ಹೊರಬರುತ್ತಿದ್ದಂತೆಯೇ ಮನೆ ಮಾಲೀಕನಿಗೆ ಮುಖಾಮುಖಿಯಾಗಿದ್ದಾನೆ. ಮನೆ ಮಾಲೀಕನಾದ ಸ್ಟೀವ್​ ಬೌರ್​ರ ಪತ್ನಿ ರಾತ್ರಿ 11 ಗಂಟೆ ಸುಮಾರಿಗೆ ಪತಿಯನ್ನ ಎಬ್ಬಿಸಿ ಸ್ನಾನ ಗೃಹದಲ್ಲಿ ನೀರಿನ ಶಬ್ದ ಕೇಳಿ ಬರ್ತಿದೆ ಎಂದು ಹೇಳಿದ್ದರು.

ವರದಿಗಳ ಪ್ರಕಾರ, ಬೌರ್​ ಕೈಯಲ್ಲಿ ಗನ್​ನ್ನು ಹಿಡಿದ ಸ್ನಾನ ಗೃಹದಲ್ಲಿ ಯಾರಿದ್ದಾರೆ ಅನ್ನೋದನ್ನ ಪತ್ತೆ ಹಚ್ಚಲು ತೆರಳಿದ್ದಾರೆ. ಈ ವೇಳೆ ಟವಲ್​ ಹೊದ್ದಿದ್ದ ಕಳ್ಳ ಸ್ನಾನ ಗೃಹದಿಂದ ಸ್ನಾನ ಮುಗಿಸಿ ಹೊರಬಂದಿದ್ದಾನೆ.

ಗಾಜಿನ ಬಾಗಿಲನ್ನ ಸಿಮೆಂಟ್​ನಿಂದ ಮಾಡಲಾದ ಮೊಲದ ಆಕೃತಿಯ ಗೊಂಬೆಯ ಸಹಾಯದಿಂದ ಒಡೆದು ಈತ ಮನೆ ಒಳಕ್ಕೆ ನುಗ್ಗಿದ್ದ ಎನ್ನಲಾಗಿದೆ. ಈ ವೇಳೆಯಲ್ಲಿ ಬೌರ್​ ಪತ್ನಿ ಟಿವಿ ವೀಕ್ಷಿಸುತ್ತಿದ್ದರಂತೆ.

ನನ್ನ ಪತ್ನಿ ನನ್ನ ಎಬ್ಬಿಸಿ ಗನ್​ನ್ನು ತೆಗೆದುಕೊಳ್ಳಿ. ಮೇಲಿನ ಮಹಡಿಯಲ್ಲಿ ಯಾರೋ ಇದ್ದಾರೆ ಎಂದು ಹೇಳಿದಳು. ನಾನು ಕೂಡಲೇ ಗನ್​ನ್ನು ತೆಗೆದುಕೊಂಡೆ. ಕೂಡಲೇ ಮೇಲಕ್ಕೆ ಹೋದೆ. ನಾನು ಮೆಟ್ಟಿಲನ್ನ ಹತ್ತುತ್ತಿದ್ದ ವೇಳೆಯೇ ಈತ ಸ್ನಾನ ಮುಗಿಸಿ ಟವೆಲ್​ ಸುತ್ತಿಕೊಂಡು ಕೆಳಕ್ಕೆ ಇಳಿಯುತ್ತಿದ್ದ ಎಂದು ಬೌರ್​ ಹೇಳಿದ್ದಾರೆ.

ಸುಮಾರು 25 ವರ್ಷ ಪ್ರಾಯದ ಕಳ್ಳನನ್ನ ಪೊಲೀಸರು ಬಂಧಿಸಿದ್ದು ಈತನ ವಿರುದ್ಧ ಕಳ್ಳತನದ ಪ್ರಕರಣವನ್ನ ದಾಖಲಿಸಲಾಗಿದೆ.