ಪ್ರಾಮಾಣಿಕತೆಗೆ ಅಡ್ಡಿಯಾಗದ ಬಡತನ: ಸೆಲ್​ಫೋನ್​ ಸಮೇತ ಪರ್ಸ್​ನ್ನು ಪೊಲೀಸರಿಗೆ ಒಪ್ಪಿಸಿ ಮಾದರಿಯಾಯ್ತು ಬಡ ಕುಟುಂಬ

ದಿನಕ್ಕೆ ಕನಿಷ್ಟ 300 ರೂಪಾಯಿಯನ್ನೂ ಗಳಿಸದ 19 ವರ್ಷದ ರದ್ದಿ ಆಯುವ ಯುವತಿ ತನಗೆ ಸಿಕ್ಕ ಪರ್ಸ್ ಹಾಗೂ ಮೊಬೈಲ್​ನ್ನು ಪ್ರಾಮಾಣಿಕವಾಗಿ ಪೊಲೀಸರಿಗೆ ಒಪ್ಪಿಸುವ ಮೂಲಕ ಮಾದರಿಯಾಗಿದ್ದಾಳೆ. ತಮಿಳುನಾಡಿನ ತಿರುನೆಲ್ವೇಲಿ ಎಂಬಲ್ಲಿ ಈ ಘಟನೆ ನಡೆದಿದೆ. ಸ್ಮಾರ್ಟ್ ಫೋನ್​ ಸೇರಿದಂತೆ ಪೊಲೀಸರು 58210 ರೂಪಾಯಿಗಳನ್ನ ಯುವತಿಯಿಂದ ಪಡೆದಿದ್ದಾರೆ.

ತಿರುನೆಲ್ವೇಲಿ ಜಿಲ್ಲೆಯ ಎಸ್​ಪಿ ಎನ್.​ ಮಣಿವಣ್ಣನ್​​ ಎಂಬವರು ಗಣಪತಿ ಹಾಗೂ ಸೆಲ್ವಿ ಅವರ ಐವರು ಹೆಣ್ಣು ಮಕ್ಕಳಲ್ಲಿ ಕೊನೆಯವಳಾದ ಮಾರಿಯಮ್ಮಳ್‌ ​ಳನ್ನ ಶುಕ್ರವಾರ ಸನ್ಮಾನಿಸಿದ್ರು. ಈ ಕುಟುಂಬವು ಬುಡಕಟ್ಟು ಜನಾಂಗಕ್ಕೆ ಸೇರಿದ್ದು ತಮಿಳುನಾಡಿನ ಬೀದಿಗಳಲ್ಲಿ ಭಿಕ್ಷಾಟನೆ ಇಲ್ಲವೇ ಸಣ್ಣ ಪುಟ್ಟ ಸಾಮಗ್ರಿಗಳನ್ನ ಮಾರಾಟ ಮಾಡಿ ಜೀವನ ಸಾಗಿಸುತ್ತಿದೆ. ನಾಲ್ವರು ಸಹೋದರಿಯರಿಗೆ ವಿವಾಹವಾಗಿದ್ದು ಮಾರಿಯಮ್ಮಳ್​ ಮಾತ್ರ ತನ್ನ ಪೋಷಕರ ಜೊತೆ ಇದ್ದಾಳೆ. ಈಕೆ ಸಹ ತನ್ನ ಸಮುದಾಯದ ಇತರರಂತೆ ಐದನೇ ತರಗತಿ ಬಳಿಕ ಶಿಕ್ಷಣ ಮುಂದುವರಿಸಿಲ್ಲ.‌

ತನ್ನ ಅತ್ತೆ ಸೇರಿದಂತೆ ಇನ್ನೂ ಆರು ಮಂದಿ ಜೊತೆ ಸೇರಿ ರದ್ಧಿ ಆಯುತ್ತಿದ್ದ ವೇಳೆಯಲ್ಲಿ ಮಾರಿಯಮ್ಮಳ್​ಗೆ ಈ ಪರ್ಸ್ ಸಿಕ್ಕಿದೆ. ಈ ಪರ್ಸ್ ವೈಬ್ರೇಟ್​ ಆಗಿದ್ದನ್ನ ನೋಡಿ ತೆರೆದ್ರು ನೋಡಿದ್ರೆ ಅದರಲ್ಲಿ ಹಣ ಹಾಗೂ ಸ್ಮಾರ್ಟ್ ಫೋನ್​ ಇರುವ ವಿಚಾರ ತಿಳಿದಿದೆ.‌

ಕೂಡಲೇ ಸೆಲ್ವಿ ತಮ್ಮ ಮಗಳ ಸಮೇತ ಪೊಲೀಸ್ ಠಾಣೆಗೆ ತೆರಳಿ ಈ ಪರ್ಸ್​ನ್ನು ಜೋಪಾನವಾಗಿ ಠಾಣೆಗೆ ಒಪ್ಪಿಸಿದ್ದಾರೆ. ಇನ್ನು ಈ ವಿಚಾರವಾಗಿ ಮಾತನಾಡಿದ ಸೆಲ್ವಿ, ಹಣ ಗಳಿಸುವ ಕಷ್ಟ ಏನೆಂದು ನಮಗೆ ತಿಳಿದಿದೆ. ಹೀಗಾಗಿ ಹಣದ ಸಮೇತ ಪರ್ಸ್​ನ್ನು ಪೊಲೀಸರ ಕೈಗೆ ನೀಡಿದ್ದೇವೆ ಎಂದು ಹೇಳಿದ್ರು. ಪರ್ಸ್ ಮಾಲೀಕರು ಈ ಕುಟುಂಬಕ್ಕೆ 1 ಸಾವಿರ ರೂಪಾಯಿಯನ್ನ ಬಹುಮಾನದ ರೂಪದಲ್ಲಿ ನೀಡಿದ್ದಾರೆ.