ಕೊರೊನಾ ಸೋಂಕಿತರಿಗಾಗಿ ತುರ್ತು ಆಹಾರ ಪೂರೈಕೆ ಸೌಲಭ್ಯ ನೀಡಿದ ಜೊಮ್ಯಾಟೋ

ಆನ್​ಲೈನ್​ ಫುಡ್​ ಡೆಲಿವರಿ ಸಂಸ್ಥೆ ಜೊಮ್ಯಾಟೋ ಆಪಲ್​ ಹಾಗೂ ಆಂಡ್ರಾಯ್ಡ್​ ಮೊಬೈಲ್​ ಬಳಕೆದಾರರಿಗಾಗಿ ಕೋವಿಡ್​ 19 ತುರ್ತು ಪರಿಸ್ಥಿತಿ ಎಂಬ ಹೊಸ ಸೌಲಭ್ಯವನ್ನ ಪರಿಚಯಿಸಿದೆ.

ಈ ಆಯ್ಕೆಯನ್ನ ಬಳಸಿಕೊಂಡವರ ಫುಡ್ ಆರ್ಡರ್​ಗೆ ಜೊಮ್ಯಾಟೋ ಆದ್ಯತೆ ನೀಡುತ್ತೆ ಮಾತ್ರವಲ್ಲದೇ ಆದಷ್ಟು ಬೇಗ ಇಂತಹ ಆರ್ಡರ್​ಗಳನ್ನ ಗ್ರಾಹಕರಿಗೆ ತಲುಪಿಸಲು ಜೊಮ್ಯಾಟೋ ಪ್ರಯತ್ನ ಮಾಡಲಿದೆ.

ಇನ್ನು ಇಂತಹ ಆರ್ಡರ್​ಗಳಿಗೆ ಮೊದಲೇ ಹಣ ಪಾವತಿ ಮಾಡಬೇಕು. ಡೆಲಿವರಿ ಕೂಡ ಸಂಪರ್ಕರಹಿತವಾಗಿರಲಿದೆ. ಜೊಮ್ಯಾಟೋ ಜೊತೆ ಈ ಹೊಸ ಸೌಲಭ್ಯಕ್ಕೆ ಒಡಂಬಡಿಕೆ ಮಾಡಿಕೊಂಡ ರೆಸ್ಟಾರೆಂಟ್​ಗಳ ಫುಡ್​ಗೆ ಈ ಆಯ್ಕೆ ಲಭ್ಯವಿದೆ. ಈ ಆರ್ಡರ್​ ಕೋವಿಡ್​ 19 ತುರ್ತುಪರಿಸ್ಥಿತಿಯಾಗಿದೆ ಎಂಬ ಆಯ್ಕೆಯನ್ನ ನೀವು ಕ್ಲಿಕ್​ ಮಾಡಿದ್ರೆ ನಿಮಗೆ ತುರ್ತಾಗಿ ಫುಡ್​ ಬಂದು ತಲುಪಲಿದೆ.

ಅಂದಹಾಗೆ ಈ ವಿಶೇಷ ಡೆಲಿವರಿಗೆ ಹೆಚ್ಚಿನ ಶುಲ್ಕ ವಿಧಿಸೋದಿಲ್ಲ ಎಂದು ಜೊಮ್ಯಾಟೋ ಸ್ಪಷ್ಟನೆ ನೀಡಿದೆ. ಗ್ರಾಹಕರಿಗೆ ನಮ್ಮ ಅವಶ್ಯಕತೆ ಹೆಚ್ಚಿರುವ ಈ ಸಂದರ್ಭದಲ್ಲಿ ನಮ್ಮೊಡನೆ ಕೈಜೋಡಿಸಿದ ರೆಸ್ಟಾರೆಂಟ್​ಗಳಿಗೆ ಧನ್ಯವಾದ ಎಂದು ಜೊಮ್ಯಾಟೋ ಹೇಳಿದೆ.

ಈ ಆಯ್ಕೆಯನ್ನ ಆಂಬುಲೆನ್ಸ್ ಸೇವೆ ಎಂದುಕೊಳ್ಳಿ. ಇದನ್ನ ದುರುದ್ದೇಶಕ್ಕೆ ಬಳಕೆ ಮಾಡಬೇಡಿ ಎಂದು ಗ್ರಾಹಕರಿಗೆ ಜೊಮ್ಯಾಟೋ ಮನವಿ ಮಾಡಿದೆ.