ಹೆಣ್ಣು ಭ್ರೂಣ ಹತ್ಯೆಯಂತಹ ಅಮಾನವೀಯ ಕೃತ್ಯಕ್ಕೆ ಸಾಕ್ಷಿಯಾಗುವ ಈ ಸಮಾಜದಲ್ಲಿ ರಾಜಸ್ಥಾನದ ಕುಟುಂಬವೊಂದು ಹೆಣ್ಣು ಮಗು ಹುಟ್ಟಿದ ಕಾರಣಕ್ಕೆ ಭರ್ಜರಿ ಸೆಲೆಬ್ರೇಷನ್ ಮಾಡಿದ್ದು ಈ ಅದ್ದೂರಿ ಸಂಭ್ರಮದ ಮೂಲಕವೇ ಸುದ್ದಿಯಾಗಿದೆ.
ಬರೋಬ್ಬರಿ 35 ವರ್ಷಗಳ ಬಳಿಕ ಈ ಕುಟುಂಬಕ್ಕೆ ಹೆಣ್ಣುಮಗುವಿನ ಆಗಮನವಾಗಿದೆ. ಹೀಗಾಗಿ ಮಗುವನ್ನ ನಾಗಪುರ ಜಿಲ್ಲೆಯಿಂದ ತಮ್ಮ ಹಳ್ಳಿಗೆ ಹೆಲಿಕಾಪ್ಟರ್ ಮೂಲಕ ಕೊಂಡೊಯ್ದಿದ್ದಾರೆ. ಈ ಸಂಭ್ರಮಕ್ಕಾಗಿ ಕುಟುಂಬ ಬರೋಬ್ಬರಿ 4.5 ಲಕ್ಷ ರೂಪಾಯಿ ಖರ್ಚು ಮಾಡಿದೆ.
ನಿಂಬ್ಡಿ ಚಂದವಟಾ ಗ್ರಾಮಸ್ಥರು ಹೆಣ್ಣು ಮಗುವಿನ ಅದ್ಧೂರಿ ಸ್ವಾಗತವನ್ನ ಕಣ್ತುಂಬಿಕೊಂಡಿದ್ದಾರೆ. ರಿಯಾ ಎಂಬ ಮಗು 2 ತಿಂಗಳ ಹಿಂದೆ ಜನಿಸಿದ್ದು ತನ್ನ ತಾಯಿಯ ಮನೆಯಲ್ಲಿತ್ತು. ಇದೀಗ ತಂದೆ ಮನೆಗೆ ಮಗು ವಾಪಸ್ಸಾಗಿದ್ದು ಈ ಎಂಟ್ರಿಯನ್ನ ಅದ್ದೂರಿಯಾಗಿ ಸಂಭ್ರಮಿಸಲಾಗಿದೆ.
ರಾಮನವಮಿ ದಿನ ಮಗು ತಂದೆಯ ಮನೆಗೆ ಪ್ರವೇಶ ಮಾಡಿದ್ದು ಪುಷ್ಪದೋಕುಳಿ ಮೂಲಕ ತಾಯಿ ಹಾಗೂ ಮಗುವನ್ನ ಗ್ರಾಮಕ್ಕೆ ಬರ ಮಾಡಿಕೊಳ್ಳಲಾಗಿದೆ.
ಮದನ್ ಲಾಲ್ ಕುಮಾರ್ ಕುಟುಂಬ ಕಳೆದ 35 ವರ್ಷಗಳಿಂದ ಹೆಣ್ಣು ಮಗುವನ್ನೇ ಹೊಂದಿರಲಿಲ್ಲ. ಪ್ರತಿ ಬಾರಿ ಹೆಣ್ಣು ಮಗುವಿನ ನಿರೀಕ್ಷೆಯಲ್ಲಿರ್ತಿದ್ದ ಕುಟುಂಬಕ್ಕೆ ಕೊನೆಗೂ ಸಿಹಿಸುದ್ದಿ ಸಿಕ್ಕಿದೆ. ಹೀಗಾಗಿ ಜಿಲ್ಲಾಧಿಕಾರಿಗಳಿಂದ ಅನುಮತಿ ಪಡೆದ ಮದನ್ ಲಾಲ್ ಕುಟುಂಬ ಇಷ್ಟು ಅದ್ಧೂರಿಯಾಗಿ ಮಗುವನ್ನ ಮನೆಗೆ ಬರ ಮಾಡಿಕೊಂಡಿದೆ.
ಎರಡು ಗ್ರಾಮದ ನಡುವೆ 30 ಕಿಲೋಮೀಟರ್ ಅಂತರವಿದ್ದು ಚಾಪರ್ನಲ್ಲಿ 20 ನಿಮಿಷಗಳ ಪ್ರಯಾಣದಲ್ಲಿ ಮಗು ತಂದೆ ಮನೆಗೆ ಬಂದಿದೆ. ಇನ್ನು ಈ ವಿಚಾರವಾಗಿ ಮಾತನಾಡಿದ ರಿಯಾ ತಂದೆ ಹನುಮಾನ್ ರಾಮ್ ಪ್ರಜಾಪತ್, ಹೆಣ್ಣು ಮಗುವಿನ ಜನನವನ್ನ ಪ್ರತಿ ಮನೆಯೂ ಇದೇ ರೀತಿ ಹಬ್ಬದಂತೆ ಸಂಭ್ರಮಿಸುವಂತಾಗಬೇಕು ಎಂದು ಹೇಳಿದ್ದಾರೆ.
Loading ...