ರಸ್ತೆ ಅಪಘಾತ ತಡೆಗೆ ಮಹತ್ವದ ಕ್ರಮಕ್ಕೆ ಮುಂದಾದ ಕೇಂದ್ರ ಸರ್ಕಾರ

ಕೇಂದ್ರ ರಸ್ತೆ ಸಾರಿಗೆ ಹಾಗೂ ಹೆದ್ದಾರಿ ಸಚಿವ ನಿತಿನ್​ ಗಡ್ಕರಿ ಮುಂದಿನ ನಾಲ್ಕು ವರ್ಷಗಳಲ್ಲಿ ದೇಶದಲ್ಲಿ ಅಪಘಾತದ ಪ್ರಕರಣಗಳಲ್ಲಿ ಉಂಟಾಗುವ ಸಾವಿನ ಪ್ರಮಾಣವನ್ನ ಅರ್ಧದಷ್ಟು ಕಡಿಮೆ ಮಾಡುವ ಗುರಿ ಹೊಂದಿರೋದಾಗಿ ಹೇಳಿದ್ದಾರೆ.

ಇಂಟರ್​ನ್ಯಾಷನಲ್​ ಇನ್​ಸ್ಟಿಟ್ಯೂಟ್​ ಆಫ್​ ಸೆಕ್ಯೂರಿಟಿ ಹಾಗೂ ಸೇಫ್ಟಿ ಮ್ಯಾನೇಜ್​ಮೆಂಟ್​ ಆಯೋಜಿಸಿದ್ದ ವೆಬ್​ನಾರ್​ ಉದ್ದೇಶಿಸಿ ಮಾತನಾಡಿದ ಅವರು, ರಸ್ತೆ ಸುರಕ್ಷತೆಯ ಹೊಸ ಮಾರ್ಗಸೂಚಿಗಳ ಬಗ್ಗೆ ವಿವರಣೆ ನೀಡಿದ್ರು.

ಪ್ರತಿ ವರ್ಷ ರಸ್ತೆ ಅಪಘಾತದಲ್ಲಿ 1.5 ಲಕ್ಷಕ್ಕೂ ಹೆಚ್ಚು ಮಂದಿ ಸಾವನ್ನಪ್ಪುತ್ತಿದ್ದಾರೆ, 2025ರ ವೇಳೆ ಈ ಸಾವಿನ ಸಂಖ್ಯೆಯಲ್ಲಿ ಶೇಕಡಾ 50 ರಷ್ಟು ಹಾಗೂ 2030ರ ವೇಳೆಯಲ್ಲಿ ಶೂನ್ಯ ಸಾಧನೆ ಮಾಡುವ ಗುರಿ ಹೊಂದಿದ್ದೇವೆ ಅಂತಂದ್ರು.

ಕಳೆದ ವರ್ಷ ಫೆಬ್ರವರಿ ತಿಂಗಳಲ್ಲಿ ಸ್ವೀಡನ್​ನಲ್ಲಿ ನಡೆದ ರಸ್ತೆ ಸುರಕ್ಷತೆ ಕುರಿತ ಮೂರನೇ ಜಾಗತಿಕ ಮಂತ್ರಿ ಸಮ್ಮೇಳನದಲ್ಲಿ ಅಂಗೀಕರಿಸಲ್ಪಟ್ಟ ಸ್ಟಾಕ್​ಹೋಮ್​ ಘೋಷಣೆಯಡಿಯಲ್ಲಿ 2030ರ ವೇಳೆ ಅಪಘಾತದ ಪ್ರಮಾಣವನ್ನ 50 ಪ್ರತಿಶತದಷ್ಟು ಕಡಿಮೆ ಮಾಡುವ ಗುರಿ ಹೊಂದಿದೆ. ಆದರೆ ಭಾರತದಲ್ಲಿ 2025ರ ವೇಳೆಗೆ ಈ ಸಾಧನೆ ಮಾಡುವ ಗುರಿ ಹೊಂದಿದ್ದೇವೆ ಅಂತಾ ಗಡ್ಕರಿ ಹೇಳಿದ್ರು.

ದೇಶದಲ್ಲಿ 22 ಲಕ್ಷ ಜವಾಬ್ದಾರಿಯುತ ಚಾಲಕರ ಅವಶ್ಯಕತೆ ಇದೆ. ಇದಕ್ಕಾಗಿ ಈಗಾಗಲೇ ತರಬೇತಿ ಕೇಂದ್ರಗಳನ್ನ ತೆರೆಯಲಾಗಿದ್ದು ಈ ಕೇಂದ್ರಗಳ ಮೂಲಕ ಅತ್ಯುತ್ತಮ ಚಾಲಕರನ್ನ ಹೊಂದುವ ಗುರಿ ಇಡಲಾಗಿದೆ. ರಸ್ತೆ ಅಪಘಾತಗಳಲ್ಲಿ 18 ರಿಂದ 45 ವರ್ಷದೊಳಗಿನ 70 ಪ್ರತಿಶತ ಮಂದಿ ಸಾಯುತ್ತಿದ್ದಾರೆ. ಎಂದು ಹೇಳಿದ್ರು.

ಪ್ರಸ್ತುತ ಪ್ರತಿ ವರ್ಷ 13.5 ಲಕ್ಷ ಮಂದಿ ಕೇವಲ ರಸ್ತೆ ಅಪಘಾತಗಳಿಂದ ಸಾವನ್ನಪ್ಪುತ್ತಿದ್ದಾರೆ. 5 ಕೋಟಿ ಮಂದಿ ಗಾಯಗೊಳ್ತಾರೆ ಎಂದು ಗಡ್ಕರಿ ಮಾಹಿತಿ ನೀಡಿದ್ರು.